ក្រសួងពាណិជ្ជកម្ម ចាត់វិធានការក្រុមហ៊ុននៅអាមេរិក យករូបប្រាសាទខ្មែរប្រើ​លើសំបកវេចខ្ចប់ខុសច្បាប់

ក្រសួងពាណិជ្ជកម្ម បាននិងកំពុងសហការជាមួយក្រសួង និងស្ថាប័នមានសមត្ថកិច្ច ដើម្បីមានវិធានការផ្លូវ​ច្បាប់លើ​ការប្រព្រឹត្តល្មើស ដោយក្រុមហ៊ុន SENG CHEANG MONG FOOD CORP ប្រើប្រាស់ស្លាកសញ្ញា​ប្រាសាទបាយ័នលើសំបកវេចខ្ចប់សរសៃបាញ់កាញ់ក្រៀម ដាក់លក់លើ​ទីផ្សារ​ផ្ទាល់ និងទីផ្សារអនឡាញ​ក្នុងរដ្ឋកាលីហ្វ័រញ៉ា និងរដ្ឋផ្លរីដារនៃសហរដ្ឋអាមេរិក និងក្រុមហ៊ុនដទៃទៀតផងដែរ។

ក្រសួងពាណិជ្ជកម្ម បានគូសបញ្ជាក់ថា ក្នុងរយៈពេលកន្លងមក (ឆ្នាំ២០២០ និង២០២១) ក្រសួងពាណិជ្ជកម្ម បានសហការជាមួយស្ថានទូតនៃព្រះរាជាណាចក្រកម្ពុជាទប់ស្កាត់ និងដោះស្រាយដោយជោគជ័យ​នូវករណីបន្លំប្រើ​ប្រាស់សញ្ញាជាតិ រូបទង់ជាតិ និងនិមិត្តរូបជាតិនានា ដាក់នៅលើផលិតផលដែលតាំង​លក់នៅលើទីផ្សារអន្តរជាតិ ដោយក្រុមហ៊ុន និងបុគ្គលមួយចំនួន បានធ្វើខុសទៅនឹងច្បាប់ជាតិ និងសន្ធិសញ្ញាអន្តរជាតិ។

តាមរយៈវិធានការដែលបានអនុវត្តនៅក្នុងឆ្នាំ២០២០ និង ២០២១ ក្រសួងពាណិជ្ជកម្ម, ក្រសួងការបរទេស និងសហប្រតិបត្តិការអន្តរជាតិ និងស្ថានឯកអគ្គរាជទូតនៃព្រះរាជាណាចក្រកម្ពុជា, បានទាក់ទងជាផ្លូវការ​ទៅប្រទេសម្ចាស់ដើមនៃទំនិញទាំងនោះ រួមជាមួយ ប្រទេសដែលទំនិញខុសច្បាប់កំពុងធ្វើចរាចរ ដើម្បីស្នើសុំការ​ផ្តល់កិច្ចសហការ និងធ្វើ អន្តរាគមន៍ហាមឃាត់នូវការដាក់ស្លាកសញ្ញា និងការធ្វើចរាចរទំនិញ​ខុសច្បាប់ទាំងនោះ។

ទន្ទឹមនោះដែរ, តាមរយៈអនុព័ន្ធពាណិជ្ជកម្មប្រចាំនៅក្រៅប្រទេស, ក្រសួងពាណិជ្ជកម្មក៏បានចេញលិខិតណែនាំ និងហាម ឃាត់ផ្ទាល់ទៅក្រុមហ៊ុននិងហាងលក់ទំនិញទាំងនោះ ឱ្យដកចេញនូវរូបសញ្ញាខុសច្បាប់ចេញពី​ផលិតផល​របស់ខ្លួន ហើយហាមឃាត់មិនឱ្យបន្តប្រើប្រាស់សញ្ញាជាតិ រូបទង់ជាតិ និងនិមិត្តរូបជាតិកម្ពុជា នៅលើសំបក​វេចខ្ចប់​នៃផលិតផលឡើយ។

ដោយឡែក នៅពេលថ្មីៗនេះ ក្រសួងបានសង្កេតឃើញថា នៅមានការប្រើប្រាស់ស្លាកសញ្ញាពាណិជ្ជកម្ម លើសំបកវេច​ខ្ចប់ផលិតផល ជារូបភាព ប្រាសាទបាយ័ន និងប្រាសាទអង្គរវត្ត នៅលើសំបកវេចខ្ចប់ផលិតផល សរសៃគុយទាវបាញ់​កាញ់ក្រៀម និងមុខទំនិញខ្លះទៀត ដែលបានដាក់លក់លើទីផ្សារនានា តាមហាងលក់ទំនិញ និងតាមទីផ្សារអនឡាញ នៅរដ្ឋកាលីហ្វ័រញ៉ា និងនៅរដ្ឋដទៃទៀត ក្នុងសហរដ្ឋអាម៉េរិក ដោយពុំមានការអនុញ្ញាតពីអាជ្ញាធរ​មានសមត្ថកិច្ចរបស់ព្រះ​រាជាណាចក្រកម្ពុជា។

បើតាមប្រកាសរបស់ក្រសួងពាណិជ្ជកម្ម កាលពីថ្ងៃទី ២០ ធ្នូ បានបញ្ជាក់ថា ក្រសួង បានណែនាំដល់អនុព័ន្ធពាណិជ្ជកម្ម និងតំណាងសភាពាណិជ្ជកម្មនៅក្រៅប្រទេស បន្តការស្រាវជ្រាវ ហើយផ្តល់ព័ត៌មានមកក្រសួងពាណិជ្ជកម្ម ដើម្បីចាត់​វិធាន​ការតាមនីតិវិធីច្បាប់៕