ក្រសួងសុខាភិបាល កំណត់បញ្ហាធំៗ៣ប្រភេទ ដែលបណ្ដាលឱ្យកើតជំងឺក្រហមភ្នែកលើពលរដ្ឋ

តាមរយៈសេចក្ដីប្រកាសព័ត៌មាន ស្ដីពីករណីផ្ទះជំងឺរលាកភ្នែកក្នុងឆ្នាំ២០២៣ ក្រសួងសុខាភិបាលបានកំណត់មូលហេតុធំចំនួនបីប្រភេទដូចជា វីរុស បាក់តេរី អាឡែស៊ី ទើបបណ្ដាលឱ្យកើតមានជំងឺក្រហមភ្នែកលើមនុស្សចំនួន៩៣ នាក់ នៅភូមិសាស្ត្រភូមិប៉ក់តូច ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។

បើតាមសេចក្ដីប្រកាសព័ត៌មានដែលចេញដោយក្រសួងសុខាភិបាល នាល្ងាចថ្ងៃទី២៦ ខែកញ្ញា ជំងឺភ្នែកក្រហមបណ្តាលមកពីមូលហេតុ៣ប្រភេទធំៗគឺ៖

១. បង្កដោយវីរុស

ជំងឺក្រហមភ្នែកនេះ អាចកើតមានលាយឡំជាមួយនឹងជំងឺផ្តាសាយ ឬជំងឺផ្លូវដង្ហើមផ្សេងទៀត។  ជាធម្មតាចាប់ផ្តើមក្នុងភ្នែកម្ខាង ហើយអាចរាលដាលដល់ភ្នែកម្ខាងទៀតក្នុងរយៈពេលតែប៉ុន្មានថ្ងៃ ហើយមានហូរទឹកចេញពីភ្នែក តែមិនខាប់ទេ។

២. បង្កដោយបាក់តេរី

ជំងឺក្រហមភ្នែក ឬរលាកភ្នែកនេះ​ ភាគច្រើនមានអាចម៍ភ្នែកខ្ទុះ ដែលអាចនាំឱ្យត្របកភ្នែកស្អិតជាប់គ្នា។ ជួនកាលកើតឡើងជាមួយនឹងជំងឺរលាកត្រចៀកផងដែរ។

ក្រសួងសុខាភិបាលបានគូសបញ្ជាក់ថា ជំងឺភ្នែកក្រហមដែលបង្កឡើងដោយវីរុស និងបាក់តេរីមានការឆ្លងលឿនណាស់ ហើយរាលដាលយ៉ាងងាយស្រួលពីមនុស្សម្នាក់ទៅមនុស្សផ្សេងទៀត ប៉ុន្តែអាចកាត់បន្ថយហានិភ័យនៃការកើតជំងឺរលាកភ្នែក ឬការចម្លងទៅអ្នកដទៃដោយអនាម័យល្អ។

៣. បង្កដោយអាឡែស៊ី

ជំងឺប្រភេទនេះអាចអាឡែស៊ី ដោយសារមនុស្សបានប៉ះជាមួយដើមឈើ រុក្ខជាតិ ស្មៅ ធូលីដី ផ្សិត សត្វចិញ្ចឹម ថ្នាំ ឬគ្រឿងសំអាង។ ជាធម្មតាកើតលើភ្នែកទាំងសងខាង អាចបង្កជារមាស់ខ្លាំង ហូរទឹកភ្នែក អាចម៍ភ្នែក និងហើមភ្នែក។វាអាចកើតឡើងជាមួយរោគសញ្ញានៃអាឡែហ្ស៊ីដូចជា រមាស់ច្រមុះ កណ្ដាស់ រមាស់បំពង់កធម្មតាមិនឆ្លងពីមនុស្សម្នាក់ទៅម្នាក់ផ្សេងទៀតទេ។ វាអាចអាឡែស៊ី ដោយសារការប៉ះពាល់ជាមួយទឹកសាប៊ូ រោមភ្នែកជ្រុះចាក់ភ្នែក អាចបង្កើតទឹកភ្នែក និងការបញ្ចេញទឹករំអិល៕

ដោយ៖ ង៉ិល ណារ៉ាត់