ព័ត៌មានជាតិ

សត្វកម្រ ៤ ប្រភេទ ទេសចរមិនគួររំលង ពេលទៅទស្សនាឧទ្យានកម្សាន្តធំបំផុតនៅខេត្តសៀមរាប

បានផុស

១ year មុន

នៅ

ថ្ងៃអង្គារ ២៧ ឧសភា ២០២៥

ដោយ

បើតាមការឲ្យដឹងពីអ្នកសម្របសម្រួលឧទ្យានកម្សាន្ត អង្គរវ៉ាយដ៍ឡាយហ្វ៍ & អឹឃ្វារៀម (Angkor Wildlife & Aquarium) បានឲ្យដឹងថា ឧទ្យានអង្គរវ៉ាយដ៍ឡាយហ្វ៍ & អឹឃ្វារៀម (Angkor Wildlife & Aquarium) មានការអភិរក្សសត្វជាច្រើនប្រភេទ ក្នុងនោះក៏មានសត្វកម្រមួយចំនូនស្ទើរផុតពូជក្នុងប្រទេសកម្ពុជា និងមួយចំនួនត្រូវបាននាំចូលពីក្រៅប្រទេស ដែលផ្តល់ជាផ្ទាំងទស្សនីយភាពដ៏ពិសេសដល់ភ្ញៀវមកទស្សនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កូវ ផល្លី អ្នកសម្របសម្រួលទីផ្សារ និងការលក់នៅឧទ្យានកម្សាន្តអង្គរ វ៉ាយដ៍ឡាយហ្វ៍ និង អឹឃ្វារៀម បានប្រាប់ក្រុមអ្នកសារព័ត៌មានក្នុងដំណើរទស្សនកិច្ចនៅក្នុងខេត្តសៀមរាបថា ឧទ្យានកម្សាន្ត អង្គរវ៉ាយដ៍ឡាយហ្វ៍ & អឹឃ្វារៀម (Angkor Wildlife & Aquarium) បានបើកដំណើរការនៅឆ្នាំ ២០២២ ដែលផ្តោតសំខាន់លើការអភិរក្ស និងការសង្គ្រោះសត្វជិតផុតពូជជាច្រើនប្រភេទ ដែលត្រូវបានជាប់អន្ទាក់ ឬត្រូវបានគេប្រមាញ់។

លោកថា សត្វដែលត្រូវបានអភិរក្សនៅក្នុងសួនឧទ្យានមានជាង ៤៦ ប្រភេទ ក្នុងនោះមានសត្វល្មូនចំនួន ៣១ ប្រភេទ សត្វស្លាប ៥ ប្រភេទ រួមទាំងថនិកសត្វ ១០ ប្រភេទ។ ក្រៅពីនេះក៏មានប្រភេទត្រីទឹកសាប មាន ៤២ ប្រភេទ និងត្រីទឹកប្រៃ មានចំនួន ៣៦ ប្រភេទ។

ក្នុងចំណោមសត្វរាប់រយប្រភេទនេះ លោក កូវ ផល្លី បានណែនាំដល់ភ្ញៀវមិនគួររំលងទស្សនាត្រីគល់រាំង ដែលជាត្រីតំណាងជាតិ ដែលជាប្រភេទសត្វជិតផុតពូជស្ថិតនៅក្នុងបញ្ជីក្រហមរបស់អង្គការ IUCN។ ក្រៅពីនេះក៏មានប្រភេទសត្វល្មួន មានអណ្តើកហ្លួង រួមទាំងសត្វខ្លាឃ្មុំ និងសត្វខ្លាដ៏កម្រដែលនាំមកពីទ្វីបអាហ្វ្រិក។

លោកថា ក្នុងរយៈពេលជាង ២ ឆ្នាំ ឧទ្យានកម្សាន្ត អង្គរវ៉ាយដ៍ឡាយហ្វ៍ & អឹឃ្វារៀម (Angkor Wildlife & Aquarium) ទទួលបានការគាំទ្រយ៉ាងច្រើន។ នៅរដូវកាលបៃតងនេះ ក្នុងមួយថ្ងៃទទួលបានភ្ញៀវទេសចរមកកម្សាន្តប្រហែល ១០០ ទៅ ២០០ នាក់ និងថ្ងៃចុងសប្ដាហ៍អាចលើសពី ៤០០ នាក់ដល់ ៦០០ នាក់។

ពាក់ព័ន្ធតម្លៃចូលទស្សនា លោកបានបញ្ជាក់ថា ភ្ញៀវក្នុងស្រុកតម្លៃសំបុត្រ ១១ ដុល្លារសម្រាប់មនុស្សពេញវ័យ និងកុមារតម្លៃ ៥,៥ ដុល្លារ។ ចំណែកជនបរទេស ២០ ដុល្លារ និងកុមារ ១១ ដុល្លារ។

បន្ថែមពីនេះ ឧទ្យានក៏ផ្តល់តម្លៃពិសេសសម្រាប់សិស្សនិស្សិត និងលោកគ្រូអ្នកគ្រូ ដើម្បីបានឱកាសអាចមកទស្សនាសិក្សាស្វែងយល់ពីសត្វកម្រ និងត្រីជិតផុតជាច្រើនប្រភេទ៕

Related Topics: