ទូក “ង” មានឈ្មោះបោះ​សំឡេងប្រកួត​មិន​ដែល​ចាញ់​ មាន​សង្ឃឹម​អាច​ចូលរួមប្រកួត​​វិញបាន

មហាជននិងប្រជាពលរដ្ឋរួមនិងមន្ត្រីរាជការមួយចំនួនផង មានការសោកស្តាយនិងខ្វាយខ្វល់ក្រោយពីបានឮដំណឹង​ថា​ទូក “ង” ដ៏ល្បីល្បាញឈ្មោះ (នរិន្ទរង្សីពិជ័យចិត្របុត្រ) នៅស្រុក​ឯកភ្នំ ខេត្តបាត់ដំបង បានជួបគ្រោះថ្នាក់កាលពីយប់ថ្ងៃទី០២ ខែតុលា ឆ្នាំ២០២៣ ខណះមានភ្លៀងធ្លាក់​មួយ​មេ​លាយឡំខ្យល់កន្ត្រាក់បានបក់បោកបង្កឲ្យដើមពង្រ ១ ដើមរលំសង្កត់។

ដោយសាតែហេតុការខាងលើនេះ បានបង្កឲ្យពុទ្ធបរិស័ទ្ធជាច្រើន រួមទាំងមហាជន និងមន្ត្រីរាជការមួយចំនួនផងកើតក្តីខ្វល់ខ្វាយ និងសោកស្តាយគ្រប់ៗគ្នាថា​នឹងខកខានក្នុងការចូលរួមប្រណាំងជាប្រពៃណីក្នុងរដូវកាលឆ្នាំនេះ ដែលជិតចូលមកដល់ក្នុងពេលដ៏ខ្លីខាងមុខនេះ។ ប៉ុន្តែពេលនេះ(នរិន្ទរង្សីពិជ័យចិត្របុត្រ) មិនឲ្យមហាជនអស់សង្ឃឹមឡើយ។ នេះបើយោងតាមព្រះចៅអធិការវត្តឯករង្សី​ក្នុងស្រុកឯកភ្នំ។

លោកតា ចម ចិត្រ ព្រះចៅអធិការវត្តឯករង្សី​​មានសង្ឃដីកាថា «ក្រោយពីកាត់មែកពង្រ និងដើមគគីដែលរលំសង្កត់ទូកឃើញថា ឥតមានប្រេះស្រាំបាក់បែកទេអាចអុំបាន។ សូមអរព្រះគុណតេជគុណ អរគុណបងប្អូនឆ្ងាយជិតបានសួរសុខទុក្ខនិងសោកស្តាយ ជួយខ្វល់តែរោងដែកមួយខ្នងត្រូវវៀចខ្ទេចប្រើមិនកើត»។

ក្រោយពីបានដំណឹងនេះ ប្រជាពុទ្ធបរិស័ទ្ធនិងមហាជនសម្តែងការត្រេងអរដោយពួកគាត់បាននិយាយថា «ប្រណាំងទូក ក្នុងឆ្នាំនេះនឹងមកផ្តល់កម្លាំងចិត្តដល់កីឡាករទូកខ្នាតអន្តរជាតិដ៏ខ្លាំងក្លាមួយនេះឲ្យបានកុះករក្នុងពិធីបុណ្យ អកអំបុក បណ្ដែតប្រទីប សំពះព្រះខែ ដែលប្រារព្វធ្វើឡើងនៅចុងខែតុលា ខាងមុខនេះ»។

ទូក​នរិន្ទរង្សីពិជ័យចិត្របុត្រ ជាទូក​ប្រណាំង​​ដែលមានឈ្មោះបោះសំឡេង​ប្រចាំនៅវត្តឯករង្សីក្នុងស្រុកឯកភ្នំខេត្តបាត់ដំបង។ ទូកដ៏ល្បីប្រកួត​មិន​ដែលចាញ់​នេះ មានប្រវែង ៣៤ម៉ែត្រ និង មានចំណុះកីឡាករ ៧៥ នាក់ ហើយ​ការចូលរួមប្រកួតរាល់រដូវកាលមិនដែលខកខានឡើយនិងទទួលបានជ័យលាភីគ្រប់រដូវកាល​៕

អត្ថបទ៖ សៅ សារិទ្ធ