ព្រះមហាក្សត្រ បញ្ចប់គោរម្យងារឧកញ៉ា ពីឈ្មោះ ខុន បញ្ចសិទ្ធ​ ក្រោយយកអាវុធបាញ់សម្ញែងក្នុងក្លឹប

ព្រះករុណា ព្រះបាទ សម្ដេចព្រះបរមនាថ នរោត្តម សីហមុនីព្រះមហាក្សត្រនៃកម្ពុជា នៅថ្ងៃទី១០ ខែសីហា នេះ បានចេញព្រះរាជក្រឹត្យ បញ្ចប់គោរម្យងារឧកញ៉ា ពីឈ្មោះខុន បញ្ចសិទ្ធ​ ក្រោយយកអាវុធបាញ់សម្ញែងក្នុងក្លឹប។

គួររម្លឹកថា កាលពីថ្ងៃទី២៨ ខែកក្កដា ឆ្នាំ២០២៤ មានមនុស្សប្រុសស្រីមួយក្រុម បាននាំគ្នាចូលក្លឹបកំសាន្ត Central.X ដោយហៅស្រា Hennessy ០២ដប មកផឹកស៊ីយ៉ាងហ៊ឺហា សម្ញែងឬកបែបអភិជន ដោយក្នុងនោះមានបុរសម្នាក់ដែលអ្នកផ្សេងក្នុងក្រុមហែរហមលើកតម្កើងជាមនុស្សសំខាន់ជាងគេ (ហៅថា ឧកញ៉ា សិទ្ធ ឧកញ៉ា សិទ្ធ) បានដកកាំភ្លើងខ្លីមួយដើមចេញពីចង្កេះ អាមេបញ្ចូលគ្រាប់កាន់រេចុះឡើង សម្ញែងទៅលើទៅក្រោម ធ្វើឲ្យមានការភ្ញាក់ផ្អើលដល់ភ្ញៀវដ៏ទៃទៀត ដែលអង្គុយនៅសាឡុងក្បែរៗ នោះ។ ដោយឃើញសភាពបែបនេះ មេការក្លឹបបានតាមអង្វរបុរសម្នាក់នោះសុំឲ្យយកកាំភ្លើងទៅទុកក្នុងឡាន ស្រាប់តែបុរសនោះបានបាញ់ឡើងលើ០១គ្រាប់ ដើម្បីសម្តែងឬទ្ធិអំណាចរបស់ខ្លួន ធ្វើឲ្យភ្ញៀវផ្អើលឈូរឆររត់ចេញក្រៅ ត្រូវបានក្រុមសន្តិសុខរាយការណ៍ជូនអាវុធហត្ថខណ្ឌចំការមន ចុះអន្តរាគមន៍ និងឃាត់ខ្លួនជនសង្ស័យ ដើម្បីយកទៅអនុវត្តតាមនិតិវិធីច្បាប់ ព្រមទាំងដកហូតអាវុធខ្លីបាន០២ដើម ដោយមួយដើម ម៉ាក GLOCK19 ជាអាវុធដែលជនសង្ស័យកាន់ធ្វើសកម្មភាពបាញ់សម្ញែង និងមួយដើមទៀតម៉ាក EKOL VOLGA សមត្ថកិច្ច ឆែកឃើញក្នុងរថយន្តរបស់ជនសង្ស័យ។

នៅចំពោះមុខសមត្ថកិច្ច ជនសង្ស័យមានឈ្មោះ ខុន បញ្ចសិទ្ធិ ដែលគេដឹងថា ជាអ្នកមានជាន់ថ្មី ដោយសារការរកស៊ីកាក់កបខាងដីធ្លី បានសារភាពទទួលស្គាល់ថា អាវុធខ្លីពិតជារបស់ខ្លួនមែន តែអ្នកបាញ់គឺជាតៃកុងឡានខ្លួននោះទេ រីឯតៃកងឡានបានសារភាពទទួលស្គាល់ថា ខ្លួនពិតជាអ្នកបាញ់ដូចសម្តីមេខ្លួនបានលើកឡើងពិតប្រាកដមែន។ តែតាមវិធានស្រាវជ្រាវរបស់សមត្ថកិច្ចអាវុធហត្ថរាជធានីភ្នំពេញ រកតម្រុយឃើញថា អ្នកបាញ់ពិតប្រាកដគឺជាបុគ្គលឈ្មោះ ខុន បញ្ចសិទ្ធិ មិនមែនជាតៃកុងឡាននោះទេ។ ដោយជនសង្ស័យទាំងពីរនៅតែផ្តល់ចម្លើយផ្ទុយពីសាក្សី និងភស្តុតាង សមត្ថកិច្ចអាវុធហត្ថរាជធានីភ្នំពេញ ក៏ធ្វើការឃាត់ខ្លួនទាំងពីរនាក់ដើម្បីកសាងសំណុំរឿងបញ្ជូនទៅតុលាការតែម្តង។

លោក ខុន បញ្ចសិទ្ធ​ និងបក្ខពួក រួមទាំងវត្ថុតាង ត្រូវបានកម្លាំងសមត្តកិច្ចកងរាជអាវុធហត្ថរាជធានីភ្នំពេញ បញ្ជូនដល់ស្ថាប័នអយ្យការអមសាលាដំបូងរាជធានីភ្នំពេញ កាលពីថ្ងៃទី៣០ ខែកក្កដា ឆ្នាំ២០២៤ ដែលសំណុំរឿងនេះបានស្ថិតនៅលោក លឹម ប៊ុនហេង ព្រះរាជអាជ្ញារង កំពុងបើកការស៊ើបសួរករណី”ផ្ទុះអាវុធ”។

លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ នៅព្រឹកថ្ងៃទី៣១ ខែកក្កដា ឆ្នាំ២០២៤ បានឲ្យដឹងថា តំណាងអយ្យការបាន បេីកការស៊េីបសួរលេីជនសង្ស័យរួចរាល់ហេីយ​ដែលមាន

ទី១.ឈ្មោះ​ ខុន​ បញ្ចសិទ្ធ​ ត្រូវបានចោទប្រកាន់ពីបទ​ កាន់កាប់​ ប្រេីប្រាស់អាវុធដោយគ្មានការអនុញ្ញាត​ តាមមាត្រា​ ២០​ នៃច្បាប់ស្តីពីការគ្រប់គ្រងអាវុធ​ គ្រឿងផ្ទុះ​ និងគ្រាប់រំសេវ​។ទី២.ឈ្មោះ​ ជឿន​ ចុន​ ត្រូវបានចោទប្រកាន់ពីបទ​ លាក់បាំងតម្រុយ​ តាមមាត្រា​ ៥៣២​ នៃក្រមព្រហ្មទណ្ឌ​។ ក្រោយពីតំណាងអយ្យការសម្រេចចោទប្រកាន់ជាផ្លូវហើយ សំណុំរឿងខាងលើនេះបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួន ឬមិនឃុំខ្លួនជាឆន្ទានុសិទ្ធិរបស់ចៅក្រម ៕