ព័ត៌មានជាតិ
ច្បាប់បង្ក្រាបល្បែងស៊ីសង នឹងធ្វើវិសោធនកម្មថ្មី ខណៈកំពុងស្ថិតក្នុងដៃក្រសួងមហាផ្ទៃពិនិត្យ
ច្បាប់ស្ដីពីការបង្ក្រាបល្បែងស៊ីសង ដែលដាក់ឱ្យប្រើតាំងពីឆ្នាំ១៩៩៦ នឹងធ្វើវិសោធនកម្មឡើងវិញ ដើម្បីឆ្លើយតបនឹងស្ថានភាពសង្គម ដែលតម្រូវឱ្យមានច្បាប់នៃការបង្ក្រាបល្បែងស៊ីសងខុសច្បាប់មួយគ្រប់ជ្រុងជ្រោយ។ ក្រសួងមហាផ្ទៃ កំពុងពិនិត្យសិក្សាការងារបច្ចេកទេសលើការរៀបចំសេចក្ដីព្រាងច្បាប់ស្ដីពីវិសោធនកម្មច្បាប់នៃការបង្ក្រាបល្បែងស៊ីសងនេះ។
កាលពីរសៀលថ្ងៃទី១៣ ខែកុម្ភៈ ឆ្នាំ២០២៤ លោក ទ្រី សុខហេង អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារបច្ចេកទេស បានដឹកនាំកិច្ចប្រជុំក្រុមការងារបច្ចេកទេសរៀបចំសេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីការបង្ក្រាបល្បែងស៊ីសង។ កិច្ចប្រជុំនេះ ជាកិច្ចប្រជុំលើកទី២៦ របស់ក្រុមការងារបច្ចេកទេស ហើយមកដល់ពេលនេះ ក្រុមការងារបច្ចេកទេសសម្រេចបានការងាររៀបចំលើឯកសារទស្សនាទាន និងគោលគំនិតសំខាន់ៗសម្រាប់កសាងសេចក្តីព្រាងច្បាប់ស្តីពីវិសោធនកម្មច្បាប់ស្តីពីការបង្ក្រាបល្បែងស៊ីសងនេះចប់ទាំងស្រុងហើយ។
ថ្លែងក្នុងកិច្ចប្រជុំនេះ លោក ទ្រី សុខហេង លើកឡើងថា ក្រោយពីក្រុមការងារបច្ចេកទេស បានសិក្សា និងពិនិត្យពិចារណាយ៉ាងដិតដល់លើឯកសារគតិយុត្តផ្សេងៗរួចមក ក្រុមការងារបានពិនិត្យឃើញថា ច្បាប់ស្តីពីការបង្ក្រាបល្បែងស៊ីសង ដែលប្រកាសឱ្យប្រើនៅឆ្នាំ១៩៩៦ ត្រូវរៀបចំកសាងខ្លឹមសារថ្មីទាំងស្រុងឡើងវិញ។
បើតាមលោក ទ្រី សុខហេង ខ្លឹមសារនៃមាត្រារបស់ច្បាប់ស្តីពីការបង្ក្រាបល្បែងស៊ីសង ឆ្នាំ១៩៩៦ បានចែងជាលក្ខណៈរួមទូទៅ មិនបានកំណត់ឱ្យច្បាស់អំពីអំពើល្មើសលេងល្បែងស៊ីសងខុសច្បាប់ និងប្រភេទល្បែងស៊ីសង ដែលត្រូវបង្ក្រាបនោះឡើយ ហើយម្យ៉ាងទៀត ច្បាប់នេះកើតមុនច្បាប់ស្តីពីការគ្រប់គ្រងល្បែងពាណិជ្ជកម្ម ដែលមាត្រាមួយចំនួនមានខ្លឹមសារផ្ទុយនឹងច្បាប់ស្តីពីការគ្រប់គ្រងល្បែងពាណិជ្ជកម្ម។ លោក គូសបញ្ជាក់ថា ច្បាប់ស្តីពីការបង្ក្រាបល្បែងស៊ីសង ឆ្នាំ១៩៩៦ មិនអាចយកមកប្រើប្រាស់ ដើម្បីប្រឆាំងនឹងបទល្មើសល្បែងស៊ីសងខុសច្បាប់បានទេ ជាពិសេសការលេងល្បែងតាមប្រព័ន្ធបច្ចេកវិទ្យា ឬហៅថា ល្បែងអនឡាញ និងបទល្មើសពាក់ពន្ធ័ ដូចជា ការលាងលុយកខ្វក់ និងជួញដូរមនុស្សខុសច្បាប់ នៃស្ថានភាពរីកចម្រើនបច្ចេកវិទ្យានាពេលបច្ចុប្បន្ន។
លោកអនុរដ្ឋលេខាធិការ បានសង្កត់ធ្ងន់ថា ការធ្វើវិសោធនកម្មច្បាប់ស្ដីពីការបង្ក្រាបល្បែងស៊ីសងពេលនេះ គឺដើម្បីឆ្លើយតបទៅនឹងស្ថានភាពជាក់ស្តែងនៃប្រទេសកម្ពុជា ដែលតម្រូវឱ្យមានច្បាប់ស្តីពីការបង្ក្រាបល្បែងស៊ីសងខុសច្បាប់មួយច្បាស់លាស់ គ្រប់ជ្រុងជ្រោយ សំដៅប្រយុទ្ធប្រឆាំងប្រកបដោយប្រសិទ្ធភាពនឹងបទល្មើសការលេងល្បែងស៊ីសងខុសច្បាប់គ្រប់ប្រភេទ ជាពិសេសការលេងល្បែងតាមប្រព័ន្ធបច្ចេកវិទ្យា ឬល្បែងអនឡាញ ក៏ដូចជាបទល្មើសពាក់ពន្ធ័ការលាងលុយកខ្វក់ និងជួញដូរមនុស្សខុសច្បាប់។
គោលបំណងនៃការរៀបចំជាច្បាប់ថ្មីនេះ គឺដើម្បីកំណត់ឱ្យបានច្បាស់អំពីវិធានបទល្មើសលេងល្បែងស៊ីសងខុសច្បាប់ និងប្រភេទល្បែងស៊ីសងដែលត្រូវបង្ក្រាប ការទទួលខុសត្រូវចំពោះមុខច្បាប់របស់ប្រតិបត្តិករ អ្នកលេងល្បែងល្មើសច្បាប់ និងធានាធ្វើឱ្យវិធាននៃច្បាប់ស្តីពីការបង្ក្រាបល្បែងស៊ីសងខុសច្បាប់នេះ មានសង្គតិភាព ភាពរលូន និងមានភាពប្រទាក់ក្រឡា ជាមួយច្បាប់ស្តីពីការគ្រប់គ្រងល្បែងពាណិជ្ជកម្ម ព្រមទាំងអាចបំពេញបន្ថែមនូវភាពខ្វះចន្លោះនៃច្បាប់ស្តីពីការគ្រប់គ្រងល្បែងពាណិជ្ជកម្ម។ នេះជាការគូសបញ្ជាក់បន្ថែមរបស់លោក ទ្រី សុខហេង អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារបច្ចេកទេស៕
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៧ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង