សេដ្ឋកិច្ច

រដ្ឋាភិបាល កំពុងសិក្សាប្រែក្លាយព្រលានយន្តហោះភ្នំពេញទៅជាមជ្ឈមណ្ឌលភស្តុភារកម្មតំបន់

បានផុស

១៩ ម៉ោង មុន

នៅ

ថ្ងៃអង្គារ ៧ កក្កដា ២០២៦

ដោយ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា រាជរដ្ឋាភិបាលកំពុងសិក្សាប្រែក្លាយព្រលានយន្តហោះអន្តរជាតិភ្នំពេញ ទៅជាមជ្ឈមណ្ឌលភស្តុភារកម្មតំបន់ ដើម្បីតភ្ជាប់ការដឹកជញ្ជូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេច ហ៊ុន ម៉ាណែត បានលើកឡើងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ ប្រវែង ៤៥,៤៨៩ គីឡូម៉ែត្រ ចាប់ពីរង្វង់មូលស្គន់ ដល់រង្វង់មូលគល់ស្ពានគីហ្សូណា នៅក្រុងកំពង់ចាម ខេត្តកំពង់ចាមនៅថ្ងៃទី ៧ កក្កដា ២០២៦។

រាជរដ្ឋាភិបាលតែងតែចាត់ទុក “ផ្លូវ” ជាសរសៃឈាមនៃសេដ្ឋកិច្ច ដោយបន្តផ្តល់អាទិភាពខ្ពស់ចំពោះការអភិវឌ្ឍប្រព័ន្ធផ្លូវថ្នល់, ផ្លូវដែក, ផ្លូវទឹក និងផ្លូវអាកាស ស្របតាមទិសស្លោក “មានផ្លូវ មានសង្ឃឹម”។

អាទិភាពនៃការកសាងផ្លូវ បន្ទាប់ពីមនុស្ស ជាអាទិភាពសំខាន់ មនុស្ស ផ្លូវ ទឹក ភ្លើង បច្ចេកវិទ្យា ដែលជាអាទិភាពការងាររបស់រាជរដ្ឋាភិបាល។

សម្ដេចមហាបវរធិបតីថ្លែងថា៖«ផ្លូវមិនមែនធ្វើតែផ្លូវគោកទេ ហើយផ្លូវគោកក៏មិនមែនធ្វើតែផ្លូវថ្នល់មួយដែរ ប្រព័ន្ធផ្លូវដែកក៏យើងត្រូវតែពង្រឹង និងរៀបចំកសារយៈពេលវែង ព្រោះវាជួយក្នុងការកកស្ទះទំនិញ ដោយសាររទេះភ្លើងអាចដឹកទំនិញបានច្រើន ផ្លូវទឹកយើងនឹងបន្តធ្វើ អភិវឌ្ឍបន្ថែមទៀត ជាពិសេសព្រែកជីកហ្វូណ ដែលនឹងតភ្ជាប់ទន្លេមេគង្គ ទន្លេសាប ទៅសមុទ្រ ថ្ងៃក្រោយកសិផលលែងចាំបាច់ដឹកតាមផ្លូវគោកទៀតហើយ គឺអាចចុះទឹកតែម្ដង»។

សម្ដេចបានថ្លែងបន្ថែមទៀតថា កម្ពុជាមានគម្រោងស្ដារទន្លេពីភ្នំពេញ ទៅកំពង់ឆ្នាំង មួយផ្នែកមេគង្គ ទៅខេត្តកំពង់ចាម រហូតដល់ខេត្តក្រចេះ ដើម្បីតភ្ជាប់ការដឹកជញ្ជូន។

សម្ដេចបានបញ្ជាក់ថា៖ «ព្រលានយន្តហោះនៅភ្នំពេញ យើងកំពុងតែទាក់ទងរៀបចំធ្វើយ៉ាងណា បង្កើតជាមជ្ឈមណ្ឌលភស្តុភារកម្មតំបន់ប្រសិនអាចធ្វើទៅបាន»។

សម្ដេចធិបតីបានណែនាំឱ្យពង្រឹងយន្តការភាពជាដៃគូរវាងរដ្ឋ និងឯកជន ដើម្បីបន្តអភិវឌ្ឍហេដ្ឋារចនាសម្ព័ន្ធរូបវន្តគន្លឹះៗ ផ្លូវគោក ផ្លូវដែក ផ្លូវទឹក កំពង់ផែ និងផ្លូវអាកាស ជាពិសេសគម្រោងធ្វើទំនើបកម្មប្រព័ន្ធខ្សែផ្លូវរថភ្លើងដែលមានស្រាប់ (ភ្នំពេញ-ក្រុងព្រះសីហនុ) និងខ្សែផ្លូវរថភ្លើងថ្មី (ប៉ោយប៉ែត-សៀមរាប-ភ្នំពេញ), ការគិតគូរអភិវឌ្ឍផ្លូវល្បឿនលឿនបន្ថែម, គម្រោងព្រែកជីកហ្វូណនតេជោ ដែលនឹងតភ្ជាប់ដៃទន្លេមេគង្គ/ទន្លេសាប និងផ្លូវសមុទ្រ និងការកសាងផែនការមេសម្រាប់ផែសមុទ្រ ដើម្បីប្រែក្លាយជាមជ្ឈមណ្ឌលភស្តុភាកម្មតំបន់៕

អត្ថបទ៖ ឡេង ដេត

Related Topics:សម្ដេចធិបតី ហ៊ុន ម៉ាណែត