សេដ្ឋកិច្ច

សមាគមបង្កងតាកែវ ដាក់កូនបង្កងជាង ៤០ ម៉ឺនដើម្បីឆ្លើយតបនឹងតម្រូវការឆ្នាំនេះ

បានផុស

១ year មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

ប្រធានសមាគមបង្កងខេត្តតាកែវ លោក ស៉ាប់ សារុន បានឱ្យថា នៅរដូវកាលប្រមូលផលបង្កងនាឆ្នាំ២០២៥ នេះ សមាគមបានដាក់កូនបង្កងជាង ៤០ ម៉ឺនកូន ដើម្បីធានាបានការផ្គត់ផ្គង់ទៅដល់តម្រូវការទីផ្សារក្នុងស្រុកឱ្យមានភាពល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងមកកាន់ «កម្ពុជាថ្មី» លោក ស៉ាប់ សារុប បានមានប្រសាសន៍ថា កាលពីឆ្នាំមុនការផ្គត់ផ្គង់បង្កងរបស់សមាគមទៅកាន់ទីផ្សារបានប្រឈមនិងបញ្ហាកង្វះខាតទឹក ដែលធ្វើឱ្យផលបង្កង់មានការថយចុះ។

លោកថា កាលពីឆ្នាំ២០២៤ កន្លងទៅ សមាគមអាចប្រមូលផលបង្កងសរុបបានប្រមាណជាជាង ១០ តោនប៉ុណ្ណោះ ដើម្បីផ្គត់ផ្គង់ដល់តម្រូវការទីផ្សារ។

ជុំវិញបញ្ហានេះ លោក ស៉ាប់ សារុន បានពន្យល់ថា «បញ្ហានេះ ព្រោះតែអាកាសធាតុនារដូវប្រាំងមានៅភាពរាំងស្ងួតមិនមានទឹកគ្រប់គ្រាន់ ដែលធ្វើឱ្យកសិករខាងបង់ច្រើន និងធ្វើអ្នកខ្លះឈានដល់បោះបង់លែងចិញ្ចឹម។ ជាក់ស្តែង ឆ្នាំនេះ ប្រជាពលរដ្ឋនៅតាមបណ្តាស្រះចិញ្ចឹមបង្កងមួយចំនួនបាននាំគ្នាត្រៀមបម្រុងទឹកទុក ដើម្បីអាចធានាឱ្យបានថាមានទឹកគ្រប់គ្រាន់ ព្រោះខ្លាចប្រឈមអត់ទឹកដូចកាលពីឆ្នាំមុន»។

លោកថា ឆ្នាំនេះទំហំនៃតម្រូវការបង្កងអាចនឹងការកើនឡើងជាងឆ្នាំមុន ព្រោះខាងសមាគមនាំចេញបង្កងបានឆាប់រហ័ស ដោយមួយថ្ងៃអាចលក់ចេញបានក្នុងចន្លោះពី ៣០ ដល់ ៦០ គីឡូ ក៏មានក្នុងមួយថ្ងៃ។ ដោយឡែក ថ្ងៃបុណ្យទានផ្សេងៗ បង្កងតាកែវ អាចលក់ចេញដល់មួយថ្ងៃជាង ១០០ គីឡូ ក៏មានទៅតាមតម្រូវការពលរដ្ឋ។

ប្រធានសមាគមរូបនេះ បានបន្ថែមថា ឆ្នាំនេះ បើទោះបីជា មានកសិករមួយចំនួនបានបោះបង់ចោលការចិញ្ចឹមបង្កងទៅចិញ្ចឹមអ្វីផ្សេងក៏ដោយ ប៉ុន្តែនៅតែមានកសិករមួយចំនួនបានធ្វើការពង្រីកស្រះចិញ្ចឹម និងបង្កើនការដាក់កូនបង្កងរបស់ពួកគេ ដូច្នេះលោកអាចសន្និដ្ឋានបានថា ឆ្នាំនេះ សមាគមចិញ្ចឹមបង្កងទាំងអស់មានដាក់កូនបង្កងសរុបជាង ៤០ ម៉ឺន ដើម្បីត្រៀមប្រមូលផលនាពេលឆាប់ៗខាងមុខ។

បច្ចុប្បន្ន បង្កងចិញ្ចឹមបែបធម្មជាតិរបស់ខេត្តតាកែវ ក៏នៅមិនទាន់ធំធាត់អាចចាប់លក់បានដើម្បីផ្គត់ផ្គង់លើទីផ្សារនៅឡើយទេ ដោយបង្កងអាចនឹងលក់បានចាប់ពីខែមីនា និងខែមេសា ខាងមុខនេះ។

គួរជម្រាបថា ខេត្តតាកែវ បើរាប់បញ្ចូលទាំងកសិដ្ឋានតូច-ធំ បច្ចុប្បន្នមានជិត ១០ កសិដ្ឋាន តាមស្រុកមួយចំនួនដូចជា ស្រុកអង្គរបុរី ស្រុកបុរីជលសារ ស្រុកកោះអណ្ដែត និងនៅក្នុងទីរួមខេត្តតាកែវផ្ទាល់។ ចំពោះកសិដ្ឋានទាំងអស់ទំហំមមានចាប់ពី ៤-៨ ហិតា ឬខ្លះទៀត ១០-៣០ហិតា ជាដើម៕