អគ្គនាយកដ្ឋានអត្តសញ្ញាណកម្ម ៖ សំណុំរឿងកាត់ទោសជនជាតិចិនលាងលុយកខ្វក់នៅអាម៉េរិកពុំមានសញ្ជាតិខ្មែរទេ

អគ្គនាយកដ្ឋានអត្តសញ្ញាណកម្ម ស្នើវិទ្យុបារាំងអន្តរជាតិ ខេមរភាសា (RFI Khmer) ធ្វើការកែតម្រូវព័ត៌មានដែលចុះផ្សាយថា សហរដ្ឋអាម៉េរិក បានកាត់ទោសជនជាតិចិន ៣នាក់ នៅក្នុងសំណុំរឿងលាងលុយកខ្វក់ ៧៣ លានដុល្លារ ហើយក្នុងចំណោមនោះជនជាតិចិនម្នាក់មានសញ្ជាតិខ្មែរម្នាក់។ ស្ថាប័នដដែលបញ្ជាក់ថា ក្នុងចំណោមជនជាតិចិនទាំង៣នាក់នោះ ពុំមានសញ្ជាតិខ្មែរដូចការចុះផ្សាយឡើយ។

ការស្នើនេះ បន្ទាប់ពីទី វិទ្យុបារាំងអន្តរជាតិ ខេមរភាសា (RFI Khmer) កាលពីថ្ងៃ ១៣ ខែវិច្ឆិកា ឆ្នាំ២០២៤ បានចេញផ្សាយនូវព័ត៌មានដែលមានខ្លឹមសារអំពីការកាត់ទោសជនជាតិចិន និងបក្សពួកសរុបចំនួន ៣នាក់ នៅក្នុងសំណុំរឿងលាងលុយកខ្វក់នៅសហរដ្ឋអាម៉េរិក។ ក្នុងនោះ វិទ្យុបារាំងអន្តរជាតិ ក៏បានលើកឡើងថា ក្នុងចំណោមជនល្មើសដែលត្រូវបានចាប់ខ្លួនទាំង ៣នាក់នោះ មានម្នាក់ឈ្មោះ Daren Li ជាជនជាតិចិនមានសញ្ញាតិខ្មែរ។

សេចក្តីបំភ្លឺរបស់អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ  ចុះថ្ងៃទី​១៤ ខែវិច្ឆិកានេះ បានបញ្ជាក់ជូនថា ឈ្មោះ Daren Li ធ្លាប់ចេញចូលប្រទេសកម្ពុជា ប៉ុន្តែឈ្មោះនេះពុំមានសញ្ញាតិខ្មែរទេ។ ផ្អែកតាមព័ត៌មានដែលបានចុះផ្សាយ ដោយគេហទំព័រផ្លូវការរបស់ក្រសួងយុត្តិធម៌ សហរដ្ឋអាម៉េរិក (U.S. Department of Justice) កាលពីថ្ងៃអង្គារ ទី១២ ខែវិច្ឆិកា ឆ្នាំ២០២៤ ពុំមានខ្លឹមសារណាមួយដែលបញ្ជាក់ថា ឈ្មោះ Daren Li មានសញ្ជាតិខ្មែរនោះទ ដោយគ្រាន់តែបានបញ្ជាក់ថា ជននោះធ្លាប់ស្នាក់នៅកម្ពុជាតែប៉ុណ្ណោះ។

សេចក្តីបំភ្លឺដដែលឱ្យដឹងថា៖«ការផ្សាយព័ត៌មានដែលមិនត្រឹមត្រូវដោយវិទ្យុបារាំងអន្តរជាតិ ខេមរភាសា (RFI Khmer) អាចធ្វើឱ្យសាធារណមតិយល់ច្រឡំ និងប៉ះពាល់ដល់ កេរ្តិ៍ឈ្មោះរបស់ប្រទេសកម្ពុជា។ ក្នុងន័យនេះ អគ្គនាយកដ្ឋានអត្តសញ្ញាណកម្ម សូមស្នើ វិទ្យុបារាំងអន្តរជាតិ ខេមរភាសា ធ្វើការកែតម្រូវព័ត៌មានខាងលើ និងចូលរួមទប់ស្កាត់ការផ្សាយព័ត៌មានមិនពិត ឬការលាបពណ៌ផ្សេងៗក្នុងចេតនាទុច្ចរិត ដែលធ្វើឱ្យប៉ះពាល់ដល់កិត្យានុភាពរបស់ប្រទេសកម្ពុជា»។

អគ្គនាយកដ្ឋានអត្តសញ្ញាណកម្ម សូមធ្វើការកត់សម្គាល់ថា ប៉ុន្មានខែចុងក្រោយនេះ មានការព្យាយាម ផ្សព្វផ្សាយព័ត៌មានមិនពិត និងព័ត៌មានក្លែងក្លាយមួយចំនួនអំពីប្រទេសកម្ពុជា ដោយក្រុមជនទុច្ចរិតមួយក្ដាប់តូចដែលមានបំណងសម្អុយឈ្មោះ និងធ្វើឱ្យប៉ះពាល់ដល់កេរ្តិ៍ឈ្មោះរបស់ប្រទេសកម្ពុជាលើឆាកអន្តរជាតិ។

ដើម្បីចូលរួមចំណែកលើកស្ទួយកិត្យានុភាពរបស់ជាតិ អគ្គនាយកដ្ឋានអត្តសញ្ញាណកម្ម សូមសំណូមពរដល់បងប្អូនអ្នកសារព័ត៌មាននានា មេត្តាជួយផ្សព្វផ្សាយនូវព័ត៌មានពិតប្រាកដ ដែលឆ្លុះបញ្ចាំងអំពីទិដ្ឋភាពជាក់ស្ដែង និងចំណុចវិជ្ជមានជាច្រើនអំពីប្រទេសកម្ពុជាដែលរាជរដ្ឋាភិបាល និងប្រជាពលរដ្ឋកម្ពុជាខិតខំប្រឹងប្រែងសម្រេចបាននាពេលកន្លងមក៕