ព័ត៌មានជាតិ

កោះអណ្តែតនៅបឹងកន្សែង ធ្វើចលនាតែរដូវវស្សាជាអភូតហេតុចម្លែកកម្របានឃើញ

បានផុស

១ នាទីute មុន

នៅ

ថ្ងៃអង្គារ ៣ មិថុនា ២០២៥

ដោយ

ប្រជាជនរស់នៅក្នុងខេត្តរតនគិរី តែងសង្កេតនៅពេលមានភ្លៀងខ្លាំង អភូតហេតុចម្លែកកោះអណ្តែតរំកិលខ្លួនជុំវិញ បឹងកន្សែង នៅពេលមានភ្លៀងធ្លាក់ដើមឆ្នាំមានទឹកពេញប្រៀប។ ទិដ្ឋភាពកោះអណ្តែតនេះទៅតាមទិសខ្យល់ បើបក់មកពីទិសខាងលិចគឺអណ្តែតទៅខាងកើតជាដើម។

បើតាមអបិយជំនឿរបស់ប្រជាជននៅជុំវិញនោះដែលធ្លាប់ឃើញនៅកោះអណ្តែតនេះអះអាងថា ដោយសារមានអ្នកតាកាន់នៅលើកោះ ទើបនៅពេលចង់ទៅកន្លែង ក៏រំកិលខ្លួនសំដៅទៅចតនៅកន្លែងនោះ។ បើតាមការតំណាលប្រាប់របស់អ្នកស្រុក អភូតហេតុកោះអណ្តែតនេះជាទូទៅនៅរយៈពេល ១០ ឆ្នាំម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីពលរដ្ឋបន្តថា កាលពីមុនកោះអណ្តែតជាប់គ្នា ២ បន្តកន្ទុយគ្នា តែក្រោយមកមានតែ ១ ប៉ុណ្ណោះ ដែលអណ្តែតតែឯង។ នៅលើកោះនោះមានដើមឈើដុះប្រជ្រៀតគ្នាយ៉ាងមាំល្អ ច្រូងច្រាង យ៉ាងជិតគ្នា រួមជាមួយនិងរុក្ខជាតិស្មៅតូចធំជាច្រើនបង្កើតបានទស្សនីភាពដ៏អស្ចារ្យ ដែលមនុស្សទូទៅមិននឹកស្មានដល់រឿងរ៉ាវដ៏ប្លែកៗបានកើតឡើងដោយធម្មជាតិ។

ទីកន្លែងនេះក៏នៅបង្កប់នៅរឿងរ៉ាវអបិយជំនឿរួមមាន រោងអ្នកតា ២ ទៀត គឺលោកតា ខាំឡែន ប៊ូ ជួងនិងកោះអណ្តែត ដែលនៅជិតអាស្រមលោកតា ប៊ូ ជួង សម្រាប់មនុស្សទូទៅបួងសួង នៅពេលជួបវិបត្តិ ទុក្ខភ័យនិងសុំសេចក្តីរុងរឿងក្នុងជីវិតផង។ បើទោះបីជាស្រុកទេស ត្រូវឆ្លងកាត់ភ្លើងសង្គ្រាម រាប់មិនអស់ក៏ដោយ ក៏វត្ថុជាទីសក្ការទាំងនោះនៅតែមិនបាត់បង់ទៅណាឡើយ។ នេះតាមការការអំណះអំណាងរបស់អ្នកស្រុក។

បឹងកន្សែងដែលមានរាងដូចលោកខែមានទំហំ ២៩ហិកតា និងមានជម្រៅជ្រៅបំផុតកម្ពស់ ៤ ម៉ែត្រ ហើយផ្ទៃបឹងនេះ ភាគច្រើនជាតំបន់ដីគោក។ ជាមួយគ្នានេះ រដ្ឋបាលខេត្តរតនគិរី មានគម្រោងសង់ផែលំហែកាយបន្ថែម និងផ្លូវជុំវិញមាត់បឹងកន្សែងផងដែរ។

បឹងកន្សែងត្រូវបានគេស្គាល់ថា ជាទីរមណីយដ្ឋាន ហើយប៉ុន្មានឆ្នាំនេះរដ្ឋបាលខេត្តរតនគិរី បានសាងសង់រូបចម្លាក់សត្វផ្សេងៗ រៀបចំភ្លើងបំភ្លឺ កន្លែងក្មេងលេង និងទីកន្លែងសម្រាប់ហាត់ប្រាណ៕