​ព្រះមហាក្សត្រ ​និង​ព្រះមហាក្សត្រី ​ទទួលជួប​វីរកងទ័ព​ ១៨ ​នាក់​

ព្រះករុណាជាអម្ចាស់ជីវិតលើត្បូង ​ព្រះបាទ នរោត្តម សីហមុនី ព្រះមហាក្សត្រ​នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ប្រោសព្រះរាជទានកងទ័ពទាំង ១៨រូប ដែលបាននិវត្តន៍​មកកាន់មាតុប្រទេសវិញ ចូលក្រាបថ្វាយបង្គំគាល់ នៅព្រះបរមរាជវាំង ថ្ងៃទី០១ ខែមករា ឆ្នាំ២០២៦។

​ព្រះករុណា និងសម្តេចព្រះមហាក្សត្រី​បានទទួលជួបសំណេះសំណាលជាមួយ​វីរយុទ្ធជន ១៨រូប ដែលត្រូវបាន រាជរដ្ឋាភិបាលនៃប្រទេសថៃ ដោះលែងឱ្យមានសេរីភាពឡើងវិញ ក្រោយពីជាប់ឃុំ​ឃាំង​នៅប្រទេសថៃអស់រយៈពេល ១៥៥ ថ្ងៃ។

ព្រះករុណា​ និងសម្តេចព្រះមហាក្សត្រី បានកោតសរសើរចំពោះសេចក្តីក្លាហានរបស់អស់លោក ដែលបានបំពេញភារកិច្ចការពារបូរណភាពទឹកដី នៃព្រះរាជាណាចក្រកម្ពុជា ទៅតាមតួនាទី​និងលះបង់កម្លាំងកាយ កម្លាំងចិត្ត និងពេលវេលា តាមតួនាទីជា កងទ័ពអង់អាចក្លាហាន។

ព្រះករុណាជាអម្ចាស់ជីវិតលើត្បូង និងសម្តេចព្រះមហាក្សត្រីបាន ប្រោសព្រះរាជទានព្រះរាជអំ​ណោយ​ដល់វីរកងទ័ពទាំង១៨រូប ដោយក្នុងម្នាក់ៗ ទទួលបាន ឃីតចំនួន ១កញ្ចប់ ក្នុងនោះមាន មុង ១ ភួយ ១ ក្រមា ១ សារុង ១ និងអាវយឺតមានស្លាកព្រះរាជអំណោយ ព្រះករុណាព្រះបាទ​សម្តេចព្រះបរមនាថ នរោត្តម សីហមុនី និងថវិកាចំនួន ២០ ០០០ ០០០រៀល (ម្ភៃលានរៀល)។

បន្ថែមពីនេះ ព្រះករុណា និងសម្តេចព្រះមហាក្សត្រី ប្រោសព្រះ​រាជទានព្រះរាជទ្រព្យ​ដល់វីរកង​ទ័ព​ចំនួន១នាក់ ដែលនឹងត្រូវរៀបអាពាហ៍ពិពាហ៍នាពេលខាងមុខ ទទួលបានថវិកាបន្ថែមចំនួន ២០ ០០០ ០០០រៀល (ម្ភៃលានរៀល) និងវីរកងទ័ពចំនួន ២រូប ដែលភរិយាពពោះនឹងត្រូវសម្រាលបុត្រ​ក្នុងពេលខាងមុខ ដោយក្នុងម្នាក់ៗ ទទួលបានថវិកាចំនួន ៥ ០០០ ០០០រៀល (ប្រាំលានរៀល) បន្ថែមទៀត៕