សួន​​​ច្បារ​កណ្តាល​ក្រុងបាត់ដំបង នឹង​បញ្ចប់​​រួចរាល់ ក្រោយបើកការដ្ឋានសាងសង់​ជាង​មួយ​ខែ

“សួនតេជោសន្តិភាព នៅ​ក្នុងក្រុងបាត់ដំបង បានចេញជារូបរាងជាអន្លើៗ ខណៈនៅព្រឹកថ្ងៃទី១០ ខែមីនានេះ លោក សុខ លូ អភិបាលនៃគណៈអភិបាលខេត្តបាត់ដំបង បានចុះត្រួតពិនិត្យវឌ្ឍនភាពនៃការងារសាងសង់សួនតេជោសន្តិភាព ដើម្បី​បន្តជំរុញដល់​ការសាងសង់ឱ្យបានឆាប់រហ័ស បន្ទាប់ពីបានបើកការដ្ឋានសាងសង់ឡើង​កាលពី​ថ្ងៃទី ១៨ ខែកុម្ភៈ ឆ្នាំ២០២៥ កន្លងមក។

ការចុះពិនិត្យនេះ អភិបាលខេត្តបានផ្តោតត្រួតពិនិត្យលើការសាងសង់ដូចជា ផ្លូវថ្មើរជើង ផ្លូវជិះកង់ ការរៀបចំកន្លែងអង្គុយ​លំហែកម្សាន្ត ស្រូបខ្យល់អាកាស កន្លែងហាត់ប្រាណ ក្នុងបរិវេណ “សួនតេជោសន្តិភាព” ជាដើម។ ការពន្លឿនក្នុងការ សាសង់នេះ គឺក្នុងគោលបំណងឲ្យប្រជាពលរដ្ឋ និងមហាជន ជាពិសេសភ្ញៀវបរទេស បានមកកម្សាន្ត លំហែកាយ ឲ្យបានកា ន់តែឆាប់ ដែលជាគោលដៅទេសចរណ៍ថ្មីមួយទៀតនៅក្នុងក្រុងបាត់ដំបង។

បើតាម​មន្ត្រីនៃមន្ទីរទេសចរណ៍ខេត្តបាត់ដំបង​បាន​ឲ្យ​ដឹង​ថា សួនតេជោសន្តិភាពដែលកំពុងសាងសង់ថ្មីនេះ នឹង​អាច​ជួយ​ទាក់​ទាញកំណើនដល់អ្នកទេសចរជាតិនិងអន្តរជាតិ មកលេងទស្សនាកម្សាន្តបន្ថែមទៀត ក្នុងការអង្គុយកម្សាន្តគយគន់ ដងស្ទឹងសង្កែ ក៏ដូចជាបានគយគន់ សាលាខេត្តបាត់ដំបងដ៏វ័យចំណាស់ក្នុងប្រវត្តិសាស្ត្រផងដែរ។

សួនតេជាសន្តិភាពមានទីតាំងស្ថិតនៅកណ្តាលក្រុងបាត់ដំបង នៅចំណុចក្បាលស្ពានថ្មដែកចាស់អតីតមុខសាលាខេត្តបាត់ដំបង​៕

អត្ថបទ៖ សៅ សារិទ្ធ