ព័ត៌មានជាតិ

អភិបាលខេត្តកំពង់ចាម ជំរុញណែនាំឱ្យអភិបាលស្រុកថ្មី បន្តយកចិត្តទុកដាក់រឹតបន្តឹងបញ្ហាសន្តិសុខ សណ្ដាប់ធ្នាប់ និងខិតខំបម្រើសេវាឱ្យល្អ

បានផុស

២ years មុន

នៅ

ថ្ងៃចន្ទ ៩ កញ្ញា ២០២៤

ដោយ

កំពង់ចាម ៖ អភិបាលខេត្តកំពង់ចាម ជំរុញណែនាំឲ្យអភិបាលស្រុកបាធាយ និងស្រុកកំពង់សៀមថ្មី បន្តយកចិត្តទុកដាក់រឹតបន្តឹងបញ្ហាសន្តិសុខ សុវត្ថិភាព សណ្ដាប់ធ្នាប់សាធារណៈ និងខិតខំបំរើសេវាសាធារណៈ ជូនប្រជាពលរដ្ឋឲ្យកាន់តែល្អប្រសើរបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាស ក្នុងពិធីប្រកាសចូលកាន់តំណែង អភិបាល នៃគណៈអភិបាលស្រុកបាធាយថ្មី និងស្រុកកំពង់សៀមថ្មី លោក អ៊ុន ចាន់ដា អភិបាលខេត្តកំពង់ចាម បានមានប្រសាសន៍ណែនាំ ដល់លោកអភិបាលស្រុកបាធាយ និងលោកអភិបាលស្រុកកំពង់សៀមដែលទើបឡើងកាន់តំណែងថ្មី សូមបន្តយកចិត្តទុកដាក់រឹតបន្តឹងបញ្ហាសន្តិសុខ សុវត្ថិភាព សណ្ដាប់ធ្នាប់សាធារណៈ និងខិតខំបម្រើសេវាសាធារណៈ ជូនប្រជាពលរដ្ឋ ឲ្យបានល្អប្រសើរ ។ ពិធីនេះ ក៏មានការអញ្ជើញចូលរួម លោក ខ្លូត ផន ប្រធានក្រុមប្រឹក្សាខេត្ត និងឯកឧត្តម អភិបាលរងខេត្ត លោកលោកស្រីជាប្រធាន អនុប្រធានមន្ទីរ អង្គភាព ជុំវិញខេត្ត កងកម្លាំងទាំងបី និងមន្ត្រីរាជការ នៃរដ្ឋបាលស្រុកទាំង២ជាច្រើនរូប។

លោក អ៊ុន ចាន់ដា អភិបាលខេត្តកំពង់ចាម បានជំរុញឲ្យក្រុមប្រឹក្សាស្រុក គណៈអភិបាលស្រុក មន្ត្រីរាជការ កងកម្លាំងប្រដាប់អាវុធ សូមផ្តល់ការគាំទ្រ និងរួមសហការជាមួយ លោកអភិបាលស្រុកទាំងពីរ ដែលទទួលការតែងតាំងថ្មី រឹតបន្តឹងបញ្ហាសន្តិសុខ សុវត្ថិភាព សណ្ដាប់ធ្នាប់សាធារណៈ លុបបំបាត់ឱ្យបានជាអតិបរមា នូវ បទល្មើសគ្រប់ប្រភេទ ជាពិសេស បញ្ហាគ្រឿងញៀន បញ្ហាក្មេងទំនើង បញ្ហាចរាចរណ៍ និងបន្តការអនុវត្តឱ្យបានម៉ឺងម៉ាត់ នូវគោលនយោបាយភូមិឃុំ សង្កាត់ មានសុវត្ថិភាព របស់រាជរដ្ឋាភិបាល ដើម្បី រួមគ្នាថែរក្សា ការពារ សន្តិភាព ស្ថិរភាព សន្តិសុខសណ្តាប់ធ្នាប់សង្គម និងខិតខំរួមសាមគ្គីគ្នា ធ្វើការអភិវឌ្ឍស្រុកបាធាយ និងស្រុកកំពង់សៀមនេះ ឱ្យមានការរីកចម្រើនលើគ្រប់វិស័យជាបន្តទៀត។

យោងតាមតាមអនុក្រឹត្យ របស់រាជរដ្ឋាភិបាលកម្ពុជា លេខ ៨៨៩ អនក្រ.តត ចុះថ្ងៃទី០២ ខែកញ្ញា ឆ្នាំ២០២៤ បានផ្លាស់ប្តូរ លោក អូត ឈាងលី ពីអភិបាលនៃគណៈអភិបាល ស្រុកជើងព្រៃ មកកាន់តំណែង ជាអភិបាលនៃគណៈអភិបាល ស្រុកបាធាយ ជំនួស លោក ផេន សុផល ដែលកាន់ភារកិច្ចថ្មី ដោយឡែក លោក ទុន ណេត ពីអភិបាលនៃគណៈអភិបាល ស្រុកស្ទឹងត្រង់ មកកាន់តំណែង ជាអភិបាលនៃគណៈអភិបាលស្រុកកំពង់សៀម ជំនួសលោក ប៊ិន ឡាដា ដែលទៅកាន់មុខតំណែងជាអភិបាលស្រុកស្រីសន្ធរវិញ៕

អត្ថបទនិងរូបភាព ៖ ឡេក ចាន់ពេជ្រ