គម្រោងអភិវឌ្ឍអាកាសយានដ្ឋានមណ្ឌលគិរីថ្មីត្រូវបានផ្ដល់ធាតុចូលបន្ថែមដើម្បីឱ្យកាន់តែប្រសើរ

គម្រោងអភិវឌ្ឍអាកាសយានដ្ឋានមណ្ឌលគិរីថ្មី ដែលមានតម្លៃប្រហែល៨០លានដុល្លារ កំពុងត្រូវបានគេសិក្សា និងថ្មីៗនេះត្រូវបានផ្ដល់នូវធាតុចូលបន្ថែមដើម្បីឱ្យគម្រោងមួយនេះកាន់តែប្រសើរ។ ព្រលានយន្តហោះថ្មីនេះ ដែលនឹងសាង សង់លើផ្ទៃដី៣០០ហិកតា នឹងចាប់ផ្ដើមនៅឆ្នាំក្រោយ។

នៅថ្ងៃទី៣០ ខែមីនា ឆ្នាំ២០២១ ឯកឧត្តម នាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបានដឹកនាំកិច្ចប្រជុំដើម្បីស្វែងយល់ និងផ្តល់ធាតុចូលបន្ថែមលើរបាយការណ៍សង្ខេបស្តីពីការសិក្សាសមិទ្ធិលទ្ធភាពពេញលេញសម្រាប់ការអភិវឌ្ឍអាកាសយានដ្ឋានមណ្ឌលគិរីថ្មី និងតំបន់ឧស្សាហកម្មរណបអាកាសយានដ្ឋាន។

ឯកឧត្តមនាយឧត្តមសេនីយ៍បណ្ឌិតរដ្ឋមន្ត្រីបានផ្តល់អនុសាសន៍២ចំណុចដើម្បីឱ្យរបាយការណ៍នេះ កាន់តែប្រសើរឡើង៖

១. ត្រូវយកចិត្តទុកដាក់បញ្ចូលបន្ថែមនូវសកម្មភាពអភិវឌ្ឍទេសចរណ៍ និងសេដ្ឋកិច្ច តំបន់ស្របតាមគោលនយោបាយរបស់ក្រសួងទេសចរណ៍។

២.ត្រូវរកវិធីសាស្រ្តថ្មីៗដើម្បីទាក់ទាញក្រុមហ៊ុនអាកាសចរណ៍ឱ្យធ្វើការហោះហើរ ទៅតំបន់នោះដូចជាផលិតផលទេសចរណ៍ថ្មីៗ សកម្មភាពសេដ្ឋកិច្ចនិងវិនិយោគថ្មីៗ។

បន្ទាប់ពីទទួលបានអនុសាសន៍ណែនាំ និងធាតុចូលបន្ថែមពីសំណាក់ ឯកឧត្តមបណ្ឌិត រដ្ឋមន្ត្រីរួចមក អ្នកពិគ្រោះយោបល់ Consultant នឹងខិតខំសិក្សានូវធាតុចូលបន្ថែមទៀតទៅក្នុងរបាយកាណ៍នេះ។