សម្ដេចធិបតី៖ កិច្ចប្រជុំកំពូលធុរកិច្ចអាស៊ាន-កម្ពុជា ជាឱកាសបង្កើនកិច្ចសហប្រតិបត្តិការរវាងអាស៊ាន និងដៃគូសកល

សម្តេចធិបតី ហ៊ុន ម៉ាណែត ថ្លែងថា កិច្ចប្រជុំកំពូលធុរកិច្ចអាស៊ាន-កម្ពុជា នឹងក្លាយជាឱកាសដ៏មានសក្តានុពលក្នុងការបង្កើនកិច្ចសហប្រតិបត្តិការ និងពង្រឹងទំនាក់ទំនងរវាងអាស៊ាន និងដៃគូសកល ដែលកម្ពុជា ជាចំណុចស្នូល។

សម្ដេចធិបតី ថ្លែងដូច្នេះក្នុងឱកាសអញ្ជើញជាអធិបតីពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា នៅថ្ងៃទី២ ខែមេសា ឆ្នាំ២០២៤នេះ។ កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៤ ធ្វើឡើង​ក្រោមមូលបទ «បញ្ចេញសក្តានុពលអាស៊ាន៖ ការតភ្ជាប់បច្ចេកវិទ្យា និងកំណើនប្រកបដោយ​បរិយាប័ន្ន»។

ជាកត់សម្គាល់ កិច្ចប្រជុំកំពូលធុរកិច្ចអាស៊ាន-កម្ពុជា មានគោលដៅជំរុញសក្តានុពលអាស៊ាន ដែលកម្ពុជា គឺជាចំណុច​ស្នូល និងលើក យកប្រធានបទសំខាន់ៗ មកជជែកពិភាក្សារួមមាន៖ តំណភ្ជាប់ខ្សែបញ្ជូនថាមពលអាស៊ាន ចីរភាព និងថាមពលកកើតឡើងវិញរបស់អាស៊ាន​ កម្ពុជា គឺជាច្រកទ្វារទៅកាន់អាស៊ាន និងការប្រើប្រាស់​បច្ចេក​វិទ្យា ដើម្បីកំណើនប្រកបដោយបរិយាប័ន្ន ជាដើម។

សម្ដេចធិបតី ហ៊ុន ម៉ាណែត បានចាត់ទុកមូលបទនៃកិច្ចប្រជុំពេលនេះ គឺជារបៀបវារៈដ៏មានសារសំខាន់ចំពេលវេលា ក្នុងបរិបទបច្ចុប្បន្ន និងប្រកបដោយមហិច្ឆិតា។ សម្ដេចធិបតី បានជំរុញឱ្យតួអង្គពាក់ព័ន្ធទាំងអស់ គប្បីទាញយកស្ថាន ភាពនេះ ដើម្បីពង្រឹងភាពជាដៃគូ លើកស្ទួយការជឿនលឿននៃបច្ចេកវិទ្យា និងជំរុញសហគមន៍អាស៊ានឱ្យកាន់តែមានវិបុលភាព និងសមធម៌។

សម្ដេចធិបតីនាយករដ្ឋមន្ត្រី បានសម្ដែងក្ដីរីករាយ និងកត់សម្គាល់ឃើញថា តាមរយៈរបៀបវារៈនៃកិច្ចប្រជុំកំពូលនេះ នឹងពិភាក្សាស៊ីជម្រៅលើបញ្ហាសំខាន់ៗដែលពាក់ព័ន្ធនឹងតំបន់អាស៊ាន ដោយសម្ដេច បញ្ជាក់ថា ប្រធានបទដែលបានជ្រើស រើសនេះ បានឆ្លុះបញ្ចាំងឱ្យឃើញពីការយល់ដឹងស៊ីជម្រៅអំពីគោលការណ៍ណែនាំរបស់អាស៊ាន ការអភិវឌ្ឍថ្មីៗ និងទីតាំងជាយុទ្ធសាស្រ្តរបស់កម្ពុជា។

សម្ដេចនាយករដ្ឋមន្រ្តី ជឿជាក់ថា ការជួបជុំថ្ងៃនេះ មានសក្តានុពលក្នុងការបង្កើតជាកាតាលីករបង្កើនកិច្ចសហប្រតិបត្តិការ និងពង្រឹងទំនាក់ទំនងរវាងប្រជាជាតិអាស៊ាន និងដៃគូសកលរបស់តំបន់អាស៊ាន។ សម្ដេច ថា តាមរយៈកិច្ចសហប្រតិបត្តិការបែបនេះ អាចបង្កើតជាមូលដ្ឋានគ្រឹះសម្រាប់វិបុលភាពរួម និងអនាគតសេដ្ឋកិច្ចដែលមានភាពធន់ជាងមុនសម្រាប់គ្រប់ តួអង្គពាក់ព័ន្ធទាំងអស់។

បើតាមសម្ដេចធិបតី បច្ចុប្បន្ននេះ ជាមួយសមាជិកចំនួន១០ប្រទេស អាស៊ាន បានពង្រឹងជំហររបស់ខ្លួនក្នុងនាមជាកម្លាំងសេដ្ឋកិច្ចមួយក្នុងសកល ដែលមានកំណើនរឹងមាំ កម្លាំងពលកម្មពោរពេញដោយចីរភាព និងការខិតខំធ្វើសមាហរណកម្មជាលំដាប់ ហើយអាស៊ាន បានក្លាយជាសេដ្ឋកិច្ចធំជាងគេលំដាប់ទី៥ លើពិភពលោក៕