នគរបាលជាន់ខ្ពស់២រូបទៀត ត្រូវបានតែងតាំងជាអគ្គស្នងការរងនគរបាលជាតិ

ប្រមុខរាជរដ្ឋាភិបាលកម្ពុជា សម្រេចតែងតាំងអគ្គស្នងការរងនគរបាលជាតិចំនួន២រូបបន្ថែមទៀត ដែលការតែងតាំងនេះ បាននាំឱ្យតំណែងអគ្គស្នងការរងនគរបាលជាតិសរុបកើនដល់២០រូប។ នេះបើតាមអនុក្រឹត្យរបស់សម្ដេចធិបតី ចុះថ្ងៃទី ១៥ ខែវិច្ឆិកា ឆ្នាំ២០២៣ តែទើបផ្សព្វផ្សាយជាសាធារណៈនៅព្រឹកថ្ងៃទី២២ ខែវិច្ឆិកានេះ។

មាត្រា១ នៃអនុក្រឹត្យនេះ បានសម្រេចផ្ទេរ និងតែងតាំងនាយនគរបាលជាតិជាន់ខ្ពស់ ក្រសួងមហាផ្ទៃចំនួន២រូប គឺលោកឧត្តមសេនីយ៍ឯក តាន់ សំណាង និងលោកឧត្តមសេនីយ៍ទោ ហែម សុវត្ថិ ជាអគ្គស្នងការរងនគរបាលជាតិ។ មុនទទួលបានការតែងតាំងនេះ ឧត្តមសេនីយ៍ទោ ហែម សុវត្ថិ មានតួនាទីជាអគ្គនាយករងនៃអគ្គនាយកដ្ឋានសវនកម្មផ្ទៃក្នុង។

ជាមួយគ្នានេះ នាយនគរបាលជាតិចំនួន២រូបទៀត ក៏ត្រូវបានសម្ដេចធិបតី តែងតាំងមុខតំណែងជាអនុប្រធានសេនាធិការដ្ឋាន នោះគឺលោកឧត្តមសេនីយ៍ទោ លឹម ដាវុធ និងលោកឧត្តមសេនីយ៍ត្រី កុយ រ៉ា។

គួរជម្រាបថា កាលពីថ្ងៃទី១០ ខែវិច្ឆិកា ឆ្នាំ២០២៣ កន្លងទៅ លោកនាយឧត្តមសេនីយ៍ ស ថេត អគ្គស្នងការនគរបាលជាតិ ទើបបានអញ្ជើញប្រកាសចូលកាន់មុខតំណែង និងបំពាក់ឋានន្តរស័ក្តិដល់អគ្គស្នងការរងនគរបាលជាតិចំនួន៤រូប គឺរួមមាន៖ ឧត្តមសេនីយ៍ឯក ជួន ណារិន្ទ ឧត្តមសេនីយ៍ ព្រុំ សន្ធរ ឧត្តមសេនីយ៍ឯក សុង លី និងឧត្តមសេនីយ៍ឯក ចេវ ហាក់។ បើគិតមកដល់ពេលនេះ តំណែងជាអគ្គស្នងការរងនគរបាលជាតិមានចំនួនសរុប ២០រូបហើយ៕