ដំណាំ​ពោត​ធ្លាក់ថ្លៃ កសិករអះអាង​ថាមកពី​ឈ្មួញទម្លាក់តម្លៃ

តម្លៃ​ពោតនៅវគ្គប្រមូលផលទី ២ ឬគេហៅថាផលចុងដៃ បានធ្លាក់ថ្លៃ​យ៉ាងគំហុក​ដែលធ្វើឲ្យកសិករ​នៅ​ស្រុក​ចំនួនពីរក្នុងខេត្ត​បាត់ដំបង​ មិន​ទទួលផលចំណេញដែល​ធ្វើ​ឲ្យ​ប៉ះពាល់​ដល់​​​ជីវភាពគ្រួសារ។

ប្រជាកសិករក្នុងស្រុកចំនួន ២ គឺស្រុកសំឡូតនិងស្រុកភ្នំព្រឹកក្នុង​ខេត្តបាត់ដំបងបាន​អះអាង​ថា ក្រុមឈ្មួញបានដើរ​ទិញ​ទម្លាក់​​តម្លៃក្នុងការប្រមូលផលពោត​ចុងដៃ អំឡុងពេលដាំជាលើកទី ២ នៃដំណាំពោតក្នុង ១ ឆ្នាំ។

កសិករ​បាន​បញ្ជាក់ថា ក្នុងអំឡុងខែ ៩ កន្លងទៅ ការ​ប្រមូលផលលើកទី ១ (ដើមដៃ) លក់ក្នុង ១ គីឡូគ្រាប់ពោត​បាន ៦,៨ បាតប្រាក់ថៃ ដែលអាច​ពួកគាត់បានដោះបំណុលប្រាក់កម្ចីបានជាបណ្តើរៗនិង​រង់ចាំសងបញ្ចប់នៅក្នុងខែ ​១១​ ដែលជាការប្រមូលផលលើកទី២ (ចុងដៃ) តែពួកគាត់ខកចិត្តយ៉ាងខ្លាំងចំពោះការធ្លាក់​ថ្លៃនេះ។

ជុំវិញករណីខាងលើនេះ លោក ហេង សិទ្ធ មន្ត្រីនៃមន្ទីរកសិកម្មខេត្តបានឲ្យដឹងថា បញ្ហាពោតធ្លាក់ថ្លៃនៅត្រឹម ៤,៤ បាត ក្នុង១ គីឡូក្រាមនេះ បើតាមពិតទៅវាមិនមែនខាងភាគីថៃឬខ្មែរមកទម្លាក់នោះទេគឺជាការប្រែប្រួលជាក់ស្តែង ខណះដែលប្រទេស មីយ៉ាម៉ា និង ប្រទេសឥណ្ឌា ដែលជាប្រទេសដៃនៃ CP គ្រុបជាមួយប្រទេសថៃ គេទិញក្នុងតម្លៃទាបជាងខ្មែរ ស្របពេលការរកស៊ីគេត្រូវការចំណេញក្បាលកាក់ផង​នោះ។

លោកថា ដៃ CP គ្រុបជុំវិញប្រទេសថៃ គឺមានសាខារហូតដល់ទៅ ១០៦០ សាខាឯណោះ ហើយបើនៅខ្មែរបានតម្លៃ​៤,៤ បាត គឺប្រទសថៃលក់បន្តបាន ៦,៨ បាត ហើយបើខ្មែរលក់បាន ៦,៨ បាត គឺថៃគេលក់បានចន្លោពី ៩,៨ ឬ ១០បាត ក្នុង ១ គីឡូ នេះហើយជាការចំណេញក្បាលកាក់តគ្នា។ ខណះប្រទេស ឥណ្ឌា និង មីយ៉ាម៉ា លក់ក្នុងតម្លៃក្រោម ៤,៤ បាត គេផ្តោតទៅលើគុណភាពពូជគ្រាប់ពោតផងដែរ ខណះកសិករយើងខ្លះមិនទាន់ស្គាល់ពូជគ្រាប់ពោតណាដែល​ទិញមក​ពី​ថៃ​មកដាំមានតម្លៃថ្លៃ ហើយប្រមូលផលថៃមិនទិញចូល បើទិញគឺក្នុងតម្លៃថោកបំផុត។

លោកបន្តថា មិនមែនមន្ត្រីមិនគិតគូរទេ កន្លងមកមានមន្ត្រីទៅចរចារជាមួយភាគីថៃជាបន្តបន្ទាប់ តែភាគីថៃគេថាបើ​យក​ពោត​ចូល ដំឡូងមីគេមិនទទួលទិញទេ បើឲ្យជួយយកដំឡូងមីគេមិនទទួលពោតទេ គេយកទៅតាមកម្រិតរបស់គេ បើទោះបីមន្ត្រីកម្ពុជាខំទទូចយ៉ាងណាក៏មិនបានផលដែរ៕

អត្ថបទ៖ សៅ សារិទ្ធ