សម្ដេច ហ៊ុន សែន៖ នៅព្រឹកនេះ ព្រះរាជសុខភាពរបស់ព្រះមហាក្សត្រកម្ពុជាបានប្រសើរឡើង

ក្រោយបានចូលគាល់ព្រះមហាក្សត្រ សម្ដេច ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ ឱ្យដឹងថា ព្រះរាជសុខភាពព្រះមហាក្សត្រ ព្រះកុរណា ព្រះបាទសម្ដេចព្រះបរមនាថ នរោត្ដម សីហមុនី បានប្រសើរឡើង ដោយព្រះអង្គបានមានព្រះរាជបន្ទូលឆ្លងឆ្លើយជាមួយសម្ដេចជាធម្មតា ទោះបីព្រះអង្គផ្ទុំដាក់សេរ៉ូម ក្រោយការវះកាត់។ សម្ដេច ហ៊ុន សែន ឱ្យដឹងដូច្នេះ តាមរយៈទំព័រហ្វេសប៊ុកផ្លូវការនាព្រឹកថ្ងៃទី២១ ខែមេសា នេះ ពីទឹកដីនៃទីក្រុងប៉េកាំង ប្រទេសចិន។

សម្ដេចតេជោ ហ៊ុន សែន សរសេរលើទំព័រហ្វេសប៊ុកក្នុងន័យដើមដូច្នេះ៖«ម៉ោង៩ និង៣០នាទីម៉ោងនៅប៉េកាំងព្រឹកនេះ ខ្ញុំបានចូលគាល់សួរសុខទក្ខព្រះមហាក្សត្រនៅមន្ទីរពេទ្យរយៈពេលប្រមាណនាទី។ ជាទូទៅព្រះរាជសុខភាពព្រះអង្គបានប្រសើរឡើង ព្រះអង្គមានរាជបន្ទូលឆ្លងឆ្លើយជាមួយខ្ញុំព្រះករុណាខ្ញុំជាធម្មតា ទោះបីព្រះអង្គផ្ទុំដាក់សេរ៉ូមដែលជាទម្លាប់ធម្មតា នៃអ្នកជម្ងឺក្រោយការវះកាត់ក៏ដោយ។ »។

សម្ដេច ហ៊ុន សែន បានឱ្យដឹងថា តាមរយៈសម្ដេច ព្រះមហាក្សត្រសូមផ្ញើការសាកសួរសុខទុក្ខ និងប្រគេនពរចំពោះព្រះសង្ឃ និងប្រជាពលរដ្ឋខ្មែរដោយការនឹករលឹក។

ព្រះមហាក្សត្រកម្ពុជា ព្រះអង្គមានព្រះរោគ​មហារីកនៅ​ក្រពេញប្រូស្តាត (Prostate Cancer) ដោយក្រុមវេជ្ជបណ្ឌិតចិន តម្រូវព្រះអង្គទទួលការព្យាបាលព្រះរោគដោយការវះកាត់។ ព្រះមហាក្សត្រកម្ពុជា  ទទួលបានការវះកាត់ដោយជោគជ័យពីក្រុមវេជ្ជបណ្ឌិតប្រចាំមន្ទីរពេទ្យប៉េកាំង នៅព្រឹកថ្ងៃទី២០ ខែមេសា។

ក្រសួងព្រះបរមរាជវាំង ​ឱ្យដឹងថា  ក្រុមវេជ្ជបណ្ឌិត បានក្រាបបង្គំទូលថ្វាយ ព្រះមហាក្សត្រ សូមព្រះអង្គគង់ប្រថាប់មួយរយៈពេលទៀត ក្រោយវះកាត់ដើម្បីពិនិត្យតាមដាន និងថែទាំព្រះរាជសុខភាពបន្តនៅក្នុងមន្ទីរពេទ្យប៉េកាំង៕