ព្រែកជីក​ហ្វូណន​តេជោ​ កាត់​ភូមិសាស្រ្ត​​ខេត្តកណ្តាល​ ​គ្រោង​បោះបង្គោល​​​ព្រំដីចំនួន ២៤០ ចាប់​ពីព្រែកពោធិ៍ដល់ព្រំប្រទល់ខេត្តតាកែវ

ក្រុមការងារបច្ចេកទេសនៃ​ក្រសួង​សាធារណការ​និងដឹកជញ្ជូន បានរៀបចំកិច្ចប្រជុំមួយ​ដើម្បីពិនិត្យលើផែនការសកម្មភាពការ​ចុះបោះបង្គោលព្រំដី តាមបណ្តោយព្រែក​ជីក​ហ្វូណន​តេជោសម្រាប់កំណាត់ទី​២ ក្នុងភូមិសាស្រ្តខេត្តកណ្តាល។

កិច្ចប្រជុំនេះ​ដឹកនាំដោយ លោក ម៉ក់ ស៊ីដេត អនុរដ្ឋលេខាធិការ ក្រសួង​សាធារណការ​និងដឹកជញ្ជូន និង​មានការចូលរួមពី​មន្រ្តីបច្ចេកទេសសម្រាប់ការ​ចុះពិនិត្យនិយាមកា និងធ្វើការផ្ទៀងផ្ទាត់ផែនទីសម្រាប់ទីតាំងភូមិសាស្ត្រ​ខេត្តកណ្តាល។

មន្រ្តីចូលរួមកិច្ចប្រជុំបាន​ឲ្យ​ដឹង​ថា កិច្ចប្រជុំនេះធ្វើឡើងក្នុងគោលបំណងដើម្បីពិនិត្យលើផែនការសកម្មភាពចុះបោះ​បង្គោល​ព្រំដី តាមបណ្តោយព្រែក​ជីក​ហ្វូណន​តេជោសម្រាប់កំណាត់ទី​២ ក្នុងភូមិសាស្រ្តខេត្តកណ្តាល ដោយចាប់ផ្តើមពីចំណុចភ្ជាប់ពីព្រែកពោធិ៍នៃទន្លេបា​សាក់ រហូតដល់ព្រំប្រទល់ខេត្តកណ្ដាលនិងខេត្តតាកែវ ដែលគ្រោងបោះបង្គោលសរុប ចំនួន ២៤០បង្គោល។

ការ​ចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែកជីក​ហ្វូណន​តេជោ ក្នុងភូមិសាស្រ្តខេត្តកណ្តាល ក្រុមការងារនឹងបែងចែកជា​ក្រុមតូចៗ​ចំនួន ៤ ក្រុម ដោយគ្រោងចុះអនុវត្តការងារបោះបង្គោល ចាប់ពីថ្ងៃទី១៧ ខែឧសភា ឆ្នាំ២០២៥ នេះតទៅ។

មន្រ្តីក្រសួង​សាធារណការនិងដឹកជញ្ជូន​បាន​អះអាង​ថា គម្រោងព្រែកជីកហ្វូណនតេជោ កំពុងដំណើរការយ៉ាងស្វាហាប់ ឆ្ពោះ​ទៅកាន់វឌ្ឍភាពតាមការគ្រោងទុក ,និរន្តរភាព និងឯករាជ្យដឹកជញ្ជូនផ្លូវទឹក។

លោក ផន រឹម មន្រ្តី​អ្នកនាំពាក្យក្រសួងសាធារណការនិងដឹកជញ្ជូនបាន​ឲ្យ​ដឹង​ថា គិតចាប់ពីថ្ងៃទី៣ ខែកុម្ភៈឆ្នាំ ២០២៥ រហូតមកដល់ពេលបច្ចុប្បន្ននេះ ក្រុមការងារបច្ចេកទេសរបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែនៃក្រសួងសាធារណការនិងដឹកជញ្ជូន បានចំណាយរយៈពេល ៥៥ ថ្ងៃរួចមកហើយ ដើម្បីចុះប្រមូលទិន្នន័យ បង្កើតបណ្តាញ​ប្រព័ន្ធប្រតិភីវិភាគ (BM) សរុបបានចំនួន ៤០ ទីតាំង និងបានបញ្ចប់ការថតយករូបភាពពីលើអាកាស សម្រាប់កំណាត់​ទី២ ទាំងស្រុង ហើយការថតយករូបភាពពីលើអាកាសដោយប្រើប្រាស់ឧបករណ៍ដ្រូនផែនទីទំនើបនេះ ត្រូវបានផលិតផែនទីលម្អិត និងផលិតផែនទីភូមិសាស្រ្ត3D សរុបលើផ្ទៃដីប្រមាណ១៥.៨៣៦ ហិកតារួចមកហើយ។

ក្នុងដំណើរទស្សនកិច្ច​របស់ប្រមុខ​ដឹកនាំ​ចិន​នៅ​កម្ពុជា កិច្ចព្រមព្រៀង និងកិច្ចសន្យា ចំនួន ៥ ច្បាប់ ពាក់ព័ន្ធនឹង “គម្រោង​គ្រប់គ្រងធនធាន​ទឹកចម្រុះហ្វូណនតេជោ” (គម្រោងព្រែកជីកហ្វូណនតេជោ) ត្រូវបានចុះហត្ថលេខាជាផ្លូវការរវាងរាជរដ្ឋាភិបាលកម្ពុជាជាមួយក្រុមហ៊ុនវិនិយោគ និងរវាងក្រុមហ៊ុនវិនិយោគកម្ពុជា និងក្រុមហ៊ុនវិនិយោគរបស់ប្រទេស​ចិន។

កិច្ចព្រមព្រៀង និងកិច្ចសន្យាទាំង ៥ ពាក់ព័ន្ធរួមមាន៖ (១) កិច្ចសន្យាភាពជាដៃគូរវាងរដ្ឋ និងឯកជន (២) កិច្ចព្រមព្រៀងម្ចាស់ភាគហ៊ុន, (៣) កិច្ចព្រមព្រៀងវិនិយោគ, (៤) កិច្ចសន្យាវិស្វកម្ម លទ្ធកម្ម និងសាងសង់ និង (៥) កិច្ចសន្យាប្រតិបត្តិការ និងការថែទាំ។

កិច្ចព្រមព្រៀង និងកិច្ចសន្យាទាំង ៥ នេះ នឹង​ធ្វើឱ្យដំណើរការនៃការវិនិយោគ ការសាងសង់ និងប្រតិបត្តិការណ៍ព្រែក​ជីក​ហ្វូណនតេជោប្រកបដោយភាពរលូន និងច្បាស់លាស់។

គម្រោងព្រែកជីហ្វូណនតេជោ គឺជាគម្រោងប្រវតិ្តសាស្រ្តរបស់កម្ពុជា ហើយត្រូវបានចាត់ទុកថាការបោះជំហានដ៏សំខាន់មួយ​ក្នុងប្រវត្តិសាស្រ្តរបស់កម្ពុជាក្នុងការកែប្រែមុខមាត់កម្ពុជា នៅក្នុងវិស័យនាវាចរណ៍ និងការដឹកជញ្ជូនតាមផ្លូវទឹក និងផ្លូវសមុទ្ររបស់កម្ពុជាផងដែរ។ មានប្រវែងជាង ១៧៤ គ.ម ដែល​ត្រូវ​សាងសង់​ឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប ហើយដែលអាច​ឲ្យ​នាវាមានទម្ងន់ផ្ទុករហូតដល់ ៣ ០០០ DWT ទៅមក និងជៀសគ្នាបានដោយសុវត្ថិភាព។

គម្រោងព្រែកជីក​ប្រវត្តិសាស្រ្ត​នេះ នឹងបង្កើតបណ្តាញផ្លូវទឹកដែលមានភាពប្រទាក់ក្រឡា និងអាចតភ្ជាប់បានគ្រប់ជ្រុងជ្រោយ ព្រមទាំងចូលរួមបំពេញបន្ថែមនូវចន្លោះប្រហោងមួយចំនួននៅក្នុងប្រព័ន្ធដឹកជញ្ជូនតាមផ្លូវទឹក និងសមុទ្ររបស់កម្ពុជានាពេលបច្ចុប្បន្ន និងបង្កើនប្រសិទ្ធភាព កាត់បន្ថយចម្ងាយនិងតម្លៃដឹកជញ្ជូន ធានាភាពប្រកួតប្រជែង ធានាឯករាជ្យភាព និងសុវត្ថិភាពនៃការដឹកជញ្ជូនតាមប្រព័ន្ធផ្លូវទឹក និងអាចតភ្ជាប់ត្រង់ពីបណ្តាញទន្លេមេគង្គទៅសមុទ្របានផង​ដែរ៕