លោក ស សុខា៖ ការផ្សាយព័ត៌មានថា លោក ទទួលបានងារ «សម្ដេច» ជាព័ត៌មានក្លែងក្លាយ

ប្រមុខក្រសួងមហាផ្ទៃ លោក ស សុខា បានប្រកាសបដិសេធចំពោះព័ត៌មានក្លែងក្លាយ ដែលថា លោក ទទួលបានងារជា «សម្ដេច»។ នេះមិនមែនជាព័ត៌មានពិតឡើយ។

ការដែលលោក ស សុខា ចេញមកប្រកាសបដិសេធនេះ ក្រោយមានព្រះរាជក្រឹត្យក្លែងក្លាយមួយច្បាប់​​ បានបង្ហាញថា​​ លោក ស សុខា ត្រូវបានផ្ដល់គោរមងារជា សម្ដេចក្រុមព្រះ។ ជុំវិញការផ្សាយនេះ លោកឧបនាយករដ្ឋមន្រ្តី តាមរយៈសំណេរនៅលើបណ្ដាហ្វេសប៊ុកផ្លូវការរបស់លោក បានបញ្ជាក់ដូច្នេះថា៖ «ខ្ញុំសូមបដិសេធចំពោះព័ត៌មានក្លែងក្លាយនេះ និងសូមអាជ្ញាធរមានសមត្ថកិច្ចស្រាវជ្រាវ​ ដើម្បីនាំខ្លួនជនល្មើសយកមកផ្តន្ទាទោសទៅតាមច្បាប់»។

នៅថ្ងៃទី៣ ខែកញ្ញា ឆ្នាំ២០២៤ មានការចេញផ្សាយព្រះរាជក្រឹត្យមួយច្បាប់ ដែលបង្ហាញពីការដែលព្រះមហាក្សត្រនៃកម្ពុជា ត្រាស់បង្គាប់គោរមងារដល់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាសម្ដេចក្រុមព្រះ អភិសន្តិបណ្ឌិត ស សុខា។ ប៉ុន្តែលិខិតនេះ ត្រូវបានគេមើលឃើញថា មានចំណុចមិនប្រក្រតីជាច្រើននៅក្នុងព្រះរាជក្រឹត្យនេះ​៕