ព័ត៌មានជាតិ

នៅអាស៊ានមានតែកម្ពុជាមិនទាន់ដាក់កាតព្វកិច្ចទិញធានារ៉ាប់រង លើអ្នកប្រើប្រាស់យានយន្តឯកជន

បានផុស

៣ ខែ មុន

នៅ

ថ្ងៃពុធ ២៣ មេសា ២០២៥

ដោយ

លោកស្រី ហោ សុវឌ្ឍនា អគ្គនាយករង នៃនិយ័តករធានារ៉ាប់រងកម្ពុជាបានថ្លែងថា ប្រទេសកម្ពុជាបានដាក់ឲ្យអនុវត្តជាកាតព្វកិច្ចលើការទិញធានារ៉ាប់រងលើការប្រើប្រាស់យានយន្តប្រកបអាជីវកម្ម ដែលសម្តៅលើយានយន្តដឹកអ្នកដំណើរ និងដឹកទំនិញ ដោយសារមើលឃើញហានិភ័យ និងភាពប្រឈមនៃការកើតមានគ្រោះថ្នាក់នៃការប្រើប្រាស់យានយន្តទាំងនោះនៅលើដងផ្លូវ។

ថ្លែងនៅក្នុងវេទិកាចែករំលែកព័ត៌មានអំពី «បច្ចុប្បន្នភាពនៃទីផ្សារធានារ៉ាប់រងនៅកម្ពុជាជាមួយក្លិបអ្នកកាសែតកម្ពុជា» លោកស្រី ហោ សុវឌ្ឍនា បានគូសបញ្ជាក់ថា ធានារ៉ាប់រងរថយន្តផ្តល់ការការពារផ្នែកហិរញ្ញវត្ថុចំពោះការបាត់បង់ ឬការខូចខាតដែលមិនបានរំពឹងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ហោ សុវឌ្ឍនា អគ្គនាយករង នៃនិយ័តករធានារ៉ាប់រងកម្ពុជា

លោកស្រីបញ្ជាក់ថា បច្ចុប្បន្នសម្រាប់ធានារ៉ាប់រងយានយន្តមានតែអនុវត្តលើយានយន្តប្រកបអាជីវកម្មដែលជារថយន្តដឹកជញ្ជូន និងរថយន្តដឹកនាំអ្នកដំណើរ (រថយន្តបឺសនិងតាក់ស៊ី) ដែលចែងក្នុងច្បាប់មានកាតព្វកិច្ចទិញធានារ៉ាប់រង។

ទោះបីក្នុងច្បាប់បានចែងឲ្យម្ចាស់រថយន្តដឹកជញ្ជូន និងរថយន្តដឹកនាំអ្នកដំណើរ ត្រូវមានកាតព្វកិច្ចទិញធានារ៉ាប់រង ប៉ុន្តែការអនុវត្តនៅមានកម្រិត។ ដូច្នេះទើបអាជ្ញាធរតែងតែផ្សព្វផ្សាយដើម្បីម្ចាស់យានយន្តបានយល់ពីផ្លូវច្បាប់លើការប្រើប្រាស់រថយន្តឲ្យបានត្រឹមត្រូវ ដើម្បីបង្ការពេលមានគ្រោះថ្នាក់ ដែលមានក្រុមហ៊ុនធានារ៉ាប់រងមានកាតព្វកិច្ចសម្របសម្រួលសងការខូចខាត។

ដោយឡែកពាក់ព័ន្ធយានយន្តឯកជន នៅមិនទាន់ច្បាប់ចងជាកាតព្វកចិ្ចឲ្យទិញធានារ៉ាប់រងនៅឡើយទេ។

លោកស្រី ហោ សុវឌ្ឍនា បញ្ជាក់ថា នៅអាស៊ានមានតែប្រទេសកម្ពុជា មិនទាន់ដាក់ឲ្យអនុវត្តកាតព្វកិច្ចការទិញធានារ៉ាប់រងលើការប្រើប្រាស់យានយន្តឯកជន ស្របពេលដែលអាជ្ញាធរកំពុងសិក្សាពីផ្លូវច្បាប់ និងការរៀបចំបទបញ្ញត្តិផ្សេងៗ ដើម្បីឈានដាក់ឲ្យអនុវត្តជាកាតព្វកិច្ចសម្រាប់យានយន្តឯកជននៅពេលខាងមុខ។

ការទិញធានារ៉ាប់រងរថយន្តផ្តល់ការការពារផ្នែកហិរញ្ញវត្ថុចំពោះការបាត់បង់ ឬការខូចខាតបណ្តាលមកពីគ្រោះថ្នាក់ផ្សេងៗ រួមទាំងផ្តល់ការការពារដល់តតិយជន (ភាគីទីបី) ផងដែរ៕