ទីប្រឹក្សាក្រសួងព័ត៌មាន ថា ការថតគ្រួសារជនរងគ្រោះកំពុងមានទុក្ខ ដោយគ្រោះថ្នាក់ចរាចរណ៍ ជាទង្វើអសីលធម៌

លោក ប្រាក់ វ៉ាន់ដា ទីប្រឹក្សាក្រសួងព័ត៌មាន បានសរសេរលើបណ្តាញសង្គមហ្វេសប៊ុក នៅថ្ងៃទី១៥ ខែឧសភា ឆ្នាំ២០២៥ ថា អ្នកសារព័ត៌ ដែលថតក្រុមគ្រួសារជនរងគ្រោះកំពុងមានទុក្ខ ដោយសារគ្រោះថ្នាក់ចរាចរណ៍យកទៅផ្សព្វផ្សាយ ជាទង្វើដែលមិនមានក្រមសីលធម៌វិជ្ជាជីវៈ ប៉ះពាល់ដល់សិទ្ធិ និងកេរ្តិ៍ឈ្មោះជនរងគ្រោះពេលអនាគត។

ការលើកឡើងរបស់ លោក ប្រាក់ វ៉ាន់ដា ដោយសារ ជារឿយៗសង្កេតឃើញថា នៅពេលមានករណីគ្រោះថ្នាក់ចរាចរណ៍កើតឡើង ឃើញមានអ្នកសារព័ត៌មានមួយចំនួនបានទៅសម្ភាសន៍ និងចាប់យករូបភាពទុក្ខសោកមួយចំនួនរបស់គ្រួសារជនរងគ្រោះ ទាំងដែលគ្រួសារជនរងគ្រោះកំពុងទ្រហោយំព្រោះបាត់បង់សមាជិកគ្រួសារ មនុស្សជាទីស្រឡាញ់ ក្នុងករណីគ្រោះថ្នាក់ចរាចរណ៍។

ពាក់ព័ន្ធការណីនេះ លោក ប្រាក់ វ៉ាន់ដា បានសរសេរថា៖ “ជារឿយៗ ឃើញអ្នកសារព័ត៌មានតែងតែថតក្រុមគ្រួសារជនរងគ្រោះក្នុងហេតុការណ៍គ្រោះថ្នាក់ចរាចរណ៍ ដែលកំពុងយំសោកសង្រេង រងនូវសេចក្ដីទុក្ខដ៏ក្រៀមក្រំ យកទៅបង្ហោះចែកចាយយ៉ាងច្រើន ដែលទង្វើនេះ គឺប៉ះពាល់ដល់សិទ្ធិ កេរ្តិ៍ឈ្មោះ និងកេរខ្មាសរបស់ក្រុមគ្រួសាររងគ្រោះនាថ្ងៃអនាគត”។

លោក ក៏បានបញ្ជាក់ដែរថា ទង្វើទាំងអស់នេះ ជាទង្វើដែលប្រាសចាកពីក្រមសីលធម៌វិជ្ជាជីវៈអ្នកសារព័ត៌មាន ហើយលោកក៏ស្នើឱ្យអ្នកសារព័ត៌មានគួរចៀសវាងត្រង់ប្រការនេះផងដែរ៕