អាកាសធាតុក្តៅ តើក្រសួងអប់រំមានគម្រោងបន្ថយម៉ោង ឬសិក្សាតាមអនឡាញ ឬទេ?

ក្រសួងអប់រំ យុវជន និងកីឡា មិនមានគម្រោងកាត់បន្ថយម៉ោងសិក្សា ឬរៀនតាមអនឡាននៅក្នុងកំឡុងពេលអាកាសធាតុក្តៅខ្លាំងនេះទេ បើទោះបីជាបច្ចុប្បន្នកម្ពុជាមានសីតុណ្ហភាពឡើងកម្តៅចាប់ពី ៣៩ ដល់ជាង ៤០អង្សាក៏ដោយ។

លោកស្រី ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា មានប្រសាសន៍នៅថ្ងៃទី២៩ ខែមេសា នេះថា ក្រសួងមិនមានគម្រោងកាត់បន្ថយម៉ោងសិក្សា ឬរៀនតាមអនឡាននៅក្នុងកំឡុងពេលអាកាសធាតុក្តៅខ្លាំងនេះទេ។ ប៉ុន្តែក្រសួងតែងតែយកចិត្តទុកដាក់ចំពោះសុខភាពសិស្ស និងណែនាំសិស្សឱ្យញ៉ាំអាហារឱ្យបានគ្រប់គ្រាន់ ញ៉ាំទឹកឱ្យបានច្រើន និងបានធ្វើការយ៉ាងជិតស្និទ្ធជាមួយ មន្ទីរអប់រំ យុវជន និងកីឡា ក៏ដូចជាសាលារៀននានា ដើម្បីបង្កើនការយកចិត្តទុកដាក់ និងរាយការណ៍ពីស្ថានភាពតាមសាលារៀនមក មន្ទីរ និងក្រសួងឱ្យបានដឹង និងដោះស្រាយបញ្ហានានាឱ្យបានទាន់ពេលវេលា។

លោកស្រី ឃួន វិច្ឆិកា មានប្រសាសន៍បន្តថា៖ “ឥឡូវនេះ ស្ថានភាពនៅតាមសាលារៀននីមួយៗមានលក្ខណៈល្អប្រសើរ នៅមិនទាន់មានបញ្ហាអ្វីមួយប៉ះពាល់ដល់ដំណើរការសិក្សារបស់សិស្សនៅឡើយទេ ដោយសាលានីមួយៗអាចដោះស្រាយបានរៀងៗខ្លួន តែក្រសួងឱ្យសាលារាយការណ៍ដែរប្រសិនបើមានបញ្ហាអ្វីមួយ ដើម្បីឱ្យក្រសួងអាចដោះស្រាយបានទាន់ពេល ហើយក្នុងករណីសាលាស្នើសុំក្រសួងកាត់បន្ថយម៉ោងសិក្សា ឬរៀនតាមអនឡាញក្រសួងក៏ពិចារណាទៅលើសំណើទាំងអស់នោះដែរ”។

យ៉ាងណាក៏ដោយ លោកស្រីបានបន្ថែមថា តាមការព្យាកររបស់ ក្រសួងធនធានទឹក និងឧត្តុនិយម បានបញ្ជាក់ថា នៅពេលខាងមុខនេះនឹងឈានចូលដល់រដូវវស្សាឆាប់ៗហើយ។ ដូចនេះកម្តៅក៏នឹងមានការថយចុះជាបន្តបន្ទាប់ដែរ។

គួររំលឹកថា កាលពីថ្ងៃទី២៥ ខែមេសា ឆ្នាំ២០១៩ កន្លងទៅ ក្រសួង​អប់រំ​ យុវជន​ និង​កីឡា បាន​ប្រកាស​ឱ្យ​គ្រប់​គ្រឹះស្ថាន​សិក្សា កាត់​បន្ថយ​ម៉ោង​​សិក្សា​ដើម្បី​បង្ការ​ទប់​ស្កាត់ហានិ​ភ័យ និង​ចៀស​វាង​ជំងឺ​ផ្សេងៗ ដែល​អាចធ្វើ​ឱ្យ​​ប៉ះ​ពាល់​ដល់​សុខភាព​​របស់​សិស្ស​​ និង​គ្រូបង្រៀននៅក្នុងកំឡុងពេលអាកាសធាតុក្តៅខ្លាំង។ ក្នុងនោះនៅ​ពេល​ព្រឹក ចូល​រៀន​នៅ​ម៉ោង ៧:០០ និង​ចេញ​នៅ​ម៉ោង ១០ និង​ ៣០ នាទី ​ដែល​ពីមុន​សិស្ស​ចេញ​​នៅ​ម៉ោង ១១:​០០​។ នៅ​ពេល​រសៀល​ចូល​រៀន​នៅ​ម៉ោង ១៣ និង​ ៣០ នាទី និង​ចេញ​នៅ​ម៉ោង​ ១៧:០០៕

អត្ថបទ៖ សំអឿន