កសិករក្នុងស្រុកទឹកឈូដាំបន្លែលក់​​វិលជុំ​ ឈ្មួយ​មកទិញ​ដល់​ចម្ការ ​ងាយ​រកប្រាក់ចំណូល

កសិករ​នៅ​ស្រុក​ទឹកឈូ​ខេត្តកំពត បានដាំដំណាំបន្លែសុវត្ថិភាពលក់វិលជុំ ចំណាយដើមទុនបន្តិចបន្តួចងាយស្រួលក្នុងការថែទាំ ដាំគ្រប់រដូវកាល ប្រមូលផលរៀងរាល់ខែ។

លោក ពី សៀង កសិករដែល​បាន​​ដាំ​ដំណាំបន្លែស្ពៃលក់វិលជុំនៅភូមិភ្នំតូច ឃុំព្រៃខ្នង ស្រុកទឹកឈូ ខេត្តកំពត បានប្រាប់ថា លោកចេះដាំបន្លែតពីឪពុកដែលមានបទពិសោធជិត ៣០ ឆ្នាំមកហើយ។

កសិកររូប​នេះ​បាន​ឲ្យ​ដឹង​ថា បច្ចុប្បន្នលោកបានដាំបន្លែស្ពៃធ្វើជ្រក់ ស្ពៃក្រញាញ់ ស្ពៃចង្កឹះ និងស្ពៃខ្មៅ ដោយបានរៀបចំនៅក្នុងផ្ទៃដីសរុបប្រមាណជាង ២ ហិកតា ដើម្បីដាំបន្លែជាលក្ខណៈលក់វិលជុំជារៀងរាល់ថ្ងៃ។

លោក ពីរ សៀង បានបញ្ជាក់ថា ការច្ចេកទេសដាំបន្លែសុវត្ថិភាពលក់វិលជុំនេះងាយស្រួលថែទាំ មិនសូវមានសត្វល្អិត ហើយរួមជាមួយការប្រើប្រព័ន្ធទុយោទឹកស្រោចស្របផងនោះ ការដាំបន្លែកាន់តែងាយនិងធូរកម្លាំងជាងមុន។

លោកបានបញ្ជាក់បន្តទៀតថា ការដាំបន្លែរដូវវស្សាបានទិន្នផលតិច តែលក់បានថ្លៃជាងរដូវប្រាំង។ សម្រាប់ស្ពៃជ្រក់​មានតម្លៃចាប់ពី ១៣០០ រៀលក្នុង១គីឡូក្រាម។ រីឯតម្លៃស្ពៃក្រញាញ់និង ស្ពៃចង្កឹះ និងស្ពៃខ្មៅ វិញមានតម្លៃចាប់​ពី​១៥០០ រៀលឡើងទៅក្នុងមួយគីឡូក្រាម។

កសិករស៊ីឈ្នួលសម្អាតស្មៅបន្លែស្ពៃ រស់នៅភូមិទឹកក្រហម ឃុំកណ្តោល ស្រុកទឹកឈូ អ្នកស្រី ញ៉ែត ឡុង បានឲ្យដឹងថា ក្រៅពីដាំបន្លែខ្លួនឯង ពួកគាត់យ៉ាងតិច ៧ នាក់តែងតែមកធ្វើការស៊ីឈ្នួលប្រចាំថ្ងៃនៅក្នុងចំការបន្លែវិលជុំនេះ។ ពួកគាត់សប្បាយចិត្ត ប្រសិនបើតម្លៃទីផ្សារបន្លែល្អ ហើយនឹងហ្ន​ព្រោះកសិករអាចរកប្រាក់ចំណូលបានដោយធ្វើកសិកម្មនៅជុំវិញផ្ទះ មិនចាំបាច់ចំណាកស្រុកដើម្បីស្វែងរកការងារធ្វើ។

បើតាមការបញ្ជាក់របស់កសិករជំនាញដាំដំណាំស្ពៃលក់វិលជុំបានឲ្យដឹងថា ស្ពៃជ្រក់ត្រូវប្រើពេល ១ ខែកន្លះទើបអាចប្រមូលផលបាន។ ខណៈស្ពៃចង្កឹះ និងស្ពៃខ្មៅប្រើពេលត្រឹម ២៨ ថ្ងៃទើបអាចប្រមូលផលបាន ស្ពៃមានឈ្មួញមកទិញដល់ចំការ តែតម្លៃប្រែប្រួលជាប្រចាំរាលថ្ងៃ៕

អត្ថបទ៖ សឹង រ៉ាត់