ឆ្លើយតបបណ្តឹងមន្ត្រីនគរបាលទេសចរណ៍ខេត្ត​សៀម​រាប លោក ស សុខា សម្រេចដកទាំងអ្នកប្តឹង និងអ្នករងបណ្តឹង៦រូប

នៅទីបំផុត លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសម្រេចដកតំណែងប្រធានអង្គភាពនគរបាលទេសចរណ៍ខេត្តសៀមរាប ឱ្យទៅជាមន្ត្រីនៅក្រសួងវិញ។ ក្រៅពីនេះ ទាំងអ្នកប្តឹង និងអ្នករងបណ្តឹង៥នាក់ទៀត ក៏ត្រូវដកតំណែងផងដែរ។ នេះបើយោងតាមសេចក្តីសម្រេចរបស់លោក ស សុខា នៅថ្ងៃទី៣០ ខែមករា ឆ្នាំ២០២៤។

សេចក្តីសម្រេចនេះ ត្រូវបានបង្គាប់ឱ្យលោកវរសេនីយ៍ត្រី ចៅ ពិសិដ្ឋ អត្តលេខ៥៤០៧៧ ឋានៈអនុប្រធានអង្គភាព នគរបាលទេសចរណ៍ប្រចាំខេត្តសៀមរាប ឱ្យទទួលដឹកនាំជាប្រធានអង្គភាពនគរបាលទេសចរណ៍ ប្រចាំខេត្តសៀមរាប ស្ដីទី ជំនួសលោកវរសេនីយ៍ទោ ទី សុខឡែន អត្តលេខ៦៨៤៣៦ ដែលត្រូវផ្ទេរភារកិច្ចទៅបម្រើការងារនៅនាយកដ្ឋានកណ្ដាលសណ្ដាប់ធ្នាប់សាធារណៈ។

ពាក់ព័ន្ធនឹងករណីបណ្តឹងនេះ គឺបណ្តាលមកពីល្មើសវិន័យរបស់កងកម្លាំងនគរបាលជាតិ។ មន្ត្រីនគរបាលទេសចរណ៍ខេត្តសៀមរាប បានបង្ហើបឲ្យដឹងថា ករណីទំនាស់រហូតឈានដល់កូនចៅប្ដឹងផ្ដល់ទៅថ្នាក់ដឹកនាំអង្គភាពនគរបាលទេសចរណ៍ខេត្តសៀមរាបនេះ គឺដោយសារតែថ្នាក់លើដែលប្រចាំការនៅខេត្តសៀមរាប អសមត្ថភាពមិនចេះនីតិវិធី ឬមិនមានការសម្របសម្រួលទំនាស់តូចតាចជាមួយកូនចៅឲ្យបានល្អ៕

ដោយ៖ ជុន កុសល