ព័ត៌មានជាតិ

ក្រសួងដែនដីនៅតែបន្តជំរុញឲ្យបញ្ចប់គម្រោងអគារ ៤២ ជាន់ ចៀសវាងអូសបន្លាយតទៅទៀត

បានផុស

១ year មុន

នៅ

ថ្ងៃពុធ ១៣ មីនា ២០២៤

ដោយ

មន្រ្តីក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ក្រសួងនៅតែបន្តកិច្ចសហការលើការជំរុញដំណើរការបញ្ចប់គម្រោងសាងសង់អគារ ៤២ ជាន់ ដែលបានអូសបន្លាយពេលបញ្ចប់គម្រោងជាច្រើនឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេង ឡូត មន្រ្តីអ្នកនាំពាក្យក្រសួងរៀបចំដែនដី នគរូបនីយកម្មនិងសំណង់បានប្រាប់កម្ពុជាថ្មីតាមទូរសព្ទថា មកដល់ពេលនេះ ក្រសួងនៅមិនទាន់ទទួលបានព័ត៌មានបន្ថែមពីក្រុមហ៊ុនលើដំណើរការសាងសង់បញ្ចប់គម្រោងអគារ ៤២ ជាន់ ដែលជាគម្រោងអលចនទ្រព្យដ៏ធំចាយទុនរយលានដុល្លារវិនិយោគនោះនៅឡើយទេ។

បើតាមលោក សេង ឡូត ក្រសួងនៅតែបន្តជំរុញនិងសហការដើម្បីឲ្យគម្រោងនេះបញ្ចប់កុំឲ្យអូសបន្លាយពេលតទៅទៀត។

ការបន្សល់ទុកសំណង់អគារដ៏ធំកណ្តាលក្រុងបែបនេះមិនល្អ ប៉ះពាល់ដល់មុខមាត់និងសោភណភាពទីក្រុង រួមទាំងប៉ះពាល់ដល់ការអភិវឌ្ឍវិស័យអចលទ្រព្យរបស់ប្រទេសកម្ពុជាផងដែរ។ លោក សេង ឡូត បានបញ្ជាក់បន្ថែម មុនលោកបន្តថា ក្រសួងចង់ឲ្យគម្រោងដ៏ធំនេះបញ្ចប់ឲ្យបានឆាប់។ យ៉ាងណាមិញបើតាមលោក សេង ឡូត ក្រសួងបានត្រឹមតែសហការនិងចូលរួមជួយជ្រោមជ្រែង តែកិច្ចការអាចបញ្ចប់នៅពេលណាជារឿងផ្ទៃក្នុងរបស់ក្រុមហ៊ុន។

អគារ ( Golden Tower 42 ) ដែលមានទីតាំងស្ថិតនៅចំណុចប្រសព្វមហាវិថីព្រះសីហនុ កែងមហាវិថីព្រះមុនីវង្សជាគម្រោងវិនិយោគអចលទ្រព្យដ៏ធំមួយនៅប្រទេសកម្ពុជា។

អគារដែលចាយលុយរយលានដុល្លារវិនិយោគនេះ បានចាប់ផ្តើមដំណើរការសាងសង់អំឡុងឆ្នាំ ២០០៥-២០០៦ ប៉ុន្តែបានពន្យាពេលបញ្ចប់គម្រោងម្តងហើយម្តងទៀត ដោយសារវិបត្តិសេដ្ឋកិច្ចសាកលនិងបញ្ហាផ្ទៃក្នុង។ សំណង់អគារដែលចាយទុនវិនិយោគប្រមាណ ២៤០ លានដុល្លារ ជានិមិត្តរូបដំបូងបង្អស់នៃអគារខ្ពស់ជាងគេនៅចំកណ្តាលទីក្រុងភ្នំពេញ វិនិយោគដោយក្រុមហ៊ុនកូរ៉េខាងត្បូង Yon Woo បានចាប់ផ្តើមដំណើរការសាងសង់ឡើងវិញកាលពីឆ្នាំ ២០១៧ ហើយគ្រោងដាក់ឲ្យដំណើរការនៅដើមឆ្នាំ ២០២០ ប៉ុន្តែក៏បានទុកចោលម្តងទៀតរហូតដល់ពេលបច្ចុប្បន្ននេះ៕