ព័ត៌មានជាតិ

៣ ថ្ងៃ បង្កងតាកែវ លក់បានដល់ ៥០០ គីឡូ មានតម្រូវការខ្ពស់ជាងឆ្នាំមុន

បានផុស

៤ ថ្ងៃ មុន

នៅ

ថ្ងៃសុក្រ ១៨ មេសា ២០២៥

ដោយ

រយៈពេល ៣ ថ្ងៃ នៃពិធីបុណ្យចូលឆ្នាំថ្មី បង្កងខេត្តតាកែវ លក់បានដល់ ៤០០-៥០០ គីឡូក្រាម មានតម្រូវការកើនឡើងជាងឆ្នាំមុន។ នេះបើតាមឱ្យដឹងពីប្រធានសមាគមបង្កងខេត្តតាកែវ លោក ស៉ាប់ សារុន ឱ្យ «កម្ពុជាថ្មី» ដឹងនៅព្រឹកថ្ងៃទី១៨ ខែមេសា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៉ាប់ សារុន បានលើកឡើងថា ៣ថ្ងៃ នៃពិធីបុណ្យចូលឆ្នាំថ្មីនេះ នៅកសិដ្ឋានធំរបស់លោក បានផ្គត់ផ្គង់បង្កង់តាកែវបានដល់ ៤០០-៥០០គីឡូ ដោយបរិមាណនេះនៅមិនទាន់សរុបរួមទាំងកសិដ្ឋានដទៃទៀតរបស់កសិករនោះទេ។

លោកថា ដោយសារបង្កងនៅតូចៗ នៅមិនទាន់ធំធាត់ល្អនៅឡើយ ដូច្នេះសម្រាប់ ៣ ថ្ងៃនៃចូលឆ្នាំថ្មីនេះ បង្កងតាកែវ លក់ក្នុងតម្លៃ ៦ ម៉ឺន ទៅ ៧ ម៉ឺនរៀល ប៉ុណ្ណោះ ក្នុងមួយគីឡូក្រាម ដោយកាលមុន បង្កងធំធាត់ល្អ លេខ២ នេះ លក់ក្នុងតម្លៃ ៨ ម៉ឺនរៀលក្នុងមួយគីឡូក្រាម។

លោក ស៉ាប់ សារុន បានអះអាងថា «ឆ្នាំនេះតម្រូវការបង្កងមានច្រើនជាងឆ្នាំមុន ឱ្យតែមានបង្កង ចន្លោះពី ៧-៨ រហូតដល់ ១០-១២ ក្បាលក្នុងមួយគីឡូនេះ គឺមានតម្រូវការច្រើន ប៉ុន្តែ កសិករធ្វើមិនទាន់បានដោយសារកូនបង្កងទើបតែដាក់ ដូច្នេះបង្កងដែលអាចទាន់ចាប់លក់បាន គឺចន្លោះពី ១៥-២០ ក្បាលក្នុងមួយគីឡូ គឺនៅស្ទើនៅឡើយ សម្រាប់អ្នកបរិភោគ»។

លោកបាន បន្ថែមថា ទីផ្សារអ្នកបរិភោគនាពេលបច្ចុប្បន្ននេះមានការយល់ដឹងច្រើនជាងពីមុន ដែលជាហេតុធ្វើឱ្យតម្រូវការពីមួយឆ្នាំទៅមួយឆ្នាំមានការកើនឡើងជាមុនជាបន្តបន្ទាប់។

ជាក់ស្តែង សព្វថ្ងៃនេះ បង្កងដែលមានតម្រូវការខ្ពស់គឺបង្កងលេខ ២ ដែលមានចន្លោះពី ៧-៨ រហូតដល់ ១០-១២ ក្បាលក្នុងមួយគីឡូ ទោះមានបង្កងប៉ុន្មានគីឡូក៏មានតម្រូវការអស់ដែរ មិនមានសល់នោះទេ មានតែខ្វះបង្កងលក់ទៅវិញ។

លោកបាន អះអាងថា តម្រូវការបង្កងខេត្តតាកែវ មានតម្រូវការល្អណាស់ ព្រោះអ្នកបរិភោគចាប់ផ្តើមយល់ដឹង ទាំងគុណភាព និងរស់ជាតិរបស់បង្កង ព្រោះបង្កងតាកែវ ចិញ្ចឹមតាមបែបធម្មជាតិ ធំធាត់តាមដំណើរ មិនមានការប្រើថ្នាំបំប៉នឱ្យឆាប់ធំទេ ដូច្នេះទោះមិនទាន់បាននាំចេញទៅទីផ្សារខាងក្រៅ ក៏លោកក្នុងនាមជាប្រធានសមាគមធ្វើយ៉ាងណាបង្កើនគុណភាព និងគិតពីសុខភាពអ្នកបរិភោគជាចម្បង ព្រោះជាផលិតផលក្នុងស្រុក លក់ឱ្យពលរដ្ឋក្នុងស្រុកបរិភោគ៕