គយ ៖ ១១ខែ ពាណិជ្ជកម្មកម្ពុជា-អន្តរជាតិ មានទំហំជាង ៤២ពាន់លានដុល្លារ ថយចុះជាង ២ភាគរយ

ការដោះដូរទំនិញរវាងកម្ពុជា និងទីផ្សារអន្តរជាតិ សម្រេចបានប្រមាណជាង ៤២ពាន់លានដុល្លារ រយៈពេល ១១ខែ ឆ្នាំ ២០២៣នេះ ពោលគឺមានការធ្លាក់ចុះជាង ២.៣ ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ គឺមាន​ចំនួនជាង ៤៣ពាន់លានដុល្លារ។ នេះបើយោងតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា។

ប្រភពដដែល បានបង្ហាញថា ចាប់ពីខែ មករា-វិច្ឆិកា ឆ្នាំ ២០២៣ ការនាំចេញរបស់កម្ពុជា មានទំហំទឹកប្រាក់ជាង ២០.៤ ពាន់លានដុល្លារ កើនឡើង ១.២ភាគរយ និងនាំចូលមកវិញ គិតជាទឹកប្រាក់ជាង ២២ពាន់លានដុល្លារ ធ្លាក់ចុះ ៥.៤​ភាគរយ បើធៀបនឹងឆ្នាំ ២០២២។

អគ្គនាយកដ្ឋានគយ បានបង្ហាញឱ្យដឹងទៀតថា ចិន នៅតែមានទំហំពាណិជ្ជកម្មជាមួយកម្ពុជាច្រើនជាងគេ មានទំហំ​ជាង ១១ពាន់លានដុល្លារ រយៈពេល ១១ខែមកនេះ កើនឡើង ៤.៧ភាគរយ។ ចំណែកអាមេរិក ស្ថិតនៅលេខរៀងទីពីរ ដែលមានទំហំ​ពាណិជ្ជកម្មជាមួយកម្ពុជា ប្រមាណជាង ៨,៣ពាន់លានដុល្លារ, វៀតណាម នៅលេខរៀងទី៣ មានទំហំ ៥,៨ពាន់លានដុល្លារ បន្ទាប់មកថៃ ៣,៣ពាន់លានដុល្លារ  ជប៉ុន ១,៦៣ពាន់ដុល្លារ ឥណ្ឌូណេស៊ី ៩៦៥លានដុល្លារ និងប្រទេសផ្សេងៗមួយចំនួនទៀត។

សម្រាប់ទំនិញសំខាន់ៗ ដែលកម្ពុជា នាំចេញរួមមាន៖ សម្លៀកបំពាក់ ស្រូវ អង្ករ ស្វាយចន្ទី  កៅស៊ូ កង់ ម៉ាស៊ីន ឧបករណ៍អគ្គិសនី គុជខ្យងធម្មជាតិ ឬចិញ្ចឹម ត្បូងថ្ម ស្បែកជើង ស្រោមជើង និងទំនិញផ្សេងៗដទៃទៀត។

អ្នកជំនាញសេដ្ឋកិច្ចមើលឃើញថា វិបត្តិសកលដែលកំពុងកើតឡើង មានដូចជា សង្គ្រាមរុស្ស៊ី អ៊ុយក្រែង, សង្រ្គាមអ៊ី​ស្រាអែល និងហាម៉ាស់ វិបត្តិសេដ្ឋកិច្ចនៅលើពិភពលោក នឹងធ្វើឱ្យប៉ះពាល់ដល់ការដោះដូរទំនិញរវាងប្រទេស និង​ប្រទេស។

លោក បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ធ្លាប់បានប្រាប់កម្ពុជាថ្មីថា ការនាំចេញ​ទំនិញកម្ពុជា ទៅទីផ្សារអន្តរជាតិ នៅតែបន្តធ្លាក់ចុះក្នុងឆមាសទី២។ លោកបានគូសបញ្ជាក់ថា ការនាំចេញរបស់កម្ពុជា មិនអាចមានកំណើនទេ ខណៈដែលវិបត្តិសកលនៅតែបន្តកើតមាន, មានន័យថា សេដ្ឋកិច្ច Slow Down។

បើតាមលោកបណ្ឌិ គី សេរីវឌ្ឍន៍ បច្ចុប្បន្នកម្ពុជា មានការប្រកួតប្រជែងជាមួយប្រទេសអ្នកផលិតជាច្រើនទៀត នៅលើសកលលោក ដែលផលិតនាំចេញ​ទៅកាន់ទីផ្សារដូចគ្នា។ ដើម្បីឱ្យមានកំណើននៃការនាំចេញទំនិញ​ទៅកាន់ទីផ្សារអន្តរជាតិឡើងវិញ លោក​បណ្ឌិត បានលើកជាយោបល់ថា កម្ពុជាត្រូវតែព្យាយាម​កាត់បន្ថយ​ថ្លៃដើមឱ្យទាបជាងមុន បន្ធូរបន្ថយពន្ធ ឬលក្ខខណ្ឌណាមួយ ជួយសម្រួលដល់ផលិតកម្ម ដើម្បីជំរុញ​ការនាំចេញឱ្យបានកាន់តែច្រើន។

ទន្ទឹមនឹងនេះ លោកមើលឃើញថា កិច្ចព្រមព្រៀងពាណិជ្ជកម្មសេរីទ្វេភាគី ពិតជាមានសារសំខាន់ណាស់។ ប្រសិនបើកម្ពុជា បង្កើនកិច្ចព្រមព្រៀងជាមួយបណ្តាប្រទេសផ្សេងៗទៀត ក៏អាចរួមចំណែកជួយ​ជំរុញ​ការនាំ​ចេញទំនិញរបស់កម្ពុជា កាន់តែច្រើនផងដែរ។

​សូមបញ្ជាក់ថា នៅក្នុង​ឆ្នាំ​ ២០២២ ទំហំពាណិជ្ជកម្មរវាងកម្ពុជា និងអន្តរជាតិ មាន​ចំនួន​សរុប​ជាង ៥២,៤​ ពាន់​លាន​ដុល្លារ កើនឡើង ៩.២​ ភាគរយ​បើ​ធៀប​ទៅនឹង​ឆ្នាំ​២០២១ ដែលមាន​ចំនួន​ជាង ៤៨​ ពាន់​លាន​ដុល្លារ​។ ទឹកប្រាក់​ដែល​កម្ពុជា​ប្រមូលបាន​ពី​ការនាំ​ទំនិញ​ទៅ​ទីផ្សារ​អន្តរជាតិ មាន​ជាង ២២,៤​ ពាន់​លាន​ដុល្លារ កើន​ឡើង ១៦.៤ ភាគរយ និង​ទំនិញ​ដែល​កម្ពុជា​នាំចូល​ពី​ទីផ្សារ​អន្តរជាតិមាន​ជិត ៣០ ​ពាន់​លាន​ដុល្លារ កើនឡើង ៤.៣ ​ភាគរយ​។ នេះ​បើតាម​អគ្គនាយកដ្ឋាន​គយ និង​រដ្ឋាករ​កម្ពុជា​៕