អតីតប្រធានាធិបតីអាមេរិក ចូ បៃដិន កើតជំងឺមហារីកធ្ងន់ធ្ងរ

អតីតប្រធានាធិបតីអាមេរិក ចូ បៃដិន ត្រូវបានធ្វើរោគវិនិច្ឆ័យឃើញថាកើតជំងឺមហារីកក្រពេញប្រូស្តាតធ្ងន់ធ្ងរ ខណៈក្រុមគ្រួសាររបស់លោកកំពុងពិចារណាលើជម្រើសនៃការព្យាបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃចន្ទទី១៩ខែឧសភាឆ្នាំ២០២៥ ជំងឺមហារីកក្នុងខ្លួនលោក បៃដិន ត្រូវបានរកឃើញក្នុងអំឡុងការពិនិត្យសុខភាពជាប្រចាំ កាលពីថ្ងៃសុក្រសប្តាហ៍មុន ប៉ុន្តែព័ត៌មានទើបតែប្រកាសនៅថ្ងៃចន្ទប៉ុណ្ណោះ។

ជុំវិញរឿងនេះ ការិយាល័យរបស់លោកបានចេញសេចក្តីថ្លែងការណ៍ថា មហារីកនេះបានរាលដាលដល់ឆ្អឹងទៅហើយ។ វាជាប្រភេទធ្ងន់ធ្ងរដែលកំណត់មាត្រដ្ឋានដោយពិន្ទុ Gleason ៩ លើ ១០។

ក្រោយជ្រាបពីពត៌មាននេះ លោកប្រធានាធិបតី ដូណាល់ ត្រាំ បានបង្ហាញក្តីសោកសៅ ដោយបង្ហោះសារលើបណ្តាញសង្គម Truth Social ថា «យើង​សូម​ជូន​ពរ​ដល់លោកជំទាវ Jill និង​ក្រុម​គ្រួសារ និងសូមជូនពរឲ្យលោក ចូ ឆាប់ជាសះស្បើយនិងជោគជ័យ»។

មហារីកក្រពេញប្រូស្តាត គឺជាមហារីកទូទៅបំផុតទីពីរ ដែលកើតលើបុរស បន្ទាប់ពីមហារីកស្បែក។ បើយោងតាមមជ្ឈមណ្ឌលគ្រប់គ្រងនិងបង្ការជំងឺរបស់សហរដ្ឋអាមេរិក (CDC), បុរស១៣នាក់ក្នុងចំណោម១០០នាក់ នឹងវិវត្តទៅជាជំងឺមហារីកក្រពេញប្រូស្តាតនៅពេលណាមួយក្នុងជីវិត។

សូមជម្រាបថា កន្លងមក លោកបៃដិនបានទទួលការព្យាបាលជំងឺមហារីកស្បែកដោយជោគជ័យ ម្តងរួចមកហើយ។ កាលពីឆ្នាំ២០២៣ពោលគឺពេលកាន់តំណែងជាប្រមុខសេតវិមាន គាត់មានចេញដំបៅនៅលើទ្រូង ក្នុងអំឡុងពេលពិនិត្យរាងកាយប្រចាំឆ្នាំ។

គ្រូពេទ្យរបស់គាត់នៅពេលនោះបញ្ជាក់ថា វាគឺជាមហារីកកោសិកា Basal ដែលជាប្រភេទមួយនៃជំងឺមហារីកស្បែកទូទៅបំផុត៕

អត្ថបទ៖ សុខ សុវណ្ណ

ចុចអាន៖ នេះជាខ្លឹមសារនៃសំបុត្រ ដែលលោក បៃដិន ទុកឲ្យ ត្រាំ ពេលផុតតំណែង