រដ្ឋដាក់ឱ្យប្រើប្រាស់ជាផ្លូវការបណ្ណបើកបរឌីជីថល អាចផ្ទៀងផ្ទាត់ភាពត្រឹមត្រូវតាមថ្នាល verify.gov.kh ដើម្បីផ្ដល់ភាពងាយស្រួលដល់ពលរដ្ឋ

ក្រសួងប្រៃសណីយ៍និងទូរគមនាគមន៍ (ក.ប.ទ.) និងក្រសួងសាធារណការនិងដឹកជញ្ជូន (ស.ក.ដ) នារសៀលថ្ងៃទី១៣ ខែឧសភា ឆ្នាំ២០២៦ ប្រកាសដាក់ឱ្យប្រើប្រាស់ជាផ្លូវការបណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវតាមថ្នាលផ្ទៀងផ្ទាត់ ឯកសារ verify.gov.kh” ក្រោមអធិបតីភាពដ៏ខ្ពង់ខ្ពង់របស់លោក ជា វ៉ាន់ដេត រដ្ឋមន្ត្រីក.ប.ទ. និង លោក ប៉េង ពោធិ៍នា រដ្ឋមន្ត្រីស.ក.ដ។

សេចក្តីប្រកាសព័ត៌មានឱ្យដឹងថា បណ្ណបើកបរដែលអាចផ្ទៀងផ្ទាត់ភាព ត្រឹមត្រូវតាមថ្នាលផ្ទៀងផ្ទាត់ឯកសារ verify.gov.kh បែងចែកជា ៣ ប្រភេទដូចជាទី១/បណ្ណបើកបរដែលមានដាក់ QR Code របស់ ស.ក.ដ ដែលបានចេញឱ្យប្រើប្រាស់រួច អាចផ្ទៀងផ្ទាត់ ភាពត្រឹមត្រូវតាមរយៈការស្ទែន QR Code នៅលើបណ្ណបើកបរនោះដែលនឹងបញ្ជូនបន្តភ្ជាប់ (redirect) ទៅកាន់ផ្ទាលផ្ទៀងផ្ទាត់ឯកសារ verify.gov.kh។

ទី២/ការរក្សាទុកបណ្ណបើកបរ (ជាទម្រង់ឌីជីថល) ក្នុង Personal Wallet នៅលើកម្មវិធី DG SuperApp តាមរយៈការស្តែន QR Code របស់ ស.ក.ដ នៅលើបណ្ណបើកបរដែលបានចេញឱ្យប្រើប្រាស់រួច នឹងអនុញ្ញាតឱ្យសាមីខ្លួនអាចស្នើសុំ QR Code ស្តង់ដារនៃផ្ទាលផ្ទៀងផ្ទាត់ឯកសារ verify.gov.kh និងទី៣/បណ្ណបើកបរដែលនឹងមានដាក់ QR Code ស្តង់ដារដើម្បីផ្ទៀងផ្ទាត់ភាពត្រឹមត្រូវតាមរយៈផ្ទាល ផ្ទៀងផ្ទាត់ឯកសារ verify.gov.kh នឹងត្រូវរៀបចំដាក់ឱ្យដំណើរការចាប់ពីថ្ងៃទី១៣ ខែឧសភា ឆ្នាំ ២០២៦ តទៅ។

គួររំលឹកថា ការតភ្ជាប់ផ្ទាលផ្ទៀងផ្ទាត់ឯកសារ verify.gov.kh ជាមួយនឹងប្រព័ន្ធស្វ័យប្រវត្តិកម្មរបស់ ស.ក.ដ ដើម្បីផ្ទៀងផ្ទាត់និងបង្ហាញភាពត្រឹមត្រូវ សុពលភាព ពិន្ទុ និងទិន្នន័យផ្សេងទៀតនៃបណ្ណបើកបរ ដែលចេញដោយ ស.ក.ដ កើតឡើង បន្ទាប់ពីការចុះអនុស្សរណៈនៃការយោគយល់រវាង ក.ប.ទ. និង ស.ក.ដ កាលពីថ្ងៃទី៨ ខែកុម្ភៈ ឆ្នាំ២០២៤៕