អភិបាលខេត្តបាត់ដំបង ចុះពិនិត្យស្ថានភាព​បង្កបង្កើន​ស្រូវ​កសិករនៅ​ស្រុក​ចំនួន ៣ ក្នុង​ខេត្ត​បាត់ដំបង

លោក សុខ លូ អភិបាលនៃគណៈអភិបាលខេត្តបាត់ដំបង បាន​ចុះពិនិត្យស្ថានភាព​ការងារបង្កបង្កើនផលស្រូវប្រាំងឆ្នាំ២០២៥ និងពិនិត្យលទ្ធភាពអាងស្តុកទឹកសម្រាប់ការស្រោចស្រព ក្នុងស្រុកថ្មគោល ស្រុកបវេល និងស្រុកបាណន់ ។  

សមាសភាពចូលរួមក៏​មានមន្រ្តីមកពី​មន្ទីរ​កសិកម្មខេត្ត​ មន្ទីរធនធានទឹក និងឧតុនិយម មន្ទីរអភិវឌ្ឍន៍ជនបទ អភិបាលស្រុកថ្មគោល អភិបាលស្រុកបវេល អភិបាលស្រុកបាណន់ ​រួមទាំង​ប្រធានការិយាល័យកសិកម្ម ធនធានធម្មជាតិនិងបរិស្ថានស្រុកថ្មគោល បវេល និងបាណន់ និងអាជ្ញាធរដែនដី។ 

គណៈប្រតិភូបានចុះពិនិត្យតំបន់ផលិតកម្មស្រូវ ១. តំបន់តេជោសែនអូរតាគី ឃុំអូរតាគី នៃស្រុកថ្មគោល ២. ពិនិត្យស្ថានភាពទឹក សំណង់ស្ទាក់ទឹកស្ថិតក្នុងឃុំបវេល និងស្ថានភាពដំណាំស្រូវភូមិសៀម ឃុំអំពិលប្រាំដើម ៣. សំណង់ស្ទាក់ទឹកតាហែន នៃឃុំក្តុលតាហែន ស្រុកបវេល និង ៤. ប្រព័ន្ធធារាសាស្រ្តអាងស្តុកទឹកកំពីងពួយ ដែលស្ថិតនៅឃុំតាគ្រាម ស្រុកបាណន់ ខេត្តបាត់ដំបង។ 

ជាលទ្ធផលឃើញថា ការងារបង្កបង្កើនផលស្រូវ ក្នុងឃុំអូរតាគី មានផ្ទៃដីផលិតកម្មស្រូវ OM ចំនួន​ ១.២៨៨ ហិកតា ស្រូវស្រង៉ែចំនួន ៥.០៩០ ហិកតា និង ស្រូវសែនក្រអូប ចំនួន ៨៦ហិកតា ។ យោងតាមរបាយការណ៍ស្រុកឃើញថាស្រូវទុំប្រមាណ៣០% ស្រូវក្នុងដំណាក់កាលចេញផ្កា២០% និងដំណាក់កាលផើមមានប្រមាណ ៥០%។ 

ប្រភពទឹកសម្រាប់ស្រោចស្រពមកពីអាងស្តុកទឹកកំពីងពួយ ហើយស្រូវមួយចំនួនធំនិងអាចស្រោចស្រពបាន។ ផ្ទៃដីដាំដុះសរុបក្នុងស្រុកបវេល មានចំនួន ៥២.៣៥៨ ហិកតា ក្នុងនោះស្រូវបង្កើនរដូវមាន ១៧.១៩៩ ហិកតា និងស្រូវប្រាំងចំនួន ២.៨៧៥ ហិកតា ។ ក្នុងនោះផ្ទៃដីដំណាំស្រូវដែលមានអាយុពី ៣០ ដល់ ៤៥ថ្ងៃ ដែលស្ថិតក្នុងឃុំអំពិលប្រាំដើម កំពុងត្រូវការទឹកមានចំនួនប្រមាណ ១៥០ ហិកតា ហើយបច្ចុប្បន្នអាងស្ទាក់ទឹកនៃស្ទឹងបវេល មិនមានលទ្ធភាពផ្គត់ផ្គង់ទឹកសម្រាប់ស្រោចស្រពបានទេ ។ សម្រាប់ប្រព័ន្ធស្រោចស្រពអាងកំពីងពួយអាចមានលទ្ធភាព ស្រោចស្រពស្រូវតំបន់ខ្លះនៃស្រុកថ្មគោល និងស្រុកបាណន់ ដែលនឹងត្រូវផ្តល់ម្តងទៀតនៅចុងខែកុម្ភៈ ដោយមន្ទីរធនធានទឹក និងឧតុនិយម៕

អត្ថបទ៖ សោ និយមរ័ត្ន