សាច់គោអាំងមួយចង្កាក់ ១ ០០០ រៀល លក់​​មួយ​ថ្ងៃ​បាន​ជាង ២០០ ចង្កាក់ បាន​ចំណូល​ជួយ​ជីវភាព

សាច់គោចង្កាក់ ឬអ្នកខ្លះហៅថាសាច់គោជ្រនួច គឺជាអាហារតាមផ្លូវ​ដ៏ពេញនិយមមួយ​។ អាហារ​ដោយ​ប្រើរងើកភ្លើង​ដុត​ក្តៅ​ហ៊ុយៗ​នេះ ច្រើនតែ​ញាំ​ផ្ទាប់ជាមួយនឹងជ្រក់ល្ហុងអមដោយម្ទេសហិរៗ ដែលអ្នកខ្លះទទួលទានលេងជាធម្មតា ឯខ្លះទៀតក៏យកទៅញ៉ាំជាមួយនំបុ័ង ឬក៏អាចជាគ្រឿងក្លែមនៅពេលមានកម្មវិធី ឬជួបជុំមិត្តភក្កិបងប្អូនជាដើម។

ផល ដាណែត រស់នៅសង្កាត់ព្រែកមហាទេព ក្រុងបាត់ដំបង បាន​ប្រកបមុខរបរលក់សាច់គោចង្កាក់អាំង​ជាយូរឆ្នាំ​មកហើយ ដែលមាន​ទីតាំងស្ថិតក្នុងផ្សារបឹងឈូក កណ្ដាលក្រុងបាត់ដំបង។

ក្នុង​វ័យ​ជាង ២០ ឆ្នាំ ដាណែត ចាប់ផ្តើម​​បើកលក់សាច់គោ​អាំង​ចង្កាក់​ចាប់ពីថ្ងៃត្រង់ទៅទល់ល្ងាចជារៀងរាល់ថ្ងៃ​។ ខណៈ​ដៃទាំងពីរកំពុងកាន់ចង្កាក់សាច់គោអាំងនៅលើចង្ក្រាន ដាណែត​ រៀបរាប់ថា សាច់គោ​ឆ្ងាញ់​ ត្រូវប្រើសាច់​គោ​ជាប់ខ្លាញ់លាយ​សាច់ល្អ ទើបអាំងទៅមានក្លិនឈ្ងុយ។

មាន​លក់ដូចជា​សាច់គោចង្កាក់ នំបុ័ងអាំងប័រ ថ្លើមគោអាំង សង្វាក់ និងថ្វាគោអាំង (សាច់ក្រកគោ) ដាណែត ប្រាប់​ថា កន្លែង​គេ​លក់​តម្លៃសមរម្យ អាចឲ្យ​ពលរដ្ឋ​ទិញញាំ​បាន ព្រោះបើថ្លើមគោអាំង និងសាច់គោជ្រនួចអាំង ជ្រលក់ជ្រក់ល្ហុង ឬក៏ញ៉ាំជាមួយនំបុ័ងអាំងប័រ មួយចង្កាក់ត្រឹមតែ ១.០០០ រៀលប៉ុណ្ណោះ។ ចំណែកថ្វាគោ ឬសាច់ក្រកគោអាំង ដែលមានរសជាតិជូរៗ គឺមួយចង្កាក់ ២.០០០ រៀល។

ទោះបី​មុខរបរនឿយហត់បន្តិច​ តែ​ ដាណែត ថា ការលក់ដូរចេះតែមានភ្ញៀវមកជារឿយៗ ប៉ុន្តែមួយរយៈចុងក្រោយ ការលក់ដូរមានការថយចុះដែលទំនងមកពីការធ្លាក់ចុះនៃសេដ្ឋកិច្ចរបស់ប្រជាពលរដ្ឋ។

ពីមុនក្នុងមួយថ្ងៃលក់អស់ចាប់ពី ៤០០ ទៅ ៥០០ ចង្កាក់ឯណោះ មួយរយៈចុងក្រោយលក់បានត្រឹមតែពី ២០០ ទៅ ៣០០ ចង្កាក់ តែទោះបីជាយ៉ាងណា ដាណែត អះអាង​ថានៅតែព្យាយាមតស៊ូទៅមុខទៀត ដោយមិនរាថយឡើយ បើ​ទោះបីជាមិនបានចំណេញច្រើនក៏អាចបានតក់ៗគ្រាន់ចិញ្ចឹមឆ្នាំងដែរ៕

អត្ថបទ៖ សោ និយមរ័ត្ន