សម្តេច ហ៊ុន ម៉ាណែត៖ កម្ពុជា គ្មានតម្រូវការឱ្យក្រុមហ៊ុនបរទេស​វិនិយោគបើកក្រុមហ៊ុនតាក់ស៊ី​អគ្គិសនីទេ

សម្តេចនាយករដ្ឋមន្រ្តីកម្ពុជា បានអះអាងថា កម្ពុជា មិនទាន់មានតម្រូវការឱ្យក្រុមហ៊ុនបរទេសមកធ្វើការវិនិយោគ​បើកក្រុមហ៊ុន​តាក់ស៊ីអគ្គិសនីនៅកម្ពុជានោះទេ។ សម្តេចសង្កត់ធ្ងន់ថា មកដល់ម៉ោងនេះ គោលដៅរបស់រដ្ឋាភិបាល​អាណត្តិទី៧ គឺត្រូវតែយកចិត្តទុកដាក់ក្នុងការជួយពលរដ្ឋប្រកបរបររត់ម៉ូតូឌុប ម៉ូតូកង់បី នៅក្រៅប្រព័ន្ធឱ្យបានល្អ។ ការលើកឡើងរបស់សម្តេចនេះ ធ្វើឡើងនៅក្នុងជំនួបសំណេះសំណាលជាមួយប្រជាពលរដ្ឋខ្មែររស់នៅប្រទេសជប៉ុន នារសៀលថ្ងៃទី១៦ ធ្នូ ២០២៣។

សម្តេចបានបញ្ជាក់យ៉ាងច្បាស់ទៅកាន់ពលរដ្ឋដែលប្រកបរបររត់ម៉ូតូឌុប និងម៉ូតូកង់បី នៅកម្ពុជាដូច្នេះថា សូមកុំព្រួយបារម្ភពុំមានការអនុញ្ញាតឱ្យបើកក្រុមហ៊ុនតាក់ស៊ីអគ្គិសនីនោះទេ។ ផ្ទុយទៅវិញ សម្តេចបានឱ្យដឹងថា រាជរដ្ឋាភិបាល បានរៀបចំគោលនយោបាយជាបន្តបន្ទាប់ ដើម្បីធ្វើយ៉ាងណាជួយដល់ពលរដ្ឋរស់នៅ និងប្រកបការងារក្នុងសេដ្ឋកិច្ចក្រៅប្រព័ន្ធ នៅក្នុងអាណត្តិទី៧នេះ។

សូមរម្លឹកថា អំឡុងពេលទស្សនកិច្ចនៅប្រទេសវៀតណាម កាលពីពេលថ្មីៗនេះ សម្ដេចធិបតីបានអនុញ្ញាតឱ្យក្រុម​ហ៊ុនតាក់ស៊ី Ving Group ចូលជួបសំណេះសំណាល និងពិភាក្សាការងារ។

នៅក្នុងជំនួបនោះ ក្រុមហ៊ុន បានលើកសំណើចង់បណ្ដាក់ទុនវិនិយោគ រថយន្តតាក់ស៊ី ចំនួន ២៥០០គ្រឿងនៅកម្ពុជា តែរាជរដ្ឋាភិបាលមិនបានអនុញ្ញាតនោះទេ។ ក្រោយពីលេចលឺព័ត៌មាននៅលើបណ្តាញសារព័ត៌មាន ប្រជាពលរដ្ឋជា​ពិសេសអ្នកប្រករបរសេដ្ឋកិច្ចក្រៅប្រព័ន្ធ មានដូចជា រត់ម៉ូតូឌុប និងម៉ូតូកង់បីជាដើម មានការព្រួយបារម្ភ។

ជុំវិញបញ្ហានេះ អ្នកនាំពាក្យរាជរដ្ឋាភិបាល បានចេញសេចក្តីថ្លែងការណ៍ ដោយបានលើកឡើងថា ព័ត៌មាននេះ​បានធ្វើឱ្យមានការចាប់អារម្មណ៍ និងសាធារណជនមួយចំនួនយល់ច្រឡំថា ក្រុមហ៊ុននេះ នឹងមកបើកអាជីវកម្ម​នៅកម្ពុជាក្នុងឆ្នាំ ២០២៤។ អ្នកនាំពាក្យរាជរដ្ឋាភិបាល បានបញ្ជាក់ថា នៅក្នុងជំនួបពិភាក្សាជាមួយសម្តេច​ធិបតីកាលពីរសៀលថ្ងៃទី ១២ ធ្នូ ឆ្នាំ ២០២៣ នៅរដ្ឋធានីហាណូយ ប្រធានក្រុមហ៊ុន Vingroup ពិតជាបានលើក​សំណើ និងបានបង្ហាញបំណងចង់មកវិនិយោគ បើកក្រុមហ៊ុនតាក់ស៊ី ដោយប្រើរថយន្តអគ្គិសនី​នៅកម្ពុជាពិតមែន ។ ប៉ុន្តែសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មិនបានផ្តល់គោលការណ៍ អនុញ្ញាតតាមសំណើរបស់ក្រុមហ៊ុននោះទេ៕