ព័ត៌មានជាតិ

ជាង ១០ ឆ្នាំ មានអ្នកជិះហួសទៅហួស ស្រាប់តែភ្ញៀវទេសចរមកលេងព្រាត មានទាំងអតីតអភិបាលខេត្តសៀមរាបទៀត

បានផុស

៥ years មុន

នៅ

ថ្ងៃចន្ទ ១៥ កុម្ភៈ ២០២១

ដោយ

រង្វង់មូលបន្ទាយស្រីបានផ្លាស់ប្តូរកែប្រែទៅជាសួនផ្កាដ៏ស្រស់បំព្រងក្នុងមួយប៉ប្រិចភ្នែក។ អតីតដីសោះកក្រោះ ដែលត្រូវបានអាជ្ញាធរសាងសង់ធ្វើជារង្វង់មូលសម្រួលចរាចរជាង ១០ ឆ្នាំមកនេះ ដែលជាធម្មតាមានអ្នកដំណើរជិះហួសទៅហួស ឥលូវបានក្លាយជាទីកម្សាន្តថ្មីមិនអាចរំលងបានរបស់ភ្ញៀវទេសចរមកលេងស្រុកបន្ទាយស្រី។

អតីតអភិបាលខេត្តសៀមរាប ឯកឧត្តម ឃឹម ប៊ុនសុង ក៏បានចូលលេងកម្សាន្តសួនផ្កាដ៏ស្រស់ស្អាតក្នុងថ្ងៃសេចក្តីស្រលាញ់ជាមួយក្រុមគ្រួសារ និងបានថតរូបស្អាតបង្ហោះលើបណ្តាញសង្គមផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ឃឹម ប៊ុនសុង អតីតអភិបាលខេត្តសៀមរាបមកលេងសួនផ្ការង្វង់មូលបន្ទាយស្រី

រង្វង់មូលបន្ទាយស្រី មានទំហំប្រមាណជាង២ហិចតា។ រង្វង់មូលនេះផ្ដួចផ្ដើមកសាងឡើងនៅអំឡុងឆ្នាំ២០១០ ជំនាន់ឯកឧត្តម ស៊ូ ភិរិន្ទ ជាអភិបាលខេត្តសៀមរាប។

ក្រោមរដ្ឋបាលស្រុកបន្ទាយស្រី ដែលមានលោកឃឹម ហ្វីណង់ជាអភិបាលស្រុកបានរៀបចំរង្វង់មូលនេះឡើងវិញ ដោយរៀបចំប្រព័ន្ធទឹក ព្រមទាំងដាំស្មៅនិងផ្កា ដើម្បីកែលម្អទីនេះ ឲ្យមានសោភណភាពកាន់តែទាក់ទាញ សម្រាប់ពលរដ្ឋនិងភ្ញៀវទេសចរមកទស្សនាលម្ហែកាយ។

រង្វង់មូលនេះ មានទីតាំងនៅក្នុងភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប តាមផ្លូវឆ្ពោះទៅស្រុកអន្លង់វែង ទីរួមស្រុកបន្ទាយស្រី ទៅស្រុកប្រាសាទបាគង ឆ្ពោះមករួមខេត្តនិងទៅខេត្តកំពង់ធំ និងឆ្ពោះទៅលើខ្នងភ្នំគូលែន៕

អត្ថបទ៖ ប៊ុណ្ណារ៉ា

Related Topics:លោក ឃឹម ហ្វីណង់