ក្រសួងព្រះបរមរាជវាំង ថ្កោលទោសលើជនអនាមិកប្រើបណ្ដាញសង្គម ធ្វើឲ្យប៉ះពាល់អង្គព្រះមហាក្សត្រ

នៅថ្ងៃទី១៥ ខែសីហា នេះ ក្រសួងព្រះបរមរាជវាំង បានចេញសេចក្ដីថ្លែងការណ៍មួយ ប្រកាសដាច់អហង្ការ និងថ្កោលទោស ចំពោះជនអនាមិក ដែលបានបង្ហោះតាមបណ្ដាញទំនាក់ទំនងសង្គម មានឈ្មោះ «ព្រះបរមរាជវាំង Royal Palace Of Cambodia» និង«យុវជនក្រោមម្លប់ព្រះមហាក្សត្រ» ដែលបានចេញផ្សាយធ្វើឱ្យប៉ះពាល់ដល់ព្រះកិត្តិនាម ព្រះករុណាព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គកំពុងគង់ប្រថាប់បំពេញព្រះរាជតួនាទីដ៏ឧត្តុងឧត្តម ជានិមិត្តរូបនៃឯកភាពជាតិ និងនិរន្តរភាពជាតិ។

ក្រសួងព្រះបរមរាជវាំង ថ្លែងថា​ គណនីហ្វេសប៊ុក «ព្រះបរមរាជវាំង Royal Palace Of Cambodia» និង«យុវជនក្រោមម្លប់ព្រះមហាក្សត្រ» មិនមែនជាផេកផ្លូវការរបស់ក្រសួងព្រះបរមរាជវាំងឡើយ។

ក្រសួងព្រះបរមរាជវាំង​ ចាត់ទុកការប្រព្រឹត្តទង្វើរបស់ជនអនាមិកបែបនេះថា គឺជាការបំពានច្បាប់ធម្មនុញ្ញ នៃព្រះរាជាណាចក្រកម្ពុជា ដែលចែងថា «អង្គ ព្រះមហាក្សត្រ មិនមែននរណារំលោភបំពានបានឡើយ»។

តាមរយៈសេចក្ដីថ្លែងការណ៍ ក្រសួងព្រះបរមរាជវាំង អំពាវនាវដល់អាជ្ញាធរមានសមត្ថកិច្ចទាំងអស់ ចាត់វិធានការជាបន្ទាន់ឱ្យបានម៉ឺងម៉ាត់បំផុត តាមរដ្ឋធម្មនុញ្ញ និងច្បាប់ជាធរមាន។​

ក្រសួងព្រះបរមរាជវាំងថ្លែងបន្តថា ព្រះរាជតួនាទីដ៏ឧត្ដុងឧត្ដមរបស់ព្រះមហាក្សត្រកម្ពុជា បាននាំសង្គមជាតិទាំងមូល កំពុងទទួលបានសេចក្ដីសុខ សន្តិភាព និងការអភិវឌ្ឍ ក្រោមការដឹកនាំរបស់រាជរដ្ឋាភិបាលកម្ពុជា៕