ព័ត៌មានជាតិ

សហគមន៍ចំនួនពីរក្នុងខេត្តបាត់ដំបង បន្តទទួលការគាំទ្រ ក្នុងការដាំដុះបន្លែសរីរាង្គមិនប៉ះពាល់សុខភាព

បានផុស

១ year មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

ប្រជាសហគមន៍នៅស្រុកគោលដៅចំនួនពីរនៅក្នុងខេត្តបាត់ដំបង សប្បាយចិត្តចំពោះម្ចាស់ជំនួយ “IFAD” ដែលនៅតែបន្តយកចិត្តទុកដាក់ ក្នុងការជួយគាំទ្រដល់សហគមន៍ក្នុងការដាំដុះបន្លែសរីរាង្គ។

ប្រជាកសិករ ក្នុងសហគមន៍កសិកម្មចំនួន ២ នៅក្នុងស្រុកឯកភ្នំ និងស្រុកថ្មគោល ខេត្តបាត់ដំបង បានសាទរចំពោះដំណើរទស្សនកិច្ចរបស់មន្ត្រីជាន់ខ្ពស់របស់ម្ចាស់ជំនួយ “IFAD” និងថ្នាក់ដឹកនាំគម្រោងចំនួន ៣ ក្នុងនោះមាន (AIMS, ASPIRE-AT, និង SAAMBAT) ដែលប្រកាសថានឹងនៅតែបន្តជួយដល់សហគមន៍ក្នុងការបង្កើនផលិតកម្ម ដើម្បីពង្រឹងសេដ្ឋកិច្ចក្នុងគ្រួសារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងសហគមន៍បានលើកឡើងថា ការជួយគាំទ្របង្កើនផលិតកម្ម ការស្វែងរកទីផ្សារ រួមទាំងការជួយកសាងផ្លូវសម្រួលដល់ការដឹកជញ្ជូនកសិផលចូលក្នុងទីផ្សារ បានបង្កើនកម្រិតសេដ្ឋកិច្ចក្នុងគ្រួសារកសិករក្នុងសហគមន៍កាន់តែប្រសើរឡើង។

តំណាងសហគមន៍ទាំងពីរលើកឡើងប្រហាក់ប្រហែលគ្នា ក្នុងការបន្តឆន្ទៈខិតខំពង្រឹងការដាំដុះទាំងបរិមាណ និងគុណភាព និងស្តង់ដារអនាម័យខ្ពស់ក្នុងការប្រកួតប្រជែងលើទីផ្សារ ដើម្បីលើកកម្ពស់កសិផលឲ្យក្លាយជាបន្លែសិរីរាង្គជួយដល់សុខភាពមនុស្សទូទៅ ដោយមិនប្រឈមនិងផលប៉ះពាល់ដល់សុខភាព។

មន្ត្រីនៃមន្ទីរពាណិជ្ជកម្មខេត្តបាត់ដំបងបានឲ្យដឹងថា ដំណើរការទស្សន:កិច្ចរបស់មន្ត្រីជាន់ខ្ពស់របស់អង្គការខាងលើនេះ បានធ្វើឡើងកាលពីថ្ងៃទី២៥-២៦ ខែមីនា ឆ្នាំ២០២៥។

តាមរយៈការចុះជួបផ្ទាល់ជាមួយកសិករដែលទទួលផលរបស់គម្រោងមានទីតាំងពីរផ្សេងគ្នា គឺនៅសហគមន៍ភូមិតាសី ឃុំតាម៉ឺន ស្រុកថ្មគោល និងសហគមន៍ភូមិព្រែកឆ្តោរ ក្នុង ឃុំពាមឯក ស្រុកឯកភ្នំ ខេត្តបាត់ដំបង៕

អត្ថបទ៖ សៅ សារិទ្ធ