ព័ត៌មានជាតិ

ក្រសួងការងារ តម្រូវឱ្យម្ចាស់សហគ្រាស យកចិត្តទុកដាក់ និងការពារ ជាពិសេសចំពោះកម្មករ-និយោជិតជាស្ត្រីមានផ្ទៃពោះ

បានផុស

២ សប្តាហ៍ មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានធ្វើណែនាំដល់ម្ចាស់ ឬ នាយកសហគ្រាស គ្រឹះស្ថាន និងកម្មករ-និយោជិតទាំងអស់ យកចិត្តទុកដាក់ និងការពារជាពិសេសចំពោះកម្មករ-និយោជិតជាស្ត្រីមានផ្ទៃពោះ ដើម្បីចូលរួមលើកកម្ពស់សុខុមាលភាព និងធានានូវលក្ខខណ្ឌការងារល្អប្រសើរ។

នៅក្នុងសេចក្តីណែនាំស្តីពីការការពារ ជាពិសេសចំពោះកម្មករ-និយោជិតជាស្ត្រីមានផ្ទៃពោះដែលទើបទទួលបាននៅថ្ងៃទី ១៤ កុម្ភៈនេះ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា យោងអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់កម្មករ-និយោជិតជាស្ត្រី និងដើម្បីធានា នូវលក្ខខណ្ឌការងារល្អប្រសើរ ជាពិសេសសម្រាប់កម្មករ-និយោជិតជាស្ត្រីមានផ្ទៃពោះ ម្ចាស់ ឬ នាយកសហគ្រាស គ្រឹះស្ថាន និងកម្មករ-និយោជិតទាំងអស់ មិនត្រូវរើសអើងចំពោះកម្មករ-និយោជិតជាស្ត្រីមានផ្ទៃពោះក្នុងការទទួលបានឱកាសការងារ ការបន្តកិច្ចសន្យាការងារ និងការដំឡើងប្រាក់ឈ្នួល និងអត្ថប្រយោជន៍ផ្សេងៗ ឡើយ។

ត្រូវបើកផ្តល់ប្រាក់ឈ្នួលសរុបអំឡុងពេលសម្រាកលំហែមាតុភាពជូនកម្មករ-និយោជិតជាស្ត្រីមានផ្ទៃពោះ ឱ្យបានមុនពេលសម្រាកលំហែមាតុភាព។ មិនត្រូវព្យួរកិច្ចសន្យាការងារកម្មករ-និយោជិតជាស្ត្រីមានផ្ទៃពោះ ឬ កម្មករ-និយោជិតជាស្ត្រីក្នុង រយៈពេល ៩ ខែ ក្រោយការសម្រាកលំហែមាតុភាព លើកលែងតែជាការព្យួរកិច្ចសន្យាការងារទាំងស្រុងនៅក្នុងផ្នែកណាមួយ នៃសហគ្រាស គ្រឹះស្ថាន ឬកម្មករ-និយោជិតទាំងអស់។ ត្រូវបានលើកទឹកចិត្តឱ្យបន្តកិច្ចសន្យាការងារដោយស្វ័យប្រវត្តិចំពោះកម្មករ-និយោជិតជាស្ត្រីមានផ្ទៃពោះ ឬកម្មករ-និយោជិតជាស្ត្រីក្នុងរយៈពេល ១ ឆ្នាំ ក្រោយសម្រាលកូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រី បានណែនាំទៀតថា ហាមឃាត់រាល់ការបញ្ឈប់ពីការងារចំពោះកម្មករ-និយោជិតជាស្ត្រីមានផ្ទៃពោះ ឬ កម្មករ-និយោជិត ជាស្ត្រីក្នុងរយៈពេល ១ ឆ្នាំ ក្រោយសម្រាលកូន លើកលែងតែមានការប្រព្រឹត្តកំហុសធ្ងន់។ ត្រូវស្នើសុំការពិនិត្យ និងសម្រេចជាមុនពីអធិការការងារក្នុងការបញ្ឈប់ពីការងារចំពោះកម្មករ-និយោជិតជាស្ត្រីមានផ្ទៃពោះ ឬ កម្មករ-និយោជិតជាស្ត្រីក្នុងរយៈពេល ១ ឆ្នាំ ក្រោយសម្រាលកូន។ ក្នុងករណី ម្ចាស់ ឬ នាយកសហគ្រាស គ្រឹះស្ថាន មិនអនុវត្តតាមវិធានការណែនាំនេះ ត្រូវទទួលរងការផ្ដន្ទាទោសស្របតាមច្បាប់ និងបទប្បញ្ញត្តិជាធរមាន៕

អត្ថបទ ៖ សំអឿន