ព័ត៌មានជាតិ

ឯកឧត្ដម ហ៊ុន ម៉ានី ៖ ចំណងមិត្តភាព កម្ពុជា-ប្រ៊ុយណេ បង្ហាញពីអនាគត នៃភាពសុខដុម សុខសាន្ត រុងរឿង របស់ប្រជាជាតិទាំងពីរ

បានផុស

៣ សប្តាហ៍ មុន

នៅ

ថ្ងៃអង្គារ ៣០ មេសា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ មានប្រសាសន៍ថា ចំណងមិត្តភាព កម្ពុជា-ប្រ៊ុយណេ មិនត្រឹមតែបានសបញ្ជាក់ពីភាតុភាពរវាងបុគ្គល និងបុគ្គល ដែលជាថ្នាក់ដឹកនាំប្រទេសជាតិ តែប៉ុណ្ណោះទេ ថែមទាំងបានបង្ហាញពីអនាគត នៃភាពសុខដុម ភាពសុខសាន្ត រុងរឿង នៃប្រជាជាតិទាំងពីរ ផងដែរ។

ការមានប្រសាសន៍នេះ បន្ទាប់ពី សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា រួមជាមួយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា, ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និង ឯកឧត្ដម ឧត្ដមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក បានអញ្ជើញចូលរួមក្នុងពិធីអាហារពេលព្រឹក ជាមួយ ព្រះចៅស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម និង ព្រះរាជបុត្រ អាប់ឌុល ម៉ាទីន នៅព្រឹកថ្ងៃទី ៣០ ខែមេសា ឆ្នាំ ២០២៤ នេះ។

ឯកឧត្ដម ហ៊ុន ម៉ានី បានមានប្រសាសន៍ឲ្យដឹងថា ឯកឧត្ដម មានកិត្តិយស ដោយបានអមដំណើរជាមួយ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ព្រមទាំង ឯកឧត្ដម ហ៊ុន ម៉ានិត ដើម្បីទទួលស្វាគមន៍ ព្រះចៅស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម និង ព្រះរាជបុត្រា ម៉ាទីន យាងមកកាន់ព្រះរាជាណាចក្រកម្ពុជា និងការសោយព្រះក្រយាប្រកបដោយភាតរភាព និងភាពស្និទ្ធស្នាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដម ហ៊ុន ម៉ានី បានមានប្រសាសន៍ឲ្យដឹងបន្តថា ការយាងរបស់ព្រះអង្គ មកកាន់ព្រះរាជាណាចក្រកម្ពុជា នាពេលនេះ បានបង្ហាញពីទំនាក់ទំនងប្រកបដោយភក្ដីភាព និងភាពជិតដិតជាបងប្អូន ក៏ដូចជាការផ្តល់ឱកាសដល់ ឯកឧត្ដម ដែលជា កូនៗ ដើម្បីបន្តទំនាក់ទំនង រឹតចំណងមិត្តភាពជាបង ជាប្អូន នេះ បន្តពីមួយជំនាន់ទៅមួយជំនាន់ ឲ្យកាន់តែរឹងមាំ។

ឯកឧត្ដមឧបនាយករដ្ឋមន្ត្រី មានប្រសាសន៍បន្ថែមថា «ចំណងមិត្តភាពដ៏ស្អិតរមួតនេះ មិនត្រឹមតែបានសបញ្ជាក់ពីភាតុភាពរវាងបុគ្គល និងបុគ្គល ដែលជាថ្នាក់ដឹកនាំប្រទេសជាតិ តែប៉ុណ្ណោះទេ ថែមទាំងបានបង្ហាញពីអនាគត នៃភាពសុខដុម ភាពសុខសាន្ត រុងរឿង នៃប្រជាជាតិទាំងពីរ ផងដែរ»។

គួរជម្រាបថា ព្រះរាជពិធីសោយព្រះក្រយាព្រឹករបស់ ព្រះចៅស៊ុលតង់ និង ព្រះរាជបុត្រ ជាមួយ សម្ដេចតេជោ ហ៊ុន សែន និង កូនប្រុសទាំង ៣ ត្រូវបានធ្វើឡើងនៅសណ្ឋាគាររូសវូត ក្នុងអគារវឌ្ឍនៈ ដែលជាសណ្ឋាគារដ៏ប្រណិតកណ្ដាលរាជធានីភ្នំពេញ។ ព្រះរាជពិធីសោយព្រះក្រយា នេះ បានប្រព្រឹត្តទៅក្រោមបរិយាកាសរីករាយ និងស្និទ្ធស្នាលបំផុត ប្រៀបដូចជាគ្រួសារតែមួយ៕

អត្ថបទ ៖ ពិសី