ផ្លូវល្បឿនលឿន ដំឡើងឧបករណ៍ឡាស៊ែរ ដើម្បីពញាក់ស្មារតី អ្នកបើកបរពេលយប់

ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានរៀបចំដំឡើងឧបករណ៍កាំរស្មី​ឡាស៊ែរ​ ដែល​​មានមុខងារជួយពញ្ញាក់​ស្មារតី កាត់បន្ថយភាពនឿយហត់របស់អ្នកបើកបរ និងអាចជួយ​បង្កើន​ការប្រុងប្រយ័ត្នពេលបើកបរយប់។

ឧបករណ៍នេះ បញ្ចេញកាំរស្មីពណ៌បៃតងនាពេលរាត្រី ក្នុងមុំប្រហែល ៤៥ ដឺក្រេទៅខាងលើ ផ្ទុយទិសដៅចរាចរណ៍របស់យានយន្ត និងអាចបាញ់ពន្លឺក្នុងចម្ងាយប្រហែល ៤ ដល់ ៥ គីឡូម៉ែត្រ។

គួរបញ្ជាក់ផងដែរថា ការតម្លើងឧបករណ៍នេះមិនបង្កផលប៉ះពាល់ដល់អ្នកបើកបរឡើយ មិនតែប៉ុណ្ណោះថែមទាំងអាចជួយបង្កើនសោភ័ណភាពតាមដងផ្លូវឱ្យកាន់តែល្អប្រសើរជាងមុន។

ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុនឹងចាប់ផ្ដើមតេស្ត​ឧបករណ៍កាំរស្មី​ឡាស៊ែរ នៅថ្ងៃទី១៩ ខែមិថុនា ឆ្នាំ​២០២៥ តាមផ្លូវល្បឿនលឿន ត្រង់គីឡូម៉ែត្រលេខ K77+990, K113+700 និង K115+750 ជាកំណាត់ផ្លូវដែលអ្នកបើកបរងាយនឹង​ប្រឈមមុខនឹងបញ្ហាដូចដែលបានរៀបរាប់ខាងលើ។

ក្រុមហ៊ុនផ្លូវល្បឿនលឿនអំពាវនាវ កុំឱ្យសាធារណជន និងអតិថិជនកុំមានក្ដីព្រួយបារម្ភពីផលប៉ះពាល់​ណាមួយពីការដំឡើង​ឧបករណ៍នេះ៕