ព័ត៌មានជាតិ

អ្នកពាក់ព័ន្ធដោលប្រយោល៦៨នាក់ ជាមួយប្ដីប្រពន្ធឆ្លងកូវីដ នៅខេត្តកំពង់ឆ្នាំង កំពុងយកសំណាកទៅធ្វើតេស្ត

បានផុស

៥ years មុន

នៅ

ថ្ងៃពុធ ២៤ មីនា ២០២១

ដោយ

បន្ទាប់ពីសង្ស័យមានការចម្លងកូវីដ-១៩ ទៅលើប្រជាពលរដ្ឋជាច្រើន នៅក្នុងមូលដ្ឋាន ដោយសារតែកាលពីយប់ថ្ងៃទី១៩ ខែមីនា ឆ្នាំ ២០២១ មានប្រជាពលរដ្ឋ២នាក់ប្ដីប្រពន្ធជាម្ចាស់ចម្ការ បានមកពីក្រុងភ្នំពេញមកមើលចម្ការរបស់ពួកគេ ស្ថិតនៅក្នុងភូមិទ័ពត្បែង ឃុំពង្រ ស្រុករលាប្អៀរ ដែលពួកគេទាំង២ នាក់មានផ្ទុក មេរោគកូវីដ-១៩ រួចទៅហើយ បានចេញចូលក្នុងផ្សារពង្រខាងលើនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ប្រាក់ វ៉ុន ប្រធាន មន្ទីរសុខាភិបាលខេត្តកំពង់ឆ្នាំងបានឲ្យដឹងថា កាលពីល្ងាចថ្ងៃទី២៣ ខែមីនា ឆ្នាំ២០២១ បន្ទាប់ពីមានព្រឹត្តិការណ៍ខាងលើនេះកើតឡើង ក្រុមការងារមន្ទីរសុខាភិបាលខេត្តបានចុះទៅដល់ទីតាំងកើតហេតុ និងបានឈរជើងនៅក្នុងមូលដ្ឋាននោះ ដោយបានកំណត់មុខសញ្ញាជាប់ពាក់ព័ន្ធផ្ទាល់ជាមួយនឹងអ្នកកើតកូវីដ១៩ ចំនួន១១នាក់ ដែលមកពី៣ ស្រុកក្រុង ក្នុងខេត្តកំពង់ ឆ្នាំង គឺស្រុករលារប្អៀរ ស្រុកបរិបូណ៍ និងក្រុងកំពង់ឆ្នាំង។

ដោយឡែកអ្នកពាក់ព័ន្ធទាំង១១ នាក់ខាងលើនេះ ក៏មានក្រុមគ្រួសារដែលបានប៉ះពាល់ដោយប្រយោល គឺក្រុមការងារមន្ទីរសុខាភិបាលក៏បានប្រមូលពួកគាត់ទាំងអស់មកយកសំណាកទៅធ្វើតេស្តផងដែរ ដូច្នេះពេលបិទបញ្ជីថ្ងៃល្ងាចសរុបអ្នកពាក់ព័ន្ធទាំងអស់មានចំនួន ៦៨នាក់ ក្នុងនោះមានស្រី៣៤នាក់ ដែលសំណាកទាំងអស់ ត្រូវបានបញ្ជូនទៅទីក្រុងភ្នំពេញ ចំណែកលទ្ធផល ត្រូវរង់ចាំពី១ថ្ងៃទៅ២ថ្ងៃ ទៅតាមបរិមាណសំណាកនៅក្នុងបាស្ទ័រ ថាតើមានចំនួនច្រើនឬតិច។

ដោយឡែកនៅល្ងាចថ្ងៃទី២៣ ខែមីនា ឯកឧត្តម ឈួរ ច័ន្ទឌឿន អភិបាលខេត្ត ជាប្រធានគណៈកម្មការកូវីដខេត្ត លោកបានកោះប្រជុំជាបន្ទាន់ ដោយលោកបានកំណត់នៅវិធានការយ៉ាងម៉ឺងម៉ាត់ ដោយត្រូវតែបន្តតាមរកអ្នកដែលពាក់ព័ន្ធផ្ទាល់ដើម្បីយកមកដាក់ធ្វើចត្តាឡីស័កឲ្យបានម៉ត់ចត់ល្អ ជៀសវាងការលួចគេចវេះពីកន្លែងធ្វើចត្តាឡីស័ក នឹងត្រូវស្រាវជ្រាវរកក្រុមគ្រួសារដែលពាក់ព័ន្ធទាំងអស់ ដើម្បីមកយកសំណាកទៅធ្វើតេស្តជាបន្ទាន់ផងដែរ ៕

អត្ថបទ៖ ឈៀង ថារិទ្ធ

សូមចុចអាន៖ បិទផ្សារពង្រក្នុងខេត្តកំពង់ឆ្នាំង ខណៈអ្នកពាក់ព័ន្ធបុគ្គលឆ្លងកូវីដ កើនឡើងដល់ ១១ នាក់