ព័ត៌មានជាតិ

បង្កងធម្មជាតិខេត្តតាកែវលក់ចេញបានខ្ពស់ដល់ ៥០ ដុល្លារ ខណៈទិន្នផលឆ្នាំនេះកើនមួយជាពីរ

បានផុស

២ years មុន

នៅ

ថ្ងៃព្រហស្បតិ៍ ៤ មករា ២០២៤

ដោយ

តាមការបញ្ជាក់ពីប្រធានសមាគមអ្នកចិញ្ចឹមបង្កងខេត្តតាកែវ លោក ស៉ាប់ សារុន បានឲ្យដឹងថា រយៈពេល ៣ ខែនៃការប្រមូលផលបង្កងបឹងធម្មជាតិរបស់ខេត្តតាកែវមានការកើនឡើងជាងឆ្នាំមុន ទទួលបានផលចន្លោះពី ១ តោន ដល់ ២តោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃទី០៣ ខែមករា ឆ្នាំ២០២៤ នេះ លោក ស៉ាប់ សារុន បានឲ្យ «កម្ពុជាថ្មី» ដឹងថា រដូវកាលប្រមូលផលបង្កងធម្មជាតិនៅក្នុងឆ្នាំនេះរាប់ចាប់ពីខែតុលា ដល់ដើមខែមករា គឺអាចប្រមូលផលបានសរុបចន្លោះពី ១ តោន ទៅ ២ តោន នៅទូទាំងខេត្តតាកែវ។ ជាក់ស្ដែងកាលពីឆ្នាំមុនគិតត្រឹមរយៈពេលដូចគ្នា ការប្រមូលផលទទួលបានត្រឹមជាង ១តោនប៉ុណ្ណោះ។

ជុំវិញបរិមាណផលបង្កងមានការកើនឡើងជាងឆ្នាំមុន លោក ស៉ាប់ សារុន បានគូសបញ្ជាក់ថា ដោយសារអាកាសធាតុអំណោយផល ដោយឆ្នាំមុនអាចទទួលបានត្រឹមតែជាង ១ តោនប៉ុណ្ណោះ។

លោកប្រធានសមាគមបានបន្តទៀតថា នៅក្នុងរយៈពេលនៃរដូវប្រមូលផលបង្កងធម្មជាតិនៅទូទាំងខេត្តតាកែវនៅឆ្នាំនេះក្នុងមួយថ្ងៃបានចន្លោះពី ២០០-៤០០ គីឡូក្រាម សម្រាប់ធ្វើការផ្គត់ផ្គង់និងនាំចេញទៅតាមបណ្តាខេត្តនិងតំបន់នានា។

លោកឲ្យដឹងថា បង្កងធម្មជាតិតាកែវមានការបិតស្លាកសញ្ញាសម្គាល់និងមានតម្លៃលក់ចន្លោះពី ៤០-៥០ ដុល្លារក្នុងមួយគីឡូក្រាម តាមគុណភាពនិងទំហំល្អរបស់បង្កង។

យ៉ាងណាមិញ ដោយសារបង្កងធម្មជាតិនៅមានកម្រិត លោក ស៉ាប់ សារុន បានបញ្ជាក់បន្ថែម បច្ចុប្បន្នតម្រូវការទីផ្សារបង្កងច្រើនជាងការផ្គត់ផ្គង់ ដូច្នេះការនាំចូលបង្កងពីខាងក្រោម (វៀតណាម) ជាច្រើនតោនក្នុងមួយថ្ងៃៗ ប៉ុន្តែសម្រាប់បង្កងនាំចូលគឺមិនអាចយកមកធ្វើឬបន្លំថាជាបង្កងរបស់ខេត្តតាកែវបានឡើយ។

ទន្ទឹមនេះ ប្រធានសមាគមរូបនេះបានបន្ថែមដែរថា បច្ចុប្បន្នបង្កងធម្មជាតិនៅមានសេសសល់តិចតួចតាមកន្លែងទឹកជ្រៅៗ។ ចាប់ពីអំឡុងខែតុលានៃខែទឹកឡើងអាចចាប់ផ្ដើមប្រមូលផលបង្កងបឹងធម្មជាតិបាន លុះឈានចូលដល់ខែមករាបង្កងធម្មជាតិនៅសល់បន្តិចបន្តួចនៅតាមកន្លែងខ្លះៗ ហើយផុតរដូវកាលនៃការប្រមូលផលតែម្តងគឺខែមេសា ដល់ខែឧសភា៕

Related Topics:បង្កងតាកែវ