ព័ត៌មានជាតិ

អាជ្ញាធររាជធានីភ្នំពេញ ដឹកទឹកស្អាតចែកជូនពលរដ្ឋរស់នៅបុរី VIP ខណ្ឌដង្កោ ខណៈតំបន់នេះខ្វះទឹកស្អាតប្រើប្រាស់ ៣ ថ្ងៃ មកហើយ

បានផុស

៣ ខែ មុន

នៅ

ថ្ងៃចន្ទ ២៨ មេសា ២០២៥

ដោយ

អនុវត្តតាមការយកចិត្តទុកដាក់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា លោក ឃួង ស្រេង អភិបាល នៃគណៈអភិបាលរាជធានីភ្នំពេញ កាលពីព្រឹកថ្ងៃទី ២៨ មេសានេះ បានណែនាំឱ្យក្រុមការងាររដ្ឋបាលរាជធានីភ្នំពេញ ដឹកនាំរដ្ឋបាលខណ្ឌដង្កោ និងសហការដោយរដ្ឋាករស្វយ័តក្រុងភ្នំពេញ ដឹកទឹកស្អាតមកចែកជូនប្រជាពលរដ្ឋរស់នៅក្នុងបុរី VIP ស្ថិតនៅភូមិម៉ឺនត្រា សង្កាត់ស្ពានថ្ម ខណ្ឌដង្កោ ខណៈតំបន់នេះមានបញ្ហាខ្វះទឹកស្អាតប្រើប្រាស់ចំនួន ៣ ថ្ងៃ មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឆាយ វីរៈ អភិបាលរងរាជធានីភ្នំពេញ បានឱ្យដឹងនៅរសៀលថ្ងៃទី ២៨ មេសា នេះថា ប្រជាពលរដ្ឋរស់នៅក្នុងបុរី VIP ស្ថិតនៅភូមិម៉ឺនត្រា សង្កាត់ស្ពានថ្ម ខណ្ឌដង្កោ មានបញ្ហាខ្វះទឹកស្អាតប្រើប្រាស់ ទើបនៅព្រឹកថ្ងៃទី ២៨ ខែមេសា ឆ្នាំ ២០២៥ នេះ លោក ឃួង ស្រេង បានណែនាំឱ្យក្រុមការងាររដ្ឋបាលរាជធានីភ្នំពេញ ដឹកនាំរដ្ឋបាលខណ្ឌដង្កោ និងសហការដោយរដ្ឋាករស្វ័យក្រុងភ្នំពេញ ដឹកទឹកស្អាតមកចែកជូនប្រជាពលរដ្ឋរស់នៅក្នុងបុរីនេះ។

លោក ឆាយ វីរៈ ក៏បានបញ្ជាក់ផងដែរថា ប្រជាពលរដ្ឋរស់នៅក្នុងបុរី VIP ស្ថិតនៅភូមិម៉ឺនត្រា សង្កាត់ស្ពានថ្មនេះ តាមពិតទៅមានការផ្គត់ផ្គង់ទឹកហើយ តែមិនទាន់គ្រប់គ្រាន់ ទើបរដ្ឋបាលរាជធានីភ្នំពេញជួយបំពេញបន្ថែម ជួយពួកគាត់ ដើម្បីបន្តចែកចាយទៅប្រជាពលរដ្ឋដែលខ្វះខាតទឹកស្អាតប្រើប្រាស់។ រដ្ឋបាលរាជធានីភ្នំពេញ នឹងបន្តផ្គត់ផ្គង់រហូតដល់ពួកគាត់មានទឹកប្រើប្រាស់គ្រប់គ្រាន់ ទើបបញ្ឈប់ការផ្គត់ផ្គង់ជាបណ្ដោះអាសន្ននេះ៕

អត្ថបទ ៖ ស្រីរ័ត្ន