កម្មកររោងចក្រ៖ ទោះប្រាក់ឈ្នួលច្រើនប៉ុណ្ណា​ក៏មិនគ្រប់ដែរ បើមិនចេះចាយវាយឱ្យត្រឹមត្រូវ

ប្រាក់ឈ្នួល អប្បបរមាសម្រាប់កម្មករនិយោជិតផ្នែកវាយនភណ្ឌកាត់ដេរផលិតស្បែកជើង និង ផលិតផលិតផល​ធ្វើដំណើរ និងកាបូបសម្រាប់ឆ្នាំ ២០២៤ ទើបត្រូវបានដំឡើងដល់ចំនួន២០៤ ដុល្លារ  ក្នុង ១ខែ ដែលនឹងចាប់​អនុវត្តពីដើមខែ មករា ឆ្នាំ ២០២៤ តទៅ ។

តួលេខនៃការដំឡើងប្រាក់ឈ្នួលថ្មីនេះ ត្រូវបានព្រមព្រៀងគ្នា និងទទួលយកដោយតំណាងភាគីនិយោជក តំណាង​ភាគីនិយោជិត និងភាគីរាជរដ្ឋាភិបាល ជាពិសេសកម្មករដែលកំពុងបំពេញការងារក្នុងវិស័យ​វាយនភណ្ឌ​កាត់ដេរផលិត​ស្បែកជើង និងផលិតផលិតផលធ្វើដំណើរ និង កាបូបក៏សម្តែងនូវក្តីរីករាយចំពោះការដំឡើងប្រាក់ឈ្នួលថ្មីនេះ ខណៈប្រទេសផ្សេងពុំបានដំឡើងប្រាក់ឈ្នួលកម្មករក្នុងវិស័យនេះទេ។ ដូចនេះពួកគាត់នឹងខិតខំប្រឹង​ប្រែងបង្កើន​ប្រសិទ្ធភាព​ការងាររបស់ខ្លួនបន្ថែមទៀតដើម្បីបង្កើនផលិតភាពក្នុងរោងចក្រ។

លោក ហ៊ុន សីហា កំពុងបំពេញការងារក្នុងរោងចក្រកាត់ដេរសំលៀកបំពាក់ សម្តែងការរីករាយ និងទទួលយក​បានចំពោះការដំឡើងប្រាក់ឈ្នួលអប្បបរមាចំនួន២០៤ដុល្លារ សម្រាប់ឆ្នាំ២០២៤។ លោកថា ចំនួនប្រាក់ឈ្នួលនេះ គឺសមរមសម្រាប់ជីវភាពរស់នៅរបស់លោក ព្រោះលោកយល់ថា បើយើងមិនចេះចាត់ចែងចាយវាយ និងសន្សំសំ​ចៃនោះទេ ទោះបីជាប្រាក់ឈ្នួលដំឡើងច្រើនប៉ុណ្ណាក៏មិនគ្រប់ដែរ។

ទន្ទឹមនេះ លោក សីហា អរគុណដល់រាជរដ្ឋាភិបាលកម្ពុជា ក៏ដូចជាតំណាងនយោជក និង តំណាងនយោជិក ដែលសម្រេចបានការដំឡើងប្រាក់ឈ្នួលអប្បបរមាថ្មីនេះ ទោះតិចក្តីច្រើនក្តី ព្រោះលោកមើលឃើញថា ទោះស្ថាន​ភាពសេដ្ឋកិច្ចពិភពលោកមិនសូវល្អ ហើយប្រទេសផ្សេងៗ ដែលមានរោងចក្រវិស័យវាយនភណ្ឌ កាត់ដេរនេះ​ក៏មិនបានដំឡើងប្រាក់ឈ្នួលបន្ថែមថ្មីដល់កម្មករដែរ។ 

លោក ស្នើដល់កម្មករកំពុងបំពេញការងារក្នុងរោងចក្រកាត់ដេរទាំងអស់ គួរតែខិតខំបង្កើនប្រសិទ្ធភាពការងារបន្ថែមទៀត ដើម្បីឲ្យថៅកែរោងចក្រពេញចិត្ត និងបន្តវិនិយោគនៅកម្ពុជា។

ដូចគ្នានេះដែរ លោក មឿង សំអឿន ជាកម្មកររោងចក្រកាត់ដេរសំលៀកបំពាក់ យល់ឃើញថា ទន្ទឹមនឹងរាជរដ្ឋាភិបាល​ប្រឹងប្រែងដំឡើងប្រាក់​ឈ្នួល​ជូនកម្មករជារៀងរាល់ឆ្នាំ ទោះប្រទេសផ្សេងគេមិនបានដំឡើង​ប្រាក់ឈ្នួលសម្រាប់​កម្មករកាត់ដេរទេ ដូចនេះលោកស្នើដល់កម្មកររោងចក្រកាត់ដេរទាំងអស់គួរប្រឹងប្រែងធ្វើការបង្កើនគុណភាពការងារ ដើម្បីការរីកចម្រើនរបស់រោងចក្រ។ ដោយឡែក លោកក៏ស្នើសុំដល់ម្ចាស់ផ្ទះជួល និងបន្ទប់ជួលកុំដំឡើងថ្លៃជួល ដើម្បីសម្រួលដល់ជីវភាពកម្មករផង។

លោក សាំង សុធា កំពុងធ្វើការងារជាកម្មករនៅរោងចក្រកាត់ដេរ ម៉េងដា ប្រាប់ថា លោកសប្បាយចិត្ត និងអរគុណដល់​រាជរដ្ឋាភិបាល ដែលតែងតែគិតគូរដំឡើងប្រាក់ឈ្នួលរៀងរាល់ឆ្នាំ ជាពិសេសធ្វើយ៉ាងណាឲ្យកម្មករ​មានការងារធ្វើ​ដើម្បីផ្គត់ផ្គង់ជីវភាព។ ប៉ុន្តែលោកយល់ឃើញថា នយោជិតត្រូវតែខិតខំប្រឹងប្រែងស្វែងរកដៃគូវិនិយោគ ដើម្បីទិញ​ផលិតផល រីឯកម្មករក៏ត្រូវតែខិតខំបង្កើនប្រសិទ្ធភាពការងារផងដែរ៕