ស្ពានខ្ពស់ជាងគេនៅកម្ពុជា ភ្ជាប់និស្ស័យខេត្តពោធិ៍សាត់-កោះកុង សាងសង់រួចរាល់នៅឆ្នាំ២០២៥ ខែមិថុនា

ស្ពានឆ្លងកាត់ស្ទឹងអាតៃ នឹងក្លាយជាស្ពានខ្ពស់ជាងគេនៅកម្ពុជា បន្ទាប់ពីសាងសង់រួចរាល់ជាស្ថាពរនៅក្នុងខែមិថុនា ឆ្នាំ២០២៥។ នេះបើតាមលោក ខូយ រីដា អភិបាលខេត្ត ពោធិ៍សាត់ ប្រាប់ក្រុមអ្នកសារព័ត៌មាន ក្នុងពេលដឹកនាំដំណើរទស្សនកិច្ចទៅកាន់ការដ្ឋានសាងសង់ស្ពាន នៅក្នុងភូមិសាស្ត្រភូមិឆាយលូក ឃុំអូសោម ស្រុកវាលវែង ខេត្តពោធិ៍សាត់។

ស្ពានកម្ពស់រហូតដល់ ៩០ម៉ែត្រ វាស់ពីបាតស្ទឹង  ប្រវែងបណ្តោយ ៥៣០ម៉ែត្រ និងទទឹង ១០ម៉ែត្រ បន្ទុកនៃស្ពានរចនាតាមស្តង់ដារចិនហាយវេកម្រិត៣ ដែលមានបន្ទុក (Design Load) ចំនួន ៥៥ នេះ ដោយចាប់ផ្តើមសាងសង់ឡើងនៅខែកុម្ភៈ ឆ្នាំ២០២៣  គ្រោងចំណាយពេលសាងសង់ចំនួន ២៨ខែ។

ស្ពានតម្លៃជាង២២លានដុល្លារនេះ សង់ឡើងក្នុងគម្រោងសាងសង់ផ្លូវជាតិលេខ១០ តភ្ជាប់ ពីខេត្តបាត់ដំបង -ពោធិ៍សាត់ -កោះកុង ត្រង់គីឡូម៉ែត្រលេខ ១២៨+៩១៥។

ក្នុងគម្រោងសាងសង់ផ្លូវជាតិលេខ១០ តភ្ជាប់ពីខេត្តបាត់ដំបង -ពោធិ៍សាត់ -កោះកុង (សំឡូត- វាលវែង-អូរសោម ដល់កោះកុង) ប្រវែងសរុបចំនួន ១៩៨គីឡូម៉ែត្រ ក្រសួងសាធារណការនឹងសាងសង់ស្ពានចំនួន ២៣កន្លែង ក្នុងនោះមានស្ពានខ្ពស់ជាងគេមួយគឺស្ពានឆ្លងកាត់ស្ទឹងឫស្សីជ្រុំ។ ផ្លូវជាតិលេខ១០ គ្រោងចំណាយថវិកាសាងសង់ជិត ១៩០លានដុល្លារ រយៈពេល ៤៨ខែ ចាប់ពីខែធ្នូ ឆ្នាំ២០១៩ ដល់ខែធ្នូ ឆ្នាំ២០២៣៕