សមត្ថកិច្ចរកឃើញសារធាតុញៀន ៣០៤កញ្ចប់ នៅជាប់របងប៉ុស្តិ៍នគរបាលរដ្ឋបាលឃ្មួញ

នៅថ្ងៃទី៧ ខែកុម្ភៈ ឆ្នាំ២០២៤ កម្លាំងប៉ុស្តិ៍នគរបាលរដ្ឋបាលឃ្មួញ ខណ្ឌសែនសុខ បានរកឃើញសារធាតុញៀនចំនូន ៣០៤កញ្ចប់ នៅជាប់របងប៉ុស្តិ៍នគរបាលរដ្ឋបាលតែម្តង។ នេះបើតាមការផ្សព្វផ្សាយរបស់ស្នងការដ្ឋាននគរបាលរាជធានីភ្នំពេញនៅថ្ងៃទី៧ ខែកុម្ភៈ ម្សិលមិញ។

តាមប្រភពដដែល សមត្ថកិច្ចបានរកឃើញថង់ចំនួន៣ថង់ សង្ស័យជាសារធាតុញៀន ក្នុងនោះ មានកញ្ចប់ពណ៌ខៀវទំពាំងបាយជូ ចំនួន១៩៤កញ្ចប់ និងកញ្ចប់ពណ៌ក្រហមស្តូប៊ូរី ចំនួន១១០កញ្ចប់ ទុកចោលនៅជាប់របងប៉ុស្តិ៍នគរបាលរដ្ឋបាលឃ្មួញ។ កម្លាំងប៉ុស្តិ៍នគរបាលរដ្ឋបាលឃ្មួញ បានសហការជាមួយការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ រកឃើញសារធាតុញៀនប្រភេទ អ៊ិចស្តាស៊ី (MDMA) ចំនួន ៣០៤កញ្ចប់ ទម្ងន់២,៤៤១.៧៨ក្រាម។

បន្ទាប់ពីរកឃើញសារធាតុញៀននេះហើយ សមត្ថកិច្ចក៏កំពុងតែកំពុងធ្វើការស្រាវជ្រាវបន្តលើករណីនេះ។ តាមការសន្និដ្ឋានរបស់សមត្ថកិច្ច គឺជនសង្ស័យភ័យខ្លាច ព្រោះមានគោលដៅសមត្ថកិច្ច ចុះអនុវត្តត្រួតពិនិត្យជាតិស្រវឹង និងអាវុធជាតិផ្ទុះ៕