ក្រសួងមុខងារសាធារណៈ ចាប់ផ្តើមអនុវត្តវិធានការគន្លឹះទី៣ ក្នុងការកែទម្រង់រដ្ឋបាលសាធារណៈ

ដើម្បីអនុវត្តកម្មវិធីការកែទម្រង់រដ្ឋបាលសាធារណៈ ក្រសួងមុខងារសាធារណៈ ក្នុងនាមជាសេនាធិការរបស់រាជរដ្ឋាភិបាល និងជាលេខាធិការដ្ឋាន នៃគណៈកម្មាធិការជាតិជំរុញការអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី៧ នៃរដ្ឋសភា (គ.វ.រ.) បានដឹកនាំការអនុវត្តវិធានការគន្លឹះចំនួន៣ គឺ ១.ការកែលម្អប្រព័ន្ធជ្រើសរើសមន្ត្រីចូលបម្រើការងារក្នុងរដ្ឋបាលសាធារណៈ ២.ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារ និង៣.ការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្ម។

ឆ្លើយតបជាមួយការអនុវត្តវិធានគន្លឹះទី៣ នៃកម្មវិធីកំណែទម្រង់រដ្ឋបាលសាធារណៈ ក្រសួងមុខងារសាធារណៈ បានរៀបចំសិក្ខាសាលាផ្សព្វផ្សាយ ស្តីពី «ការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្ម នៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី៧ នៃរដ្ឋសភា ក្នុងក្របខណ្ឌលេខាធិការដ្ឋាននៃ គ.វ.រ.»។ សិក្ខាសាលានេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃ គ.វ.រ. នារសៀលថ្ងៃទី០៦ ខែវិច្ឆិកា ឆ្នាំ២០២៤ នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) នៃសាកលវិទ្យាល័យភូមិន្ទភ្នំពេញ។

ឯកឧត្តមឧបនាយករដ្ឋមន្ត្រី ហ៊ុន ម៉ានី បានមានប្រសាសន៍សាជាថ្មីថា ឯកឧត្តមពិតជាមានភ័ព្វសំណាង ដោយមានថ្នាក់ដឹកនាំ និងមន្ត្រីរាជការនៃក្រសួងមុខងារសាធារណៈ ជាសេនាធិការដែលមានឆន្ទៈ និងបទពិសោធ ប្រកបដោយស្មារតីទទួលខុសត្រូវខ្ពស់ រួមទាំងស្មារតីសាមគ្គីឯកភាពផ្ទៃក្នុងខ្ពស់ ដែលជាកត្តានាំឱ្យក្រសួងសម្រេចបាននូវសមិទ្ធកម្ម ដែលជាភាពជោគជ័យជាបន្តបន្ទាប់។ ដូច្នេះ ទើបមានការរៀបចំឱ្យមានការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្ម ដែលជាផ្នែកមួយនៃការកែទម្រង់រដ្ឋបាលសាធារណៈ ជាការតបស្នងការខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការ ដែលបានចូលរួមចំណែកក្នុងការកែទម្រង់រដ្ឋបាលសាធារណៈ ដើម្បីរៀបចំប្រព័ន្ធរដ្ឋបាលសាធារណៈ មួយដែលមានសមត្ថភាពខ្ពស់ ខ្លាំង ទំនើប ឆ្លាតវៃ ស្អាតស្អំ សម្រាប់អ្នកជំនាន់ក្រោយ។

សូមបញ្ជាក់ថា សិក្ខាសាលានេះ មានគោលបំណងផ្សព្វផ្សាយជូនថ្នាក់ដឹកនាំ និងមន្ត្រីរាជការនៃក្រសួងមុខងារសាធារណៈ ពីគោលការណ៍ នីតិវិធី​ លក្ខណៈវិនិច្ឆ័យ និងយន្តការនៃការវាយតម្លៃ ការលើកទឹកចិត្ត និងវិធានការវិន័យ ក្នុងការអនុវត្តប្រព័ន្ធលើកទឹកចិត្តគាំទ្រសមិទ្ធកម្ម នៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នៃរដ្ឋសភា៕