គ្រួសារមហាសេដ្ឋីវៀតណាមបើកក្រុមហ៊ុនផលិតបច្ចេកវិទ្យាអវកាស រួមទាំងយន្តហោះ

មហាសេដ្ឋី​ដែលមានបំផុត​នៅប្រទេស​វៀតណាម លោក Pham Nhat Vuong និងកូនប្រុស ២ នាក់របស់លោក​ បានបង្កើតក្រុមហ៊ុន Vinspace ដែលផ្តោតលើការស្រាវជ្រាវវិទ្យាសាស្ត្រ និងការអភិវឌ្ឍបច្ចេកវិទ្យា។ នេះបើតាមការចុះផ្សាយរបស់កាសែត Tuoi Tre។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីនេះ Vinspace ក៏នឹង​រាប់បញ្ចូលទាំងបច្ចេកវិទ្យាអវកាស រួមទាំងការដឹកជញ្ជូនទំនិញតាមផ្លូវអាកាស ការផលិតយន្តហោះ និងយានអវកាស និងទូរគមនាគមន៍ផ្កាយរណប។

យោងតាមការិយាល័យចុះបញ្ជីអាជីវកម្មក្រុង​ហាណូយ ក្រុមហ៊ុន​ Vinspace ត្រូវបានបង្កើតឡើងជាផ្លូវការនៅថ្ងៃទី ៣ ខែវិច្ឆិកា នៅក្នុងតំបន់ Vinhomes Riverside នៃសង្កាត់ Phuc Loi។

ក្រុមហ៊ុននេះមានដើមទុនចុះបញ្ជីចំនួន៣០០ ប៊ីលានដុង (១១,៤ លានដុល្លារអាមេរិក)។ Vingroup ដែលជាក្រុមហ៊ុនធំរបស់លោក Pham Nhat Vuong រួមចំណែក ១៩% ឬស្មើនឹង ៥៧ ប៊ីលានដុង (២,២ ​លានដុល្លារអាមេរិក) ខណៈ​លោក Pham Nhat Vuong កាន់កាប់ភាគហ៊ុនធំជាងគេ ៧១%។ កូនប្រុស២នាក់របស់លោក ២ នាក់ទៀត កាន់កាប់ ៥%រៀងៗខ្លួន។ ​

ពាក់ព័ន្ធនឹង​ផលិតកម្មយន្តហោះ ឬបច្ចេកវិទ្យាអវកាសយ៉ាងណានោះ គេមិនទាន់ឃើញមាន​សេចក្ដីរាយការណ៍ណាមួយ​ស្ដីពីផលិតកម្ម ការរចនាបច្ចេកវិទ្យា និងពេលវេលាចាប់ផ្ដើមផលិតនៅឡើយទេ៕