ព័ត៌មានជាតិ

អគ្គនាយករងគយ ឆ្លើយតបភាពយឺតយ៉ាវក្នុងការរត់ឯកសារបែបបទ នាំទំនិញចេញចូលប្រទេសកម្ពុជា

បានផុស

៣៩ នាទី មុន

នៅ

ថ្ងៃព្រហស្បតិ៍ ៩ កក្កដា ២០២៦

ដោយ

ក្នុងវេទិកាគយ និងសម្ព័ន្ធសមាគមសហគ្រាសធុនតូចនិងមធ្យម លោក សែ សុឃន អគ្គនាយករងនៃអគ្គនាយកដ្ឋានគយ និងរដ្ឋាករកម្ពុជាបានឆ្លើយតបការសាកសួរពីភាពយឺតយ៉ាវក្នុងការរត់ឯកសារ និងនិតិវិធីក្នុងការនាំទំនិញចេញចូលប្រទេសកម្ពុជា។

លោក សែ សុឃន បានពន្យល់ពីនីតិវិធីមួយចំនួនពាក់ព័ន្ធក្នុងការស្នើសុំសេវាសាធារណៈក្នុងការនាំទំនិញចេញចូលប្រទេសកម្ពុជាមានដូចជា លិខិតអនុញ្ញាតគយ ការផ្ទៀងផ្ទាត់ដើមកំណើតទំនិញ (CO) ការផ្ទៀងផ្ទាត់តម្លៃគិតពន្ធគយ និងការស្នើសុំគោលការណ៍លើកទឹកចិត្តរបស់ SME។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សែ សុឃន បញ្ជាក់ថា ការស្នើសុំលិខិតអនុញ្ញាតគយ ការផ្ទៀងផ្ទាត់ដើមកំណើតទំនិញ ឬការទាមទារតម្លៃពន្ធគយ ត្រូវបានកំណត់ក្នុងប្រកាស។

ទោះជាយ៉ាងណា ជារឿយៗមានការយឺតយ៉ាវបង្កឡើងដោយសារមូលហេតុចម្បងៗមួយចំនួន ដែលលោកពន្យល់លម្អិតដូចខាងក្រោម។

១. ការស្នើសុំលិខិតអនុញ្ញាតគយ

បញ្ហាខ្វះឯកសារភ្ជាប់៖ ទោះបីជាប្រកាសកំណត់ឱ្យបញ្ចប់ក្នុងរយៈពេល ២ ថ្ងៃក៏ដោយ ប៉ុន្តែជារឿយៗអ្នកស្នើសុំមិនបានភ្ជាប់មកជាមួយនូវលិខិតអនុញ្ញាតពីក្រសួង ឬស្ថាប័នដែលមានសមត្ថកិច្ចពាក់ព័ន្ធនោះឡើយ។ ហេតុនេះមន្ត្រីគយត្រូវរក្សាទុក (Hold) ក្នុងប្រព័ន្ធ ហើយតម្រូវឱ្យអ្នកស្នើសុំទៅយកលិខិតអនុញ្ញាតពីក្រសួងស្ថាប័នពាក់ព័ន្ធ ទើបអាចបន្តនីតិវិធីបាន។

២. ការផ្ទៀងផ្ទាត់វិញ្ញាបនបត្រដើមកំណើតទំនិញ (CO)

កម្ពុជាអនុវត្តកិច្ចព្រមព្រៀងពាណិជ្ជកម្មជាមួយចិន តម្រូវឱ្យមានច្បាប់ដើម CO ដែលមានត្រាក្រហម ហើយច្បាប់ចម្លង (Duplicate Copy) ក៏ត្រូវមានត្រាក្រហមដែរ។ ប៉ុន្តែអ្នករត់ការមួយចំនួនមិនបានយកច្បាប់ចម្លងពណ៌ក្រហមមកទេ គឺបែរជាថតតាមទូរសព្ទឬយកច្បាប់ថតចម្លងសខ្មៅមកឱ្យមន្ត្រីគយទៅវិញ ដែលខុសពីគោលការណ៍ចែងក្នុងកិច្ចព្រមព្រៀង។

នៅពេលមន្ត្រីគយបដិសេធនិងពន្យល់ពីមូលហេតុ អ្នករត់ការជារឿយៗមិនបានប្រាប់ការពិតទៅក្រុមហ៊ុនឡើយ ដោយគ្រាន់តែប្រាប់ថា ដាក់ឯកសារទៅច្រើនថ្ងៃហើយតែគយមិនព្រមចេញឱ្យ។

ត្រង់ចំណុចនេះ លោក សែ សុឃន បញ្ជាក់ថា ទិសដៅទៅថ្ងៃមុខ គយអាស៊ានកំពុងជំរុញការប្រើប្រាស់ប្រព័ន្ធស្វ័យប្រវត្តកម្មតាមរយៈ E-Verification (ការផ្ទៀងផ្ទាត់តាមអេឡិចត្រូនិក) ដែលនឹងជួយឱ្យដំណើរការកាន់តែលឿន និងច្បាស់លាស់ជាងមុន។

បន្តចុចអាន៖ តាំងពីឆ្នាំ ២០០៨ គយបានអនុវត្តការធ្វើទំនើបកម្ម និងកិច្ចសម្រួលការធ្វើពាណិជ្ជកម្មនៅកម្ពុជា

៣. ការផ្ទៀងផ្ទាត់តម្លៃគិតពន្ធគយ

ការផ្ទៀងផ្ទាត់តម្លៃគិតពន្ធគយ ចាំបាច់ត្រូវមានឯកសារយោងច្បាស់លាស់ដូចជា វិក្កយបត្រ (Invoice), លិខិតឥណទាន (LC – Letter of Credit), និងកិច្ចសន្យាទិញលក់ (Sales Contract) ជាដើម។ លោក សែ សុឃន បញ្ជាក់។

នៅពេលមន្ត្រីគយមានការសង្ស័យ និងស្នើសុំឯកសារបន្ថែម (ដូចជា Sales Contract) ក្រុមហ៊ុន ឬអ្នករត់ការមិនបានបង្ហាញ ហើយក៏សុំដកឯកសារទៅវិញ។ ប៉ុន្តែបែរជាទៅរាយការណ៍ប្រាប់ក្រុមហ៊ុនថា គយមិនព្រមចេញឯកសារឱ្យទៅវិញ ដោយលាក់បាំងរឿងដែលគយទាមទារ LC ឬ Sales Contract។

៤. ការស្នើសុំគោលការណ៍លើកទឹកចិត្តរបស់ SME

ពាក់ព័ន្ធការស្នើសុំគោលការណ៍លើកទឹកចិត្តរបស់ SME លោក សែ សុឃន បញ្ជាក់ថា ប្រសិនបើ SME ចូលក្នុងប្រព័ន្ធត្រឹមត្រូវ និងមានឯកសារគ្រប់គ្រាន់ ក្នុងរយៈពេល ១ ថ្ងៃ ត្រូវតែចេញឱ្យ ព្រោះមានការបង្កើត Channel Telegram សម្រាប់ពិនិត្យរវាងសាខានិងអគ្គនាយកដ្ឋាន។

លោក សែ សុឃន លើកឡើងមូលហេតុកន្លងមកយឺតយ៉ាវដោយសារម្ចាស់ SME មួយចំនួននៅមិនទាន់យល់ដឹងពីនីតិវិធីច្បាស់លាស់។ ពួកគាត់មកសុំការលើកទឹកចិត្តគយ ដោយមានភ្ជាប់តែលក្ខន្តិកៈក្រុមហ៊ុនដែលចេញដោយក្រសួងពាណិជ្ជកម្មប៉ុណ្ណោះ។

នៅពេលមន្ត្រីគយសួររកបណ្ណចុះបញ្ជីការនៅក្រសួងឧស្សាហកម្ម ឬការចុះបញ្ជីពន្ធដារ ពួកគាត់គ្មានឯកសារបង្ហាញ ក៏ដកពាក្យត្រឡប់ទៅវិញ ហើយទៅនិយាយខាងក្រៅថា “មកសុំគយពិបាកណាស់ អក្សរលើក្រដាសមើលទៅងាយស្រួល តែមកធ្វើពិតប្រាកដគឺមិនចេញឱ្យ ដោយមិនបាននិយាយថាមកពីខ្លួនឯងខ្វះឯកសារពន្ធដារ ឬឯកសារក្រសួងឧស្សាហកម្មនោះឡើយ។

លោក សែន សុឃន បន្តថា ប្រសិនបើម្ចាស់អាជីវកម្ម ឬ SME ចូលក្នុងប្រព័ន្ធ យល់ដឹងពីនីតិវិធី និងរៀបចំឯកសារតម្រូវបានត្រឹមត្រូវច្បាស់លាស់នោះ ការផ្តល់សេវានឹងត្រូវបញ្ចប់ក្នុងរយៈពេល ១ ទៅ ២ ថ្ងៃយ៉ាងយូរ។

ភាពយឺតយ៉ាវភាគច្រើនគឺកើតឡើងដោយសារកំហុសឆ្គង ឬការខ្វះខាតឯកសារពីខាងភាគីអ្នកស្នើសុំផ្ទាល់។ លោកបន្ថែម៕

បន្តចុចអាន៖ តើសហគ្រាសក្នុងស្រុកទទួលបានការលើកទឹកចិត្តពន្ធអ្វីខ្លះ ពេលចុះបញ្ជីចូលក្នុងប្រព័ន្ធ?

បន្តចុចអាន៖ ពន្ធដារសម្រួលនីតិវិធី រៀបចំយុទ្ធសាស្ត្រកំណែទម្រង់ លើកទឹកចិត្តជាច្រើនជំរុញ SME ចូលក្នុងប្រព័ន្ធពន្ធដារ