សេដ្ឋកិច្ច

កម្ពុជានាំចេញទៅកាណាដាជាង ១១៦ លានដុល្លារ នៅខែមករា

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

ការនាំចេញទំនិញរបស់កម្ពុជាទៅប្រទេសកាណាដា សម្រេចបាននូវទំហំទឹកប្រាក់ជាង ១១៦ លានដុល្លារ នៅក្នុងខែមករា ឆ្នាំ ២០២៦ កើនឡើង ៦,៥% ធៀបនឹងរយៈពេលដូចគ្នានៅឆ្នាំ ២០២៥ ឆ្លុះបញ្ចាំងពីការរក្សាបាននូវទីផ្សារសំខាន់ៗរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងខែមករា ឆ្នាំ ២០២៦ ទំហំពាណិជ្ជកម្មទ្វេភាគីកម្ពុជា-កាណាដា សម្រេចបានជាង ១១៨ លានដុល្លារ កើនឡើង ៧,៦% ក្នុងនោះកម្ពុជានាំចេញទៅកាណាដាមានតម្លៃ ១១៦ លានដុល្លារ កើនឡើង ៦,៥% ចំណែកកាណាដានាំចូលមកវិញមានតម្លៃ ជាង ២ លានដុល្លារកើន ១៥៥%។

រដ្ឋាភិបាលកាណាដាបានផ្តល់ប្រព្រឹត្តកម្មអនុគ្រោះពាណិជ្ជកម្មដល់បណ្តាប្រទេសមានការអភិវឌ្ឍតិចតួច រួមទាំងកម្ពុជាផងដែរ ដែលការណ៍នេះបានចូលរួមចំណែកបង្កើនការនាំចេញរបស់កម្ពុជាទៅកាណាដា ធ្វើឱ្យកាណាដាក្លាយជាទីផ្សារធំទី៦ របស់កម្ពុជា។

លោក លឹម វិសាល អគ្គលេខាធិការរងគណៈកម្មាធិការវិនិយោគកម្ពុជា មានប្រសាសន៍កាលពីពេលថ្មីៗនេះថា បច្ចុប្បន្នមានក្រុមហ៊ុនកាណាដាមួយចំនួនបានទទួលជោគជ័យនៅកម្ពុជា ដូចជាធនាគារ National Bank of Canada ដែលជាម្ចាស់ភាគហ៊ុនរបស់ធនាគារ ABA និងក្រុមហ៊ុនធានារ៉ាប់រង Manulife ជាដើម។

រាជរដ្ឋាភិបាលកម្ពុជា ប្ដេជ្ញាជំរុញបញ្ចប់ការចរចាកិច្ចព្រមព្រៀងពាណិជ្ជកម្មសេរីអាស៊ាន-កាណាដាឱ្យបានឆាប់ ដើម្បីលើកកម្ពស់ការដោះដូរពាណិជ្ជកម្ម។

លោក ប៉ែន សុវិជាតិ រដ្ឋលេខាធិការ ក្រសួងពាណិជ្ជកម្ម មានប្រសាសន៍ថា កម្ពុជានៅតែរក្សាបានទីផ្សារសំខាន់ៗរបស់ខ្លួន ដែលជាទីផ្សារពិភពលោក ធានារនូវការផ្គត់ផ្គង់ បង្កើតសក្ដានុភាពកម្ពុជា ក្នុងខ្សែច្រវាក់តម្លៃ និងខ្សែច្រវាក់ផ្គត់ផ្គង់ និងរក្សាបាននូវជំនឿចិត្តពីអ្នកបញ្ជាទិញ។

ទំនិញដែលកម្ពុជានាំចេញទៅកាណាដា មានផលិតផលសម្លៀកបំពាក់ ស្បែកជើង សម្ភារធ្វើដំណើរ កង់ និងគ្រឿងបង្គុំអេឡិចត្រូនិក អគ្គិសនី ចំណែកទំនិញកាណាដា នាំចូលមកវិញរួមមាន គ្រឿងអេឡិចត្រូនិក និងរថយន្តជាដើម។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មកម្ពុជា-កាណាដា សម្រេចបាន ១,៣ ពាន់លានដុល្លារ កើនជិត ១៤% ក្នុងនោះកម្ពុជានាំចេញ ១,២ ពាន់លានដុល្លារ កើនឡើង ១៤,៥៨% ចំណែកឯកាណាដានាំចូលមកវិញមានតម្លៃ ៦៣ លានដុល្លារ កើន ៣%៕

អត្ថបទ៖ ឡេង ដេត