ព័ត៌មានជាតិ

សមាជិកព្រឹទ្ធសភា ជំរុញអាជ្ញាធរឃុំប៉ាក់ខ្លង ផ្សព្វផ្សាយអត្ថប្រយោជន៍ព្រែកជីកហ្វូណនតេជោ និងសហប្រតិបត្តិការអភិវឌ្ឍតំបន់ត្រីកោណឱ្យកាន់តែទូលំទូលាយ

បានផុស

៩ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

លោក អយ ខន សមាជិកព្រឹទ្ធសភា និងជាអនុប្រធានទី ១ នៃគណៈកម្មការនីតិកម្ម និងយុត្តិធម៌ បានជំរុញណែនាំដល់អាជ្ញាធរឃុំប៉ាក់ខ្លង ស្រុកមណ្ឌលសីមា ចាំបាច់បន្តផ្សព្វផ្សាយពីអត្ថប្រយោជន៍ នៃគម្រោងព្រែកជីកហ្វូណនតេជោ និងសហប្រតិបត្តិការអភិវឌ្ឍតំបន់ត្រីកោណឱ្យបានកាន់តែទូលំទូលាយបន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបំផុសស្មារតីដល់អាជ្ញាធរមូលដ្ឋានយ៉ាងដូច្នេះរបស់លោក អយ ខន ធ្វើឡើងក្នុងដំណើរជួបសំណេះសំណាល និងចុះសួរសុខទុក្ខលោកមេភូមិ មេឃុំ សមាជិកក្រុមប្រឹក្សាឃុំ ក្រុមប្រឹក្សាស្រុក លោកអភិបាលស្រុកមណ្ឌលសីមា និងមន្ត្រីមួយចំនួនមូលដ្ឋានឃុំប៉ាក់ខ្លង កាលពីថ្ងៃទី ១២ ខែសីហា ឆ្នាំ ២០២៤។

លោក អយ ខន ពន្យល់ទៀតថា សូមអាជ្ញាធរ មន្ត្រីរាជការ និងប្រជាពលរដ្ឋមូលដ្ឋានជ្រាប រាល់គម្រោងដ៏មានសារៈសំខាន់ទាំង ២ នេះ ពិតជាបានផ្តល់ឱកាសដល់ប្រទេសជាតិបានរីកចម្រើនកាន់តែខ្លាំងខាងផ្នែកសេដ្ឋកិច្ច និងវិស័យពាក់ព័ន្ធនានា គ្រាកម្ពុជាកំពុងមានតម្រូវការចាំបាច់អនុវត្ត។

លោកក៏ស្នើដល់អាជ្ញាធរ មន្ត្រីរាជការ និងប្រជាពលរដ្ឋ ត្រូវជឿជាក់លើការដឹកនាំរបស់រាជរដ្ឋាភិបាលក្នុងការអភិវឌ្ឍប្រទេសជាតិក្នុងយុទ្ធសាស្ត្របញ្ចកោណ នៃរាជរដ្ឋាភិបាលអាណត្តិទី ៧ ដែលបានកំណត់សូចនាករ ជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលខ្ពស់នៅឆ្នាំ ២០៥០។ អ្វីដែលពិសេសជាងនេះទៀតនោះ សូមកុំឲ្យមានការចាញ់បោក ឬជឿតាមការញុះញង់របស់ជនអគតិ នាំទៅដល់ការបំផ្លាញសន្តិភាព ស្ថិរភាពនយោបាយ និងសេដ្ឋកិច្ចសង្គម។

ចំពោះសកម្មភាពក្រុមជ្រុលនិយមនេះដែរ ត្រូវបានលោកស្រី មិថុនា ភូថង អភិបាលខេត្តកោះកុង អះអាងនៅថ្ងៃទី ១៣ ខែសីហា នេះថា លោកស្រីបានដាក់បទបញ្ជាយ៉ាងម៉ឺងម៉ាត់រួចរាល់ហើយដល់គ្រប់កងកម្លាំងប្រដាប់អាវុធទាំង ៣ ប្រភេទ គណៈបញ្ជាការឯកភាពក្រុងស្រុក រដ្ឋបាលឃុំ-សង្កាត់ និងភូមិ ចាំបាច់កំណត់មុខសញ្ញាប្រឆាំងណាដែលធ្វើសកម្មភាពចង់តវ៉ាផ្តួលរំលំរាជរដ្ឋាភិបាលកើតចេញពីការបោះឆ្នោតស្របច្បាប់ ដោយកម្ទេចខាងតែបានមិនលើកលែងឡើយចំពោះក្រុមជ្រុលនិយម ឬថ្នាក់ដឹកនាំប្រឆាំងណាម្នាក់បង្កអស្ថិរភាព សន្តិសុខសណ្ដាប់ធ្នាប់ និងបំផ្លាញសន្តិភាព ទោះស្ថិតក្នុងតម្លៃណាក៏ដោយ៕

អត្ថបទ ៖ សិរីវឌ្ឍនៈ